“Babal Ku Kusal Mudimu Watambula Mu Mwant”
“Babal ku kusal mudimu watambula mu Mwant chakwel uuwanyish.” —KOL. 4:17.
1, 2. Chisend ik chikwetau in Kristu pantaliken nau antu?
TUKWET chisend chijim pantaliken nau antu atwombilamu. Mipak yikwatinau katat yikez kurumburik mwom ap rufu pa chirung cha “mar makash.” (Kubur. 7:14) Nfund-a-buku wa Jinswir wapepilau wafunda anch: “Yikamunin antu atwadilau ku rufu. Yikola antu asotilau kujip.” Minam madi chakin kamu mazu makash! Anch twakangany kuwanyish chisend cha kuyibabesh antu piur pa kutond kudia kurutu kwau tukutwish kwikal nich chikal cha mash mau. Chakin, verse winou udandamedin kand anch: “Anch ey walond anch: ‘Talany, etu kitwadiap twij chom chinech,’ ov, ndiy ukata kupaka michim kachijip? Ov, ndiy ulamina mupim kachijip kand? Ov, ndiy kakez kamufutilap muntu ni muntu mudia midimu yend?” Chakin kamu, atushalapol a Yehova kakutwishap alond anch ‘kijap’ piur pa chak chiyichingedina antu kurutu oku.—Jinsw. 24:11, 12.
2 Yehova ukwatin mwom nich usey ujim. Uyikasikeshin atushalapol end asala usu wau wawonsu chakwel atwisha kuyipandish antu avud mudi mukutwishau. Kashalapol umwing ni umwing wa Nzamb ufanyidin kulejan uruu upandishina mwom udia mu Dizu dia Nzamb. Mudimu wetu udi mudi wa kalam uyibabeshina antu anch waman anch kudi chak chidia piswimp. Kitusotilap anch mash ma antu adia mu chak cha kusheshik mikal pa mitu yetu. (Ezek. 33:1-7) Chawiy lel, chidi cha usey mudi ik anch tudandamena kusal usu wetu wawonsu chakwel ‘tulejan dizu’!—Tang 2 Timote 4:1, 2, 5.
3. Jinsangu ik jitukeza kwisambin mu mutu winou ni mu yaad yambakedinap?
3 Mutu winou ukwisambin mutapu ukutwisha kupandakan yikangesh ya mujikit wey wa kupandish nich mwom ni mutapu ukutwisha kuyikwash antu avud. Mutu wambakedinap ukez kurumburil mutapu ukutwisha kukudish nkeu ja kulejan nich uyakin wa usey. Mutu wa kasatu wa kwilej ukez kwisambin yibudikin yimwing yikasikeshina yimenau atutwambil a Want a mu mangand mawonsu. Pakwez, kurutu tushinshikin jinsangu jinej, chikwikal chipandikena kuwap tuchirikina chakwel kuman mulong wak yisu yetu yidi ya mar.
Chiburedinau Antu Avud Ruchingej
4, 5. Chom ik chiyishikedina antu, ni mutapu ik usadilau antu avud?
4 Yinship yisadikina mu mangand yilejen anch tushich “kwisudiel kwa mangand” ni anch nsudiel yashej kal piswimp nakash. Antu amen yinship ni mikadil yalonday Yesu ni in kwilejend anch yawiy yikeza kwikal yijingidij ya “machuku ma kwisudiel.” Mu “disambishil dia yakamish” mudi jinjit, kabwakat, kuzal kwa divu, ni yipupu yikwau, yiyikwatin antu. Kujiril chijil, choy ni ngikadil ya kupipesh Nzamb yipalangen ndond yawonsu. Machuku minam ma kwisudiel madi “ma mar makash” ap kudi antu asadila usu wa kushakam kwambatan nich yijil ya Bibil.—Mat. 24:3, 6-8, 12; 2 Tim. 3:1-5.
5 Pakwez, antu avud, kijap kwau chirumburikina yinship yisadikina mu mangand. Mudi chibudikin, antu iyakamishin piur pa diking diau ni dia majuku mau. Rufu ra akatish ap mar makwau mayikwatina antu yikat kuyisansan antu avud. Chiburedinau kwijik chakin kamu mulong wak yom mudi yiney yisadikin ni kwisu kukudiokala mutapu wa kuyipwish, antu inay kakwetap kwa kuchingejin.—Ef. 2:12.
6. Ov, mulong wak “Babilon Mujim” katwishinap kuyikwash in kwilej end?
6 “Babilon Mujim,” want wa mangand wa relijon wa makasu, uyitudishin pakemp antu. Chinyim ni chinech, kusutil ku “maruvu ma kusotan kwend,” wayivundangeshin kal antu avud piur pa mutapu ukutwishau kwikal nich urund nend Nzamb. Chikwau, kusutil ku kusal mudi mband mwin kusochik, relijon wa makasu washikena mu kuyirumbul ni kuyiyikel “ant a pansh,” nich kusadil malejan ma makasu ni yom ya aspiritu ayimp mulong wa kuyandjik antu mu kanvundangesh ka kupwitijan nau anyikel au. Relijon wa makasu wikadil kal nich usu ni chipwichik, pakwez pa chisu chawiy chimwing, wadjibwila kal kulemp uyakin wa relijon.—Kubur. 17:1, 2, 5; 18:23.
7. Ruchingej ik riyichingedina antu avud kurutu oku, pakwez mutapu ik ukutwishau kuyikwash antu amwing?
7 Yesu walejana anch antu avud ayil mwi njil yajimbulau anch njil yibwambumukina yitwadila ku kusheshik. (Mat. 7:13, 14) Antu amwing adi mwi njil yiney mulong atonda ayinau kulik yilejenay Bibil, pakwez akwau avud adiamu mulong ayidimba kwau, ap akwachikin mu mididim, pantaliken nich yiyitinau chakin kamu kudi Yehova. Pamwing ap amwing au akez kuswimp mashakamin mau ang ayinkishin yiyingishin yakin ya Bibil chakwel aswimpa. Pakwez antu ashicha mu Babilon Mujim ni adandamedina kulik yijil ya Bibil kakezap kuyikamunin pa “mar makash mapandakena.”—Kubur. 7:14.
Dandamenay Kulejan ‘Wakad Kulik’
8, 9. Mutapu ik wasalau in Kristu a mu chitot cha kusambish payipompatau, ni mulong wak?
8 Yesu walonda anch in kwilejend akulejan rusangu ruwamp ra Want ni kuyikadish in kwilejend. (Mat. 28:19, 20) Chawiy lel, in Kristu akin amening chisu chawonsu anch kusal mudimu wa kulejan udi mulong wa kushinshaman kudi Nzamb ni chidi chom chitinau chakusambish piur pa ritiy rau. Chawiy lel, in kwilej a Yesu a kusambish adandamena kwikalap nchik kuyizengol. Ikamena padiay Yehova chakwel ayinkish usu, alembila anch ndiy ukez kuyitwishish adandamen “[kulond] dizu [diend] nich kujijaman kwawonsu.” Mu kuyakul, Yehova wayizwisha nich spiritu utumbila, ni kujijaman alonda dizu dia Nzamb.—Midimu 4:18, 29, 31.
9 Chisu rupompat rasansan nakash, ov, in kwilej a Yesu aziya mu mupak wau wa kulejan rusangu ruwamp? Bwat kwau. Pajimanau mulong wa kulejan kwa atwimbuy, antakel a relijon wa in Yuda ayikwata atwimbuy, ayifunyina ni kuyikwatish wom, ni ayibul mishakwat. Chikwau kand, atwimbuy ‘kalikap kulejan ni kurumburil rusangu ruwamp ra Yesu mudi Kristu.’ amana patok anch chadinga chiyifanyidin “kumuziyil Nzamb chipandakena antu.”—Midimu 5:28, 29, 40-42.
10. Yikokujol ik yirilau nich in Kristu ilel, ni kuding chibudikin ik cha mikadil yau yiwamp?
10 Atushalapol avud ilel a Nzamb kandikal ajijamanap yibul ap rukan mulong wa mijikit yau ya kulejan. Pakwez, in Kristu awonsu aril nich yipakiu ni yoziu ya mitapu ni mitapu. Kom key kafumbau kal nich Bibil kakutwish, mudi chilakej, kukwit usal chom kanang cha ngikadil chakadiau antu avud kukat ap chom chikutwisha kukwikadish ushalijadina ni antu akwau. Ambay, arund a ku shikol, ap ansulangen akutwish akutongin anch usupin mulong wengamishin mipak yey pa yijil ya Bibil. Chikalap nchik mwamu, kwakul kwau kuyimp kufanyidinap kwakuchirish kwinyim. Mangand madi mu mididim ya muspiritu, pakwez in Kristu afanyidin “[kumunyik] mudi kutok.” (Filp. 2:15) Pamwing in kutal amwing akweta michim yakin akez kuman midimu yey yiwamp ni akez kumushiman Yehova.—Tang Mateu 5:16.
11. (a) Mutapu ik usadilingau antu amwing pantaliken nich mudimu wa kulejan? (b) Rupompat ra mutapu ik rarishay nich Paul, ni mutapu ik wasalay?
11 Kukapuk kuswirikedin chakwel kudandamen kulejan uruu wa Want. Antu amwing, ap anamakwetu, akutwish akuswingish ap mwi njil yimwing akusot kukuziyish. (Mat. 10:36) Kambuy Paul amubula ku mujimbu tupamp tuvud mulong ndiy wasala nich kushinshaman mujikit wend. Tal mutapu wasalay pantaliken nich rupompat riner, ndiy wafunda anch: “Anch twasambilap nchik kuman mar ni kutukwatish usany ku Filipoi, mudi chiwijany kal, twajijamana mwi Nzamb mu kurish kuvud.” (1 Tes. 2:2) Chakin kamu chadinga chikash kudiay Paul kujijaman kulejan rusangu ruwamp kupwa kwa kumukwat, amudjol maswin, amukupul nfimbu, ni kupwa kumudjibwil mu rukan. (Midimu 16:19-24) Chom ik chamwinkisha mushiku wa kudandamen? Maku mend makash ma kusot ching kuwanyish mudimu wend wa kulejan wamwinkishau kudi Nzamb.—1 Kor. 9:16.
12, 13. Yikokujol ik yirilau nich antu amwing, ni mutapu ik usadilau chakwel ayipandakan?
12 Chikutwish kand kwikal chikash anch tulama mushiku wetu mu materitwar mwakadiau chisu chivud antu kwikal kwol kwau ap mudiau antu akemp itiyijina uruu wa Want. Chom ik tukutwisha kusal mu mikadil mudi yiney? Tukutwish kuman anch chidi cha usey tuwejinaku mushiku mu kuyilej antu mu mutapu wa kukashimwish. Tukutwish kand pamwing kutenchik program wetu ap kukungin usu wetu pa kulejan mu miab mutukutwisha kuyitan antu.—Isikej Yohan 4:7-15; Midimu 16:13; 17:17.
13 Yikokujol yikwau yirishinau nich antu akwau yidi upal ni mayej ma ku mujimbu, yikutwisha kuyikangesh kusal yikutwisha kusal mu mudimu wa kulejan. Anch mwamu chidia ku mutambu wey, kangal waziy. Yehova wij nawamp win kamu mipak yey ni usangaredin yiutwishina kusal. (Tang 2 Korint 8:12.) Mulad win wawonsu wa rupompat ukutwisha kura nich—kuzengol, kuziy, ap mayej ku mujimbu—sal anch mikadil yey yiney yikutwishish kuyilej antu akwau rusangu ruwamp.—Jinsw. 3:27; isikej nich Marko 12:41-44.
‘Dandamen Kubabel Mudimu Wey’
14. Kambuy Paul wayishila ambay nend in Kristu chilakej ik, ni chiyul ik chaletay?
14 Kambuy Paul wakwata mudimu wend nich usey ujim, ni wayikasikesha ambay nend akaritiy asala chilik chimwing. (Midimu 20:20, 21; 1 Kor. 11:1) Muntu umwing wakasikeshay Paul pakampwil mu chitot cha kusambish wadinga mwin Kristu upidilau anch Akipus. Mu mukand wend wayifundilay in Kolosay, Paul wafunda anch: “Lond kudi Akipus anch: Babal ku kusal mudimu wantambula mu Mwant chakwel uuwanyish.” (Kol. 4:17) Kitwijap anch Akipus wadinga nany ap mikadil yend yadinga nchik, pakwez chimeken patok anch ndiy witiyija mudimu. Anch udi mwin Kristu wipana kal, niyey witiyija mudimu. Ov, udandamedin kubabel mudimu chakwel uuwanyish?
15. Mu kwipan kwa Ukristu mudi ik kand, ni kulangwishin yipul ik?
15 Kurutu kwa kutubabatish, twamwinkisha Yehova mwom wetu kusutil mu malembil. Chom chinech chirumburikin anch twakwata mupak wa kusal rusot rend. Chawiy lel tukusal nawamp anch twiyipul anch, ‘Ov, kusal rusot ra Nzamb kudi chakin kamu chom chijim nakash mu mwom wam?’ Tukutwish kwikal nich yisend kushalijan yituchingejidinay Yehova anch tuyisal—mudi kukimbin dijuku dietu yakudia. (1 Tim. 5:8) Pakwez, mutapu ik tukata kusadil chisu chetu ni usu wetu yishadilaku? Ov, chom ik chidia cha kusambish mu mwom wetu?—Tang 2 Korint 5:14, 15.
16, 17. Dilau ik dikutwisha kushinshikin ansand in Kristu ap in akweta yisend yikemp?
16 Ov, udi mwin Kristu nsand wipanina kal wapwishina kal ap udia piswimp ni kupwish shikol? Chakin kamu, kandikal wikal nich yisend yijim ya dijuku. Ov, mutapu ik usotila kusadil mwom wey? Mipak ik yikeza kukutwishish nawamp kuwanyish kushilamu kwey kusal rusot ra Yehova? Ansand avud atenchika milong yau chakwel asala uchibol, ni ataninamu kal musangar ujim ni mazang mudi chibudikin.—Kus. 110:3; Mul. 12:1.
17 Pamwing ap udi nsand wapamina kal. Usadiling mudimu wa ku mujimbu wa chisu chawonsu ni ukwet yisend yikemp ching kusu ya kwibangin amwiney. Pakad kwidjidjek usangaredin kusal mijikit ya mu chikumangen mudi mukutwishishina program wey. Ov, ukutwish pamwing ap kwikal nich musangar upandakenamu nakash? Ov, watongijokinap kal mutapu wa kutanduril kusal mudimu wey? (Kus. 34:8; Jinsw. 10:22) Mu materitwar mamwing, kuchidi kuswir kwa kusal mudimu ujim chakwel kuyishiken antu in awonsu nich uyakin wa uruw wa mwom. Ov, ukutwish kutenchik mwom wey, pamwing ap mulong wa kusadil mu teritwar muswiridinau nakash atutwambil a Want?—Tang 1 Timote 6:6-8.
18. Yitenchik ik yasala ambay amwing a uruw, ni kwadinga yibudikin ik?
18 Shinshikin chilakej cha Kevin ni Elena, a mu États-Unis.a Mudi muchadinga chiwamp kudi ansand adiokila kamu pa kwatijan mu teritwar wau, ova anch chiyifanyidin alanda chikumbu. Awonsu adinga asadil mudimu wa ku mujimbu ni atwisha kwikal nich mwom uwamp. Pakwez, adinga nich chisu chikemp cha kusal midimu ya ku chikumbu ni mudimu wa chingand mulong wa program wa midimu yau ya ku mujimbu. Ajingunina anch ading asadidil piswimp chisu chau chawonsu ni usu wau mulong wak mapit mau. Pakwez, pashinshikinau mwom upipela wau ambay a uruw amwing ayibol in musangar, Kevin ni Elena akwata mupak wa kukarumun diloz dia mwom wau. Kupwa kwa kusot mu malembil umutakel wa Yehova, awiy alandisha chikumbu ni aya kushakam mu chikumbu cha antu avud. Elena wakepisha asaa adingay ni kusal mudimu wa ku mujimbu ni wikala chibol. Yom yamanay mukajend yamukasikesha, Kevin walika mudimu wend wa ku mujimbu wa chisu chawonsu ni wasambisha uchibol. Kwasuta chisu chikemp, ashemunikina mwi ngand yimwing ya ku Amerik wa Kurul akasadila kwi ndond kwadinga kuswirikedinau nakash atutwambil a Want. Kevin ulondil anch: “Twadinga ambay a uruw akweta musangar, pakwez patwadinga ni kusal mulong wa jintong ja muspiritu, musangar wetu wapandakana nakash.”—Tang Mateu 6:19-22.
19, 20. Ov, mulong wak mudimu wa kulejan rusangu ruwamp wawiy mudimu upandakenamu ilel?
19 Kulejan rusangu ruwamp udi mudimu upandakenamu nakash usadikina pansh ilel. (Kubur. 14:6, 7) Uwejidin ku kutumbish dijin dia Yehova. (Mat. 6:9) Uruu wa Bibil uwapishin mwom wa tunan twa antu avud awitiyijina pa muvu ni muvu, ni ukutwish kuyitwal ku kupand. Pakwez, kambuy Paul wipula anch: “akutesh nchik wakad mulej?” (Rom. 10:14, 15) Mutapu ik lel? Ov, mulong wak ulikina kukwat mupak wa kusal yawonsu ukutwisha chakwel uwanyish mudimu wey?
20 Mutapu ukwau ukutwisha kuyikwashin antu atesha chirumburikina yisu yiney yikash ni yibudikin ya mipak yikwatinau udi kusutil ku kutenchik nkeu jey ja kulejan nich. Mutu wambakedinap ou ukukulej mutapu ukutwisha kusal mwamu.
[Mazu madia kwishin kwa paj]
a Kimawiyap majin mau makin.
Mutapu Ik Ukwakula?
• Chisend ik chikwetau in Kristu pantaliken nau antu?
• Mutapu ik tufanyidina kura nich yikangesh ya mudimu wetu wa kulejan?
• Mutapu ik tukuwanyisha mudimu utwitiyija?
[Chipich chidia pa paj wa 5]
Kukapuk kuswirikedin chakwel kulejan pa chisu cha rupompat
[Chipich chidia pa paj wa 7]
Ov, chom ik ukutwisha kusal anch ulejen mu materitwar mwakadiau antu kwikal kwol kwau?