“Wayuk Muntu Ukat Kujamish mu Yoziu”
1 In Kristu awonsu afanyidin kwikonk. (2 Tim. 3:12) Yoziu yikutwish kwikal mudi musong, kukangany nfalang, kupakiu, kuzengol ap mu mitapu yikwau yivud. Yoziu yikatay kutukakin Satan yidi mulong wa kutuchirish kwinyim, kutushikij ku kudiul mudimu wetu wa Ukristu, ap kand mulong wa kutwimik tulika kumusadil Nzamb. (Yob 1:9-11) Kujamish mu yoziu kuletining nchik musangar?—2 Pi. 2:9.
2 Irijeka Mulong wa Yoziu: Yehova watwinkishin kal Dizu diend dia uyakin, pamwing ni rusangu ra mwom ni mafundish ma Yesu. Anch twatesh ni kusadil mazu ma Yesu, tukat kwitekin mufulandal ukash ni kwirijek mulong wa yoziu. (Luka 6:47-49) Tukat kutanin kand usu ku yitenchik yikwau—kusutil kudi akadivar netu in Kristu, ku yikumangan ya chikumangen, ni kusutil ku mikand yimedina pa Bibil ya chisak cha kashalapol ushishamena ni kubabal. Tukat kusadil mutusotila chipan cha Nzamb cha kulembil.—Mat. 6:13.
3 Yehova watwinkishin kal kand ruchingej. Anch twikal ni ritiy rikash mu yakushilamu ya Yehova, ruchingej retu rikwikal “mudi chom chikwadikina ku mupim, ridi rakin ni kudandamen.” (Heb. 6:19) Pa chirung cha Bibil, maat madingap ni kudiokal mu chawu pakad kusend chom cha kuukwadik nich (ancre), ap pa chisu chiwamp. Anch pakad kuchingejin rinkind mukash watut, kudjibul chom cha kukwadik nich kwadinga ni kukangesh rinkind kuutwal waat kujiyin kuns kwa mayal madia mu mem. Chilik chimwing, kwikal ni ritiy rikash mu kushilamu kwa Nzamb katat, kukez kutukasikesh anch rinkind mukash wa yoziu washik. Yikokujol yikutwish yalank kamu kapamp kamwing pakad kuyichingejin. Ap anch mujikit wa Paul nend Barnabas awaka nawamp kwisambishil mu Listre, mwikadil waswimpa kapamp kamwing pezau in Yuda akarupompat.—Midimu 14:8-19.
4 Kujamish Kuletining Musangar: Kujamish mu mudimu wa kulejan kwikalap nchik rupompat kutwinkishining chisambu cha mu muchim. Tusangering patulimishiningau ni kutukwatish usany mulong wa dijin dia Kristu. (Midimu 5:40, 41) Kujamish mu yoziu kutukwashin kukudish ngikadil ya kwitudish, kuziyil, ni kujamish kamu nakash. (Kuv. 8:16; Heb. 5:8; Yak. 1:2, 3) Kutulejin kumwengamin Yehova, tuchingejin yakushilamu yend, ni twikangin mwi ndiy.—Jinsw. 18:10.
5 Twij anch yoziu yidi ya mu kachisu kakemp kusu. (2 Kor. 4:17, 18) Yoziu yitwinkishin yisu ya kumekesh rukat retu rijim mulong wa Yehova. Anch twajamish mu yoziu, tukutwish kwakul ku kufundan kwa Satan. Chawiy lel, kituziyiningap! “Wayuk muntu ukat kujamish mu yoziu; mulong pa kupandakan ndiy ukez katambul chibangul cha kupand.”—Yak. 1:12.
[Picture on page 1]
(Yilondwilaku yidi pa p. 2, mu mulong wa 3)
[Picture on page 2]
Kujamish mu Yoziu (Yilondwilaku)