Babel ‘Nkeu Yey Ya Kulejan Nich’
“Lejan dizu, . . . yileja antu, yikanda, yidimwisha; kangal wakangan mu kushimpish muchim ni kulejan.”—2 TIM. 4:2.
1. Yesu wayinkisha in kwilejend mbil ik, ni chilakej ik chashay?
YIKALAP nchik midimu yishimokishina ya kwokan yasalay Yesu pasalay mudimu wend pansh, wadinga wijiken chakusambish, kichadingap anch ngang ap mwin kusal yilay, pakwez wijikana mudi mulej. (Marko 12:19; 13:1) Kulejan rusangu ruwamp ra Want wa Nzamb wadinga mudimu wa kusambish wa Yesu, ni mwamu kand chidinga kudi in kwilejend ilel. In Kristu akwet mujikit wa kudandamen nich mudimu wa kuyikadish in kwilej kusutil ku kuyilej antu chakwel asadila yom yawonsu yalejanay Yesu.—Mat. 28:19, 20.
2. Chom ik tuswiridina kusal chakwel tuwanyish mudimu wetu wa kulejan?
2 Chakwel tuwanyish mujikit wetu wa kuyikadish in kwilej, tusotining chisu chawonsu mutapu wa kutenchik nkeu yetu ya kulejan nich. Kambuy Paul wakasikeshina usey ujim wa nkeu yiney pamufundinay Timote mbay nend wadingay ni kulejan nend. Walonda anch: “Babal ey amwiney ni ku kulejan kwey, ipanaku amwiney wa kabuj; mu kusal yiney mwawiy muukez kwipandishil ey amwiney ni awonsu akukutesha ey.” (1 Tim. 4:16) Mulad wa malejan madingay nich Paul mu manangu kimadingap kwau kupan ronganyin ra chamwamu kusu. In Kristu asongina mabuj ashikining ku michim ya antu ni kuyikasikesh chakwel akarumuka mu mwom wau. Udi ukaliweny. Ov, mutapu ik lel tukutwisha kukudish “kushimpish muchim ni kulejan” pituyilejina antu indjing rusangu ruwamp ra Want wa Nzamb?—2 Tim. 4:2.
Kukudish ‘Nkeu ja Kulejan Nich’
3, 4. (a) Ov, mutapu ik tukutwisha kukudish ‘nkeu ja kulejan nich’? (b) Ov, Shikol ya Mudimu wa Uteokras yitukwashining nchik kwikal alej ayifuvu?
3 Dinguril umwing urumburil dizu “nkeu” mudi “ukaliweny wakiningau kusutil ku kwilej, ku kusal, ap ku kushinshikin.” Tuswiridin kuta muchim ku yom yiney yawonsu yisatu chakwel twikala alej ayifuvu a rusangu ruwamp. Tukutwish kwov nawamp kurumburik kwa mutu wa mulong ching kusu kusutil ku kwilejau ni kwipan mu malembil nakash. (Tang Kuseng 119:27, 34.) Kuyishinshikin atushalapol asongina mabuj palejenau kukutukwash twileja nkeu jau ni tuyimburij. Ni kusal usu chisu ni chisu wa kusadil yitwilejina kukutukwash kuwapish ukaliweny wetu.—Luka 6:40; 1 Tim. 4:13-15.
4 Yehova udi Mulej wetu Mujim. Kusutil ku chikunku chimekena cha dirijek diend, uyinkishin atushalapol end adia pansh umutakel piur pa mutapu ufanyidinau kuwanyish mudimu wau wa kulejan. (Is. 30:20, 21) Pa chinech, chikumangen ni chikumangen chisadining rubing ni rubing Shikol ya Mudimu wa Uteokras, yatenchikinau mulong wa kuyikwash awonsu ifundishina ku shikol yiney kwikal atutwambil ayifuvu a Want wa Nzamb. Buku mujim wa shikol yiney udi Bibil. Dizu diapepilau spiritu dia Yehova ditulejin yitufanyidina kulejan. Chikwau, dilejen milad ya kulejan yidia yiwamp ni yifanyidina. Chisu ni chisu Shikol ya Mudimu wa Uteokras yituvurishining anch tukez kwikal in nkeu nakash mudi alej anch twengamishin malejan metu pa Dizu dia Nzamb, kusadil yipul nawamp, kulejan mu mutapu uswapela, ni kuyisanger nakash antu akwau. El tushinshikinany manans minam dimwing ni dimwing. Kupwa tukwisambin mutapu wa kushik ku muchim wa mwin kwilej.
Engamishin Malejan Mey pa Dizu dia Nzamb
5. Pisu pafanyidina kwengamidin malejan metu, ni mulong wak?
5 Yesu, mulej mujim uyipandakenamu alej a chiuntu awonsu, wengamishina malejan mend pa Mifund ya Bibil. (Mat. 21:13; Yohan 6:45; 8:17) Ndiy kalondinap mu dijin diend, pakwez mu dijin dia Wamutuma. (Yohan 7:16-18) Chawiy chilakej tulondwila. Chawiy lel, chawonsu tukulonda chikala mu mujikit wa ku chikumbu ni chikumbu ap ku malejan ma Bibil chifanyidin kwasin pa ulabu wa Dizu dia Nzamb. (2 Tim. 3:16, 17) Kwikil kuvul kwa manangu ma yitongijok kutukweta kukutwisha kwilikan nich usey ni usu wa Mifund yapepilau spiritu. Bibil ukwet ulabu. Dinans din diawonsu ditukutwisha kusal usu chakwel kumukwash mwin kwilej aditesha nawamp, mulad upandakenamu kuwap utukutwisha kusadil udi kumwit atanga yilondila Mifund piur pa dinans dined.—Tang Hebreu 4:12.
6. Mutapu ik ukwijikay mulej anch mwin kwilej uteshin kurumburik kwa yom yilejinay?
6 Chakin, chinech chirumburikinap anch, mulej mwin Kristu kafanyidina wirijek mulong wa dilejan dia Bibil. Chinyim ni chinech, chifanyidin kusambel kutongijokin nawamp mulong wa kutond maverse ik makezay mulej ap mwin kwilej kutang mu Bibil pa chisu cha kwilej. Chisu chivud, chiwapining kutang maverse makasikeshidina yitiyij yetu. Chidi kand cha usey kumukwash mwin kwilej atesha kurumburik kwa verse ni verse utanginay.—1 Kor. 14:8, 9.
Sadil Yipul Yiwamp
7. Ov, mulong wak kusadilang yipul uding mulad uwamp wa kulejan nich?
7 Kusadilang kuwamp yipul kulangwishining yitongijok ni kumukwashining mulej ashika ku muchim wa mwin kwilej. Chawiy, pa ndond pa kumurumburil mwin kwilej wey maverse, mwita akurumburilam. Yisu yimwing kukutwish kwikal kuswiriken kwa chipul chindjing ap yipul yikwau chakwel umukwasha mwin kwilej wey ashikena ku kutesh nawamp. Anch wamwandjik mwin kwilej mwin njil ya kwilej mu mutapu winou, chakin kamu, umukwashin kichidiap kusu chakwel atesha mayingishin madiaku ku mupak wawonsu pakwez kand kusal anch mupak winou umwitiyikisha yilejinay.—Mat. 17:24-26; Luka 10:36, 37.
8. Mutapu ik tukutwisha kujingunin yidia mu muchim wa mwin kwilej?
8 Mulad wa kwilej usadidinau mu mikand yetu udi wa yipul ni yakul. Pakad kwidjidjek, antu avud wilejina nau Bibil akutwish kwakul swa ku yipul yifundilau, nich kusadil yom yisambidinau mu maparagraf mambatena nich yipul. Chikwau, mulej mwin kujingunin ka kwimenap kusu pa yakul yiwamp. Chilakej, mwin kwilej ukutwish kurumburil nawamp yilondilay Bibil piur pa masandj. (1 Kor. 6:18) Pakwez, yipul ya manangu piur pa yitonginay, yikutwish kulejan chakin kamu yitonginay mwin kwilej piur pa yom yilejinay. Chawiy lel mulej ukutwish wipul anch: “Ov, mulong wak Bibil ufishin nich kulalijan kwa ikundj ni mband akad kwatijan? Utonginap nchik piur pa chijil chinech cha Nzamb? Ov, utongin anch kudi kutaninamu kanang kusutil ku kushakam kwambatan nich yijil ya ngikadil ya Nzamb?” Yakul ku yipul yiney yikutwish kujingunish yidia mu muchim wa mwin kwilej.—Tang Mateu 16:13-17.
Swapesh Malejan
9. Chom ik tufanyidina kulam mu manangu pitulejena rusangu ra Bibil?
9 Uyakin uvud udia mu Dizu dia Nzamb awinau uding uswapela. Chawiy lel, chikutwish kwikal anch antu twilejina nau Bibil ayivundangesha manangu nich malejan ma relijon wa makasu. Mudimu wetu mudi alej udi wa kumusal Bibil ikal uswapela kutesh. Alej ayifuvu alejeninga malejan mu mutapu uswapela, wovikena zwang, ni wakin. Anch twalondul umutakel winou, tukezap kusal uyakin wikala ukasikena kupandakanamu muufanyidina kwikal. Ipuk tuyom tukemp-tukemp twa chamwamu. Kwikil kuswir kwa kurumburil kachom ni kachom tutangina mu Bibil. Asin ching kusu pa yom ya usey nakash mulong wa kutokish dinans wilejinanya. Mwin kwilej ukusanger uyakin wa Bibil payilay kurutu mu kutesh kwend.—Heb. 5:13, 14.
10. Yom ik yikutwisha kutwijikish uvud wa malejan mitufanyidina kwilej pa dilejan dia Bibil?
10 Uvud ik wa malejan tufanyidina kwilej pa dilejan dimwing? Chifanyidin kwikal nich njingunin pa mulong winou. Ukaliweny ni mikadil ya mwin kwilej ni mulej yishalijadin, pakwez tufanyidin chisu chawonsu kwijik anch diloz dietu mudi alej didi dia kumukwash mwin kwilej kutung ritiy rikash. Chawiy tufanyidina kumushil chisu chijim cha kutang, kutesh, ni kwitiyij uyakin udia mu Dizu dia Nzamb. Tukutwishap kwilej yom yivud yikutwishay kulik kutesh. Pa chisu chawiy chimwing, tukudandamen nich kwilej. Anch mwin kwilej wetu watesh kurumburik kwa dinans dimwing, tukuya chad ku diambakedinap.—Kol. 2:6, 7.
11. Dilejan ik tukutwisha kwilejin kudiay kambuy Paul piur pa kulejan?
11 Kambuy Paul waswapesha uruu wa rusangu ruwamp pisambay ni antu asu. Ap anch ndiy wileja nakash, wipuka kusadil mazu makash. (Tang 1 Korint 2:1, 2.) Kuswapal kwa uyakin wa Bibil kuyipwitin ni kuyisangaresh antu akashinsh. Kwikil uswiridina kwilej shikol jijim nakash chakwel autesha.—Mat. 11:25; Midimu 4:13; 1 Kor. 1:26, 27.
Yikwasha in Kwilej Asanger Yilejinau
12, 13. Chom ik chikutwisha kumukwash mwin kwilej asala kwambatan nich yom yilejinay? Let chilakej.
12 Chakwel kusong mabuj, malejan metu mafanyidin kushik ku muchim wa mwin kwilej. Mwin kwilej ufanyidin kutesh mutapu usadila malejan padi ndiy amwinend, mutapu mamukwashina, ni mutapu mwom wend ukuwap anch walondul umutakel wa Bibil.—Is. 48:17, 18.
13 Chilakej, tukutwish kushinshikin Hebreu 10:24, 25, uyikasikeshina in Kristu kukumangan pamwing ni ambay nau akaritiy mulong wa kutambul dikasikesh dia mu Bibil ni urund wa rukat. Anch mwin kwilej keziningap ku yikumangan ya chikumangen, tufanyidin kumurumburil mu wiswimp mutapu uyitakedilingau ni yom yitukwileja ku yikumangen. Tukutwish kumulej anch yikumangan ya chikumangen yidi chikunku cha difukwil dietu ni kumulej anch yitukwashining muntu ni muntu ipend. Kupwa, tukutwish kumwit eza kukumangan. Kwikasikesh kwend mulong wa kwitiyij yijil ya Bibil kufanyidin kwikal rusot rend ra kumuziyil Yehova, kangal mulong wa kusot kumusangaresh muntu wilejinay nend.—Gal. 6:4, 5.
14, 15. (a) Chom ik chikutwishay kwilej mwin kwilej Bibil piur pa Yehova? (b) Ov, mutapu ik kwijik untu wa Nzamb kukumukwash mwin kwilej Bibil?
14 Ukwash wa usey ukatau in kwilej kutanin mu kwilej Bibil ni kusadil yijil yau udi anch ashikedin ku kumwijik ni ku kumukat Yehova mudi muntu. (Is. 42:8) Kadingap ching kusu Tatuku mukarukat, Sakatang ni Nsalej wa mangand mawonsu pakwez wijikishining kand untu ni ukaliweny wend kudi antu amukatina ni amusadidila. (Tang Kubudik 34:6, 7.) Padingay Moses piswimp ni kuutakel muchid wa Isarel kudiokal mu usuk wa Idjibit, Yehova wiyijikisha amwinend nich mazu manam: “Am nidi mudi nidia.” (Kub. 3:13-15) Chom chinech chalejana anch Yehova ukutwish kwikal chawonsu chisotilay kwikal chakwel awanyisha jintong jend pantaliken nau antwend atonday. Chawiy in Isarel ashikena ku kumwijik Yehova mudi Mupandish, Mwin Kurish Njit, Mukol, ni Mwin Kuwanyish kushilamu ni wayikwasha mu mitapu yikwau.—Kub. 15:2, 3; 16:2-5; Yosh. 23:14.
15 In kwilej etu kakutwishap pamwing ap kuman ukwash wa Yehova mu mwom wau mu chilay mudi muchadinga kudiay Moses. Chikalap nchik mwamu, payilau in kwilej etu ni kukul mu ritiy ni kusanger yilejinau ni pasambishinau kuyisadil, pakad kwidjidjek akez kuman kuswir kwa kumuchingejin Yehova chakwel ayinkisha kukapuk, manangu, ni umutakel. Anch asal mwamu, niyawiy akez kumwijik Yehova mudi mwin manangu ni Mwin Kuyulan wa kuchingejin, Mwin Kuchidij ni Mwin Kuwanish nich muchim wa kupan maswir mau mawonsu.—Kus. 55:22; 63:7; Jinsw. 3:5, 6.
Mekesh Rukat Ridimukina
16. Ov, mulong wak nkeu ya chivadik yidiap ya usey ujim mu kwikal mulej chifuvu?
16 Anch wovil anch ukwetap nkeu ja kulejan nich mudi muusotila kwikal, ikasikesha. Yehova ni Yesu imanyidin program wa malejan malejenau mu mangand mawonsu ilel. (Midimu 1:7, 8; Kubur. 14:6) Akutwish kuyukish usu wetu mu chilik chakwel anch mazu metu mikal nich usu uswirikedina padiay muntu ukweta muchim utentamina. (Yohan 6:44) Rukat rakin ra mulej mulong wa mwin kwilej wend rikutwish kusal yivud kupandakanamu kuburen kwawonsu kwa ukaliweny wa chivadik. Kambuy Paul walejana anch watesha usey ujim wa kuyikat antu adingay ni kulej.—Tang 1 Tesalonik 2:7, 8.
17. Mutapu ik tukutwisha kumubangin chakin mwin kwilej Bibil umwing ni umwing?
17 Chawiy chimwing, tukutwish kuyimekeshin rukat rakin in kwilej Bibil umwing ni umwing kusutil ku kusadil chisu mulong wa kuyijik. Pitwilejina nau yijil ya Bibil, chakin kamu tukez kushiken ku kwijik mikadil yend. Tukutwish kushinshikin anch ushich chakin kamu kwambatan nich manans mamwing milejinay kal madia mu Bibil. Pakwez uchiswiridin kutenchik yom ku mitambu yikwau. Kusutil ku kumukwash mwin kwilej amana mutapu risadila rusangu rilejinay pa yisu ya kwilej Bibil kudi ndiy, tukutwish nich rukat kumukwash ikala mwin kwilej wakin wa Kristu.
18. Ov, mulong wak chidi cha usey kulembil pamwing ni mulong wa mwin kwilej?
18 Chijim chipandakenamu, tukutwish kulembil pamwing ni mwin kwilej wetu ni mulong wa mwin kwilej wetu. Ndiy ufanyidin kwijik nawamp anch rutong retu ridi ra kumukwash amwijik Sakatang wend nakash-nakash muchifanyidina, Kumushejin piswimp nakash, ni kutaninamu mu umutakel Wend. (Tang Kuseng 25:4, 5.) Pitukata kulembil chakwel Yehova ayukisha usu wa mwin kwilej chakwel asadila yilejinay, mwin kwilej ukuman usey ujim wa kwikal mwin “kusadil dizu.” (Yak. 1:22) Ni pateshinay mwin kwilej malembil metu makin, niyend ukwilej mutapu wa kulembil. Udi musangar mudi ik wa kuyikwash in kwilej Bibil akudisha urund wa ayinau ni Yehova!
19. Chom ik tukeza kushinshikin mu mutu wa mulong wambakedinap ou?
19 Chikasikeshining kwijik anch Atuman mamiliyon musamban ni chikunku ni kusut mu mangand mawonsu akwatiken nakash nich kukudish ‘nkeu ja kulejan nich,’ nich rutong ra kuyikwash antu akweta michim yitentamina ashinshikin yom yawonsu yalejanay Yesu. Yibudikin ik yidiaku mu mujikit wetu wa kulejan? Mutu wa mulong wambakedinap ou ukez kwakul ku chipul chinech.
Ov, Uvurikin?
• Ov, mulong wak uswiridinau in Kristu kukudish ‘nkeu ja kulejan nich’?
• Kusadil milad ik kukutwisha kwikadish malejan metu masongina mabuj?
• Chom ik chikutwisha kusadik mulong wa kuburen ukaliweny ufanyidina wa kulejan ku mutambu wetu?
[Chipich chidia pa paj wa 9]
Ov, wafundishin kal dijin ku Shikol ya Mudimu wa Uteokras?
[Chipich chidia pa paj wa 10]
Ov, mulong wak chidi cha usey umwita mwin kwilej wey atanga mu Bibil?
[Chipich chidia pa paj wa 12]
Lembil pamwing ni mulong wa mwin kwilej wey