Tutakelany Malejan ma Bibil Mayila Kurutu Chikunku 2: Kwirijek Mulong wa Kutakel Dilejan
1 Kulejan muchifanyidina ku dilejan dia Bibil kudiap ching kusu kwau kwisambin malejan ni kutang kwau mifund yijimbwilau pakwez kwitin yivud. Tuswiridin kulejan rusangu mu mutapu wakwel anch rishik ku muchim wa mwin kwilej. Chinech chitin kwirijek nawamp chakwel mwin kwilej ataninamu.—Jinsw. 15:28.
2 Mutapu wa Kwirijek: Sambel kulembil kud Yehova mulong wa mwin kwilej ni maswir mend. Mwita Yehova akukwasha chakwel ushik ku muchim wa mwin kwilej. (Kol. 1:9, 10) Chakwel kwov nawamp chitongijok chijim, itekina chisu cha kushinshikin mutu wa mulong wa mwimbu ap wa dilejan, tumitu twa milong, ni yom ya ukwash mud yifwatul, mazu mayirumburila, tumishet. Iyipula anch, ‘Ov, risu rutong rijim ra malejan minam?’ Chinech chikutwish kukukwash kwasin pa manans majim chisu utakedina dilejan.
3 Chirikin nich kudimuk malejan paragraf ku paragraf. Jingunin yakul ku yipul yifundinau, tek yijingidij pa mazu ni pa jintung ja usey. Shinshikin mutapu mifund yijimbwilau yovijadina nich dinans dijim dia paragraf, ni tond mifund ya kutang chisu cha dilejan. Ukuman anch chidi cha ukwash kufund mu wiswimp yilondinau ku kabet ka dipaper. Mwin kwilej ufanyidin kwov kurumburik anch yilejinay yidiokil mu Dizu dia Nzamb.—1 Tes. 2:13.
4 Kwasin Dilejan pa Muntu: Cha kaad, shinshikin mu manangu dilejan kwambatan nich maswir ma pakampwil ma mwin kwilej. Sambel kutongin yipul yend ni manans makukanganyay kwov kurumburik ap kwitiy. Iyipula anch: ‘Yom ik yiswiridinay kwov kurumburik ap kusal mulong aya kurutu muspiritu? Mutapu ik nikutwisha kumushik ku muchim?’ Chad ambatanish lel malejan mey nich yom yiney. Pa yisu yimwing, ukutwish kuman anch chiswiridikin kurijek chilikej, dirumburil, ap yipul kushalijan mulong wa kumukwash mwin kwilej kwov nawamp kurumburik kwa dinans kampand ap kwa mufund kanang. (Neh. 8:8) Pakwez ipuk kuwejinaku jinsangu jikwau jakad kwovakesh nawamp chitongijok chijim. Kuchirikin dilejan kwinsudiel mu wiswimp kukumukwash kuvurik manans majim.
5 Chakin kamu tukwet musangar nakash pasonginau antu asu mabuj ma kutentam ku kushiman kwa Nzamb! (Filp. 1:11) Chakwel kuyikwash kushiken ku rutong riner, irijeka nawamp chisu chin chawonsu utakedina dilejan dia Bibil.