Mitu ya Milong ya Ukwash Piur pa Mudimu wa Kulejan
1. Ov, jisu ntong jaad jikweta mitu ya milong yilondina anch « Conversation avec un Témoin de Jéhovah »?
1 Chisu ni chisu, dichap dia antu awonsu dia Chinong cha Kalam dikwet mitu ya milong yilondina anch « Conversation avec un Témoin de Jéhovah ». Mitu ya milong yiney yikwet ntong jaad—rutong ra kwisambin malejan ma Bibil mu mutapu usangareshina ni rutong ra kutulej mutapu tukutwisha kutongijokin nich manangu pa mitu ya milong kanang. (1 Pita 3:15) Ov, mutapu ik tukutwisha kusadin nawamp mitu ya milong yiney?
2. Ov, mutapu ik tukutwisha kusadil mitu ya milong yiney mu mudimu wetu wa kulejan?
2 Sadil Mitu ya Milong mu Mudimu wa Kulejan: Ukutwish kusal usu wa kulam makopi ma manimero ma Chinong cha Kalam makweta mutu wa mulong udia mu mitu ya milong yiney. Anch mwin chikumbu, muntu umekeshina musangar ap mwin kwilej wa Bibil wipula chipul ap walangwish chikangesh chitadina umwing wa mitu ya milong yiney, mwinkisha kopi wa mutu wa mulong ni muleja chakwel wisamba nend mutu wa mulong winou. Anch kiukwetap kopi uchapinau wa gazet ukweta mutu wa mulong winou, pamwing ap ukutwish kubudish mapaj pa kapend ka jw.org.
3. Ov, mutapu ik tukutwisha kwisambin umwing wa mitu ya milong pamwing ni mwin chikumbu?
3 Ov, mutapu ik ukutwisha kwisambin umwing wa mitu ya milong yiney pamwing ni muntu kanang? In kulejan amwing amwita muntu chakwel amutangina mutej nau nich mazu ma piur, ap anch atanga mazu ma Uman. Mutapu winou wa kwisamb kwa antu aad ukutwish kusong mabuj mulong ukumushikij muntu ku kushinshikin yitiyij yetu mu mutapu wakad kumwovish muntu wom ap pakemp.—Kuv. 32:2.
4. Ov, mutapu ik tukutwisha kusadil mitu yidia mu mitu ya milong yiney chakwel twifumba ayinetu?
4 Ifumba Amwiney ni Yifumba Antu Akwau: Piutangina mitu ya milong yiney, shinshikin nawamp mifund, yifanikesh ni sadil yitongijok. Tal mulad wa yom yidiamu. Kupwa pakish kusal chilik chimwing chisu udia mu mudimu wey wa kulejan. (Jinsw. 1:5; 9:9) Nambaz umwing walonda anch, “Kutang mitu ya milong yiney chidi mudi kwilej kudi mbay chibol ‘uwanyidina’—muntu wija chisu chawonsu kamu chom chitentamina cha kulond!”
5. Ov, mutapu ik tukutwisha kuyikwash in kwilej etu a Bibil chakwel irijeka mulong wa mudimu wa kulejan?
5 Ukutwish kusadil kand yilakej yengamidina pa mifund chakwel uyikwasha in kwilej ey a Bibil kwirijek mulong wa mudimu wa kulejan. Tangany jinsangu pamwing, sal anch mwin kwilej asengana chisend cha mwin kulejan. Mu mutapu winou, in kwilej a Bibil akutwish kumekesh mutapu wa kusadil yitiyij yau nich manangu. (Kol. 4:6) Chakin kamu, mitu ya milong yiney yidi yimwing ya ku mitapu yivud yisadinay Yehova chakwel atukwasha “tuwanyish nawamp” mudimu wetu wa kulejan.—2 Tim. 4:5.