Kudandamen Kukwet Difut
1 “Mu kudandamen kwen mwawiy muukeza kisakilany mipim yen.” (Lu. 21:19) Mazu minam, madi chikunku cha uprofet wa Yesu piur pa “kwinsudiel kwa mangand” movakeshin nawamp anch mu kudandamen ku kujijaman kwetu, tufanyidin kwirijek chakwel kurish nich yoziu yivud yikutushikena. Pakwez ku ukash wa Yehova, umwing ni umwing wetu ukutwish ‘kujijaman ni kushik kwinsudiel’ ni “kupandishiu.”—Mat. 24:3, 13; Filp. 4:13.
2 Kuzengol, milong ya ukash wa mujimbu, yikokujol ya makut, ni yovil ya runeng yikutwish dichuku ni dichuku kulet choziu. Pakwez, kangal tuvuramenany anch, Satan upakishining kushesh kujijaman kwetu kud Yehova. Dichuku din diawonsu tudandamedina kushinshaman kud Tatukwetu didi dichuku tuwejidinaku kupan chakul ku chipul cha Ukata kumusarumun piur pa kushinshaman kwetu. Chidi cha musangar mud ik kwijik anch “mansoj” metu mitukata kudil pitudia mu choziu kamavuramedinap! Madi ma usey kudiay Yehova, ni kujijaman kwetu kukat kusangaresh muchim wend!—Kus. 56:8; Jinsw. 27:11.
3 Engurilau Nich Yoziu: Mar makutwish kumekesh kuziy kwa ritiy ap ulim wa untu, mud kwibaz ap kuburen kushimpish. Pa ndond pa kusot kwipuk ap kupwish yoziu nich kulik kusadil mifund, tufanyidin kutesh chiyul cha Dizu dia Nzamb cha kushil ‘muchim wa kudandamen kuwanyish mudimu wau’. Mulong wak? Mulong kujijaman nich kushinshaman kwa ritiy kutukwashin kwikal “awanyidina ni akash.” (Jak. 1:2-4) Kudandamen kukutwish kutukwash kukudish mikadil ya usey, mud yitongijok yiwamp, ranaken, ni riy.—Rom 12:15.
4 Usey wa Ritiy Ripakinau: Pitujijamena ku yoziu, tukat kwak usey wa ritiy ripakinau rikweta usey ujim ku mes ma Nzamb. (1 Pi. 1:6, 7) Ritiy mud riner ritukwashining kujijaman chisu cha yakamish ya dikez. Chipandikenamu kand, tukwikal itiyikina kudiay Nzamb, ni chinech chikasikeshin ruchingej retu, kurikadish rakin kud etu.—Rom 5:3-5
5 Difut dipandikena kuwap dia kudandamen adikasikeshidin ku Jakobu 1:12, ulondina anch: “Wayuk muntu ukweta muchim wa kudandamen pa chisu chikumanay mar, mulong ndiy wiminy dang mu chisu chamupakau. Ndiy ukez kutambul chibangul cha mwom.” Chawiy lel, twimanany dang mu kwipan kwetu kud Yehova, nich kuchingej anch ukuyifut “antu amukatila.”