Dichap Disu dia Kwilej dia Chinong cha Kalam

GAZET utangina ou udi nimero wa kusambish wa dichap dia kwilej dia Chinong cha Kalam. Tusotil kukurumburil yom yimwing yikwikala mu gazet winou.

Dichap dia kwilej adipalangeshin mulong wa Atuman a Yehova ni in kwilej a Bibil ayila kurutu. Akusambish kudipalangesh kapamp kamwing pa ngond ni dikwikal nich mitu yinying ap yitan ya kwilej. Program wa kushinshikinang mitu yiney ya kwilej amufundin pa chibur cha gazet. Kushalijan nich dichap dia antu awonsu dia Chinong cha Kalam, nimero ni nimero wa dichap dia kwilej kakwikalap nich yipich kushalijan pa chibur, mulong kakezap kwau kumupan mu mujikit wa chingand.

Pa paj wa 2 wa gazet, ukez kutanap diswipish dimwing dia usey nakash dia rutong ra mutu ni mutu wa kwilej ap dilondurish dia mitu ya kwilej pamwing ni mitu yikwau yiwejidinaku. Antakel a Dilejan dia Chinong cha Kalam akez kutaninamu nakash pa chisu chirijekinau minsamb ya usey ya mitu ya kwilej ku chikumangan cha chikumangen.

Ukujingunin anch mitu ya kwilej yidaku yiswimp kupandakanamu muyadinga. Mudi chibudikin, kukwikal chisu chivud cha kushinshikin maverse ma usey pa chisu cha Dilejan dia Chinong cha Kalam. Tukukasikeshin amboku utanga maverse mawonsu majimbwilau pa rubing ni rubing. Ku maverse mamwing majimbwilau afundinaku anch “tang” ni chifanyidin kumatang ni kumarumburil pa chisu cha Dilejan dia Chinong cha Kalam. Anch chisu chidiaku chitwishikin kumatang maverse makwau majimbwilau. Mu mitu ya kwilej yimwing, ukutwish kutanamu maverse mafundilau anch “isikej.” Mulong maverse mudi minam kimisambidinap kapamp kamwing manans majim madia mu paragraf, kakezap chisu chawonsu kumatang ku chikumangan cha chikumangen. Chikwau, maverse “misikejinau” kimakwetap jinsangu jikwau ja usey jiwejidinaku, ap makutwish kwikal ma usey mwi njil kanang ku manans misambidinau. Tukukasikeshin kumashinshikin pa chisu wirijekina mulong wa Dilejan dia Chinong cha Kalam. Pamwing ap ukez kumisambin mu yirumburil yey.

Rapor wa mudimu wa muvu kakusambishap kand kubudikin mu Chinong cha Kalam. Kusambishil mu muvu wa 2008, ukez kusambish kubudikin mwi wenjil wa Mudimu Wetu wa Want ni mu Annuaire. Pakwez, mudi muchilejenau kwiur oku, dichap dia kwilej dikwikal nich mitu yikwau yiwejidinaku. Ap anch yivud yau kakezap kuyilej ku chikumangan cha chikumangen, tukukasikeshin kuyitang nawamp kamu. Niyawiy yikwet yakudia ya muspiritu yidiokila kudiay “Kashalapol ushinshamena ni kubabal.”—Mat. 24:45-47.

Kupwa, dichap dia kwilej ni dia antu awonsu dia Chinong cha Kalam madiap magazet maad mashalijadina. Mawonsu maad chidi Chinong cha Kalam Chilejen Want wa Yehova. Makwet mapaj 2 ni maparagraf ma chilik chimwing marumburila rutong ra Chinong cha Kalam. Mawonsu Maad akez kumatek mu mubombu umwing pa muvu. Ni malejan madiokila mu mawonsu maad makez kwikal mu mutu wa mulong “Ov, Uvurikin?” ukeza kusambish kubudikin mu dichap dia kwilej.

Kusambishin mu muvu wa 1879, kusutil mu yirung ya njit, ya ukash wa kutan nfalang, ni ya kuzengol, Chinong cha Kalam chadandamena kulejan ni kushinshaman uyakin piur pa Want wa Nzamb. Tukat kulembil anch, nich chiyukish cha Yehova, mwamu chikudandamena kand kusal mu dichap diend disu. Ni tukat kumulembil Yehova anch akuyukishany, en in kutang, piukata kusadilany nawamp dichap disu dia kwilej dia Chinong cha Kalam.