Kulejan Kutukwashin Kudandamen
1 Dizu dia Nzamb ditukasikeshin ‘kubambil nich kudandamen ni kushik ku chilik chatutekilau kurutu kwetu.’ (Heb. 12:1) Mud kamu muswiridinay mwin kubambel kudandamen chakwel kuwin muchifanyidina, komb ni yetu tuswiridin kudandamen chakwel kutambul masamun ma mwom wa chikupu. (Heb. 10:36) Mudimu wa Ukristu ukutwish kutukwash mutapu ik kudandamen mu kushinshaman djat ni kwisudiel?—Mat. 24:13.
2 Atukasikeshin Muspiritu: Kulejan kwetu kushilamu kupandakena kuwap kudia mu Bibil kwa ngand yisu yitentamina kutukwashin kulam ruchingej retu rikash. (1 Tes. 5:8) Chisu twipanina pakad kujing mu mudimu wa chingand, tukwet mutapu wa kwijikish uyakin twilejina mu Bibil. Tukwet mutapu wa kuchidij ritiy retu, ritukwashina kwikasikesh muspiritu.
3 Chakwel kuyifundish antu akwau muchifanyidina, tufanyidin bil ayinetu kwov kurumburik kwa uyakin wa Bibil. Tuwapidil kukimbijol ni kutongijokin pa malejan. Usu wa kashinsh tusadila ukat kujimbish ronganyin retu, kukasikesh ritiy retu, ni kutukasikesh kand muspiritu. (Jinsw. 2:3-5) Chawiy lel, pitusotila kuyikwash akwetu, twikasikeshin ayinetu.—1 Tim. 4:15, 16.
4 Kwipan kwa mushiku mu mudimu chidi chikunku cha “yom ya njit yawonsu ya Nzamb,” yituswiridina chakwel kwiman dang kurutu kwa Djabul nau ademon. (Ef. 6:10-13, 15) Kwikal akwatikena mu mudimu utumbila kutukwashin kulam manangu metu mimedina pa yom yitungina ni kwipuk kwikal ijondishinau ku mangand ma Satan. (Kol. 3:2) Pituyifundishina akwetu jinjil ja Yehova, tudandamedin kwivurish maswir metu ayinetu ma kulam chaku chiwamp.—1 Pi. 2:12.
5 Akasikeshinau kud Nzamb: Kupwa, kwipan kwetu mu mudimu wa kulejan rusangu ruwamp kutufundishin kumuchingejin Yehova. (2 Kor. 4:1, 7) Chidi chiyukish mud ik! Kukudish kwetu ruchingej mud riner kutuwanyishin chidiap kusu mulong wa kuwanyish mudimu wetu pakwez kand mulong wa kupwish mikadil yin yawonsu yikutwisha kutushiken mu mwom. (Filp. 4:11-13) Chakin, kwilej kwengamin kamu padiay Yehova chidi chom cha usey nakash chakwel kudandamen. (Kus. 55:22) Kulejan kutukwashining kudandamen mu mitapu yivud.