Tutakelany Malejan ma Bibil Mayila Kurutu Chikunku 4: Kuyifumb in Kwilej Kwirijek
1 Mwin kwilej ukata kutang dilejan kurutu, kutek kashony pa yakul, ni kutong mutapu wa kwakul mu mazu mend amwinend ukat kupam muspiritu swa. Chawiy lel, pakusambisha kamu dilejan kapamp ka kusambish, rijekany dilejan pamwing mulong wa kumulej mwin kwilej mutapu wa kurijek. Nau in kwilej avud, chikwikal cha ukwash kurijek mwimbu wa kabuj ap dilejan pamwing.
2 Tushony ni Yijingidij: Rumburil mutapu wa kutan kapamp kamwing yakul ku yipul yifundinau. Muleja mwin kwilej kopi wey wa buku wa kwilej mu watekina kal tushony pa mazu majim ap jintung. Piushinshikidina malejan, ndiy ukutwish kusot kulondul chilikej chey, kutek tushony mu buku wend ching kusu pa yom yiswiridikina mulong wa kumukwash kuvurik chakul. (Lu. 6:40) Kupwa mwipula akula mu mazu mend amwinend. Chinech chikez kukukwash kuman nawamp mutapu wovilay kurumburik kwa malejan.
3 Kushinshikin nawamp mifund yakadau kujimbul chidi chikunku cha usey cha kwirijek kwa mwin kwilej mulong wa dilejan. (Mid. 17:11) Mukwasha chakwel amana anch mukand ni mukand ulejenau ukasikeshidin dinans kanang mu paragraf. Muleja mutapu wa kutek yijingidij yiswimp kuns kwa dipaper dia buku wend wa kwilej. Mukasikeshina kashinsh ka kwijik anch Bibil ndiy udia dishin dia yom yilejinay. Mukasikesha chakwel asadil nawamp mikand yilejenau mu yirumburil yend chisu cha dilejan.
4 Kushinshikin ni Kuchirikin: Kurutu kwa mwin kwilej kusambish kurijek kwend kwa chom ni chom cha dilejan, chikwikal cha ukwash kud ndiy kwikal nich chitongijok chijim cha mutu wa mulong. Ijik anch ukutwish kushinshikin malejan kusutil ku kushinshikin mu wiswimp mutu wa mulong wa shapitre, tumitu twa milong, ni yipich. Murumburila anch kurutu kwa kupwish chikunku cha kurijek kwend, chikutwish kwikal cha manangu itekina chisu cha kuchirikin manans majim mapaninau mu dilejan, pamwing ap kusadil mushet wa dichirikin anch udiaku. Kuchirikin kwinoku kukez kumukwash kulam malejan.
5 Kumufumb mwin kwilej kurijek nawamp dilejan diend kukumukwash kupan yirumburil yovikena ku yikumangan ya chikumangen. Kukumukwash kand kukudish yaku ya kwilej yikeza kumukwash kwinyim kwa kupwish kwilej nend Bibil panrend.