Ov, Ukat Kuyisadilang Nakash?

¹ “Nikulabishapu kuyisadil mu mudimu wa chingand!” Yawiy yafunday nambaz umwing papwishay kutang Chinong cha Kalam cha Chiwong 1, 2008. Ov, wezin kal kushinshikin kand mitu ya milong yimwing yidia mu Chinong cha Kalam cha kuyinkish antu, ni wamen kal mutapu wa kuyisadin nawamp mu mudimu wey wa chingand?

² “Yitwilejidina Kudiay Yesu”: Watanin kamu anch mitu ya milong yiney yikutwish ku kukwash kusambish malejan ma Bibil. Anch kand kal usalangap mwamu, ukutwish kumutangin mwin chikumbu mutu wa mulong udia mu mukand ni umuleja yalonday Yesu pa mulong winou, mud muyilondinau mu paragraf wa kusambish. Anch kusanger kwa kusambish kwamekan, ikasikesha kudandamen nich mambamb nich kusadin tumitu twa milong tukemp, tutekinau mulong wa kulangwish yipul. Muleja muntu arumburilang ku yipul umwipwila. Murumburila mu wiswimp yipich yimwing yidiamu, ni ukutwish kuyany kand mu paragraf ulondwila. Ukutwish kupwish chikunku cha kusambish cha mutu wa mulong ni ukwez kwisambinany chikunku cha kaad pa chisu ukumuchirikina. Irijeka chakwel udandamen mufundish nich Buku Chifundishinay Bibil.

³ “Musul wa Musangar mu Dijuku”: Yikunku yiney, ayitenchikining mulong wa kuyikwash amakundj, amband, ni anvaj chakwel amana mutapu wakusadil mbil ja Bibil chisu chidiau nich milong yikutwisha kuyipish chisambu mu dijuku. Ukutwish kand kusadin mikand yiney mulong wa kuyikwash antu akad kwikal-Atuman chakwel amana manangu madia mu Bibil.—2 Tim. 3:16, 17.

⁴ Mitu ya Milong Mulong wa Ansand: Yikunku “Malejan kudi Asand Etu” yikat kupan yitongijok yikutwishau kusadin mu kushinshikang yom yilondinay Bibil. Ukutwish kusadin mitu ya milong yiney mulong wa kuyikwash ansand awutanina mu mudimu wa chingand chakwel amana usey wakusadin mulong wa kwilejang Dizu dia Nzamb. (Kus. 119:9, 105) Chisu ukulonda nau anvaj, ukutwish kukasikesh yom yijim “Yilejany Anen” yikunku yiney, yimekening ngond win mwawonsu. Mikand yiney yikutwish kuyikwash an kwilej malejan makweta usey madia mu Bibil. Ov, watekin kal chisu cha kutangang mikand yiney nau aney?

⁵ Mitu ya Milong Yikwau: Mutu wa mulong “Yipul ya in Kutang” ukat kushinshikin yipul yikatiningau kwipul antu akad kwikal Atuman. Ukutwish kukasikeshin pa yom yijim yidia mu mukand winou pa chisu uupanina ku chikumbu ni chikumbu. Mutu wa mulong “Mukand Udiokila mu . . .” uding rapor wa muntu-wakusambish ulejeninga mar makata kuyishiken amishoner ni milong kand yikwau yirishiningau nich mu mudimu wau. Mikand mud yiney yikutwish kuyikwash antu akata kuyisanger amana anch rusangu ruwamp akat kurilejan pa divu diawonsu, mulong wa kuwanish chijingidij cha kwez kwa Kristu.—Mat. 24:3, 14.

⁶ Mutu wa mulong “Mushejina Nzamb Piswimp,” ushindamedina pa kutang kwa Bibil mulong wa Shikol ya Mudimu ya Uteokras, yikutwish kuyibachik antu akweta kashinsh kwilej chipandikena mulong wa Yehova. Yikunku “Imburijany Ritiy Rau,” umekeninga tupamp tunying pa muvu, uding mulong wa kuyikwash antu amana yilondiningay Bibil, kusadin yilondinay Bibil—kutond kwau, milong yau, ritiy rau—ezin ku mwom mulong wa kutang kwau.

⁷ Musangar mud ik tukweta pa kutambulang kupwa kwa angond asatu Chinong cha Kalam chidia mulong wa kutukwash kuchisadin mu mudimu wetu wa chikand! Mu yawonsu yiney, kom twikala in kusangerang kwijik yidiamu ni tumusadinang nakash mu mudimu wetu wa chingand.