Yitenchikiril Yisangareshina ya Chinong cha Kalam!
1 Kwisambishil kwa muvu unou, yikumangen yatambwil chijikish chisangareshina: Kusambish pa Chiwong 2008, Chinong cha Kalam chikez kwikal mu yichap yaad kushalijan, dimwing dia antu awonsu ni dikwau dia Akadivar netu in Kristu! Pamwing ap ukat kwiyipul anch: ‘Ov, magazet minam maad makushalijan nchik? Yisu yisakin ya kwikal ni yichap yishalijadina? Ov, kudi yom yisu yikuwejau?’
2 Kushalijan: Dichap dia dichuku dia kusambish dia ngond dikez kwikal Dichap dia Antu Awonsu. Mitu ya milong yawonsu yikwikala mu nimero winou akuyirijek mulong wa kuyikwash antu awonsu. Nimero wa dichuku dia 15 dia ngond ukez kwikal Dichap dia Malejan ni tukezap kumupan mu mudimu wa chingand. Dikez kwikal nich mitu ya milong yawonsu ya kwilej ya ngond wa kabuj ni mitu ya milong yikwau yiyitadina kamu nakash in Kristu ipana kal. Dichap dia Antu awonsu dia Chinong cha Kalam dikezap kusu kuyisangaresh Atuman, pakwez dikez kuyisangaresh kamu nakash antu akad kwikal Atuman akutwisha kwitiyij Bibil. Pakwez, Réveillez-vous !, akudandamen kumusal mulong wa antu avud, antu akweta chinshilend ku muchim pa milong ya Nzamb ni a mu relijon wakad kwikal wa Ukristu.
3 Ukwash: Mu Dichap dia Malejan, chikwikalap kand cha usey kurumburil mazu mudi “chibol” mu mutapu wa kwel anch muntu wakad kwikal Kaman atesha. Dichap dined dikutwish kand kwikal ni jinsangu ja pakampwil jirijekinau kusu mulong wa Atuman a Yehova ni antu ilejina Bibil ayila kurutu mu spiritu. Dichap dia Antu Awonsu dikwikal mutapu ik? Mulong mitu ya milong yitondinau ni mutapu wa kuyifund yikez kwasin antu awonsu, muntu wakad kwikal Kaman ukez kusanger kamu nakash kutang gazet mwawonsu. Chakin, Kaman wa Yehova mwawonsu ukez kisakin kusutil ku kutang nimero ni nimero. Mulong tukez kusambish kupan kusu Chinong cha Kalam chimwing ni Réveillez-vous ! mu mudimu wa chingand ngond ni ngond, tukez kwikal ni ngond wa kabuj wa kusadil mutapu uwamp minsamb ya kusambish nich.
4 Yom Yisu: Atongidin kutek mu Dichap dia Antu Awonsu dia Chinong cha Kalam yom yimwing yisu yisangareshina. Chikunku chimwing chikez kwisambin mafundish ma Bibil ma dishin mu mutapu umwing uswapela. Chikwau chikez kumekesh mutapu Bibil ukutwishay kukwash majuku. Akez kulejanamu mutapu wa kwilej Bibil nau ansand. Nimero ni nimero ukez kwikal ni mutu wa mulong wisambidina mifund kanang ya Bibil yitufundishina piur pa untu wa Yehova.
5 Tukat kulembil anch Yehova ayukisha ditenchik dined disu dia Chinong cha Kalam. Gazet winou, pamwing ni Réveillez-vous !, ayishikena antu avud afanyidina mulong wa rusangu ruwamp.—Mat. 10:11.