Kulejan Kutukasikeshining Muspiritu

1. Yiyukish ik tukata kutanin mu mudimu wa kulejan?

¹ Kwikalang akwatikena nakash mu mudimu wa kulejan kukutwish kwatukasikesh muspiritu ni kutusangareshining nakash. Mwawiy kamu, chakusambish tukat kusalang mudimu winou mulong wa kumusangaresh Yehova. Pakwez, anch twaziyil kwimbil ya ‘kulejan dizu,’ tukutambul kamu yiyukish ya Yehova ni tukutaninamu kand mu mitapu yikwau. (2 Tim. 4:2; Isay 48:17, 18) Ov, mutapu ik mukutwisha mudimu wa kulejan kutukasikesh ni kutusangaresh?

2. Mudimu wa kulejan ukat kutukasikeshang mu mitapu ik?

² Atukasikeshin ni Kutuyukish: Kulejan kutukasikeshining tukungamena pa yiyukish ya Want pakad kutal ching pa mar ma katat. (2 Kor. 4:18) Kurumburil malejan ma mu Bibil kukasikeshining ritiy retu mu yakushilamu ya Yehova ni kutukasikeshining tusangera uyakin. (Isay 65:13, 14) Mudi mutuyikwashina akwetu kupam muspiritu chakwel alika kwikal a “mangand,” tukasikeshining mupak wetu wa kwaurik ku mangand.—Yoh. 17:14, 16; Rome 12:2.

3. Mutapu ik utukwashining mudimu wetu wakulejan kukudish ngikadil ya win Kristu?

³ Kusalang mudimu wa kulejan kutukwashining tukudisha ngikadil ya win Kristu. Chilakej, pitusadilinga usu wa kwikal “yom yawonsu kudi antu awonsu” kutukwashining twikala ikepishina nakash. (1 Kor. 9:19-23) Mudi mutukata kuyilejang antu akata “kutambitamb ni kupalangan mudi amikoku akad kafung,” twilejining mutapu wa kuyanaken. (Mat. 9:36) Tukwilej kand mutapu wa kujijaman ni kudandamen kwikalap nchik kulik kusanger ap rupompat. Musangar wetu ukudandamen anch twasadin mwom wetu mulong wa kuyikwash akwetu.—Mud. 20:35.

4. Ov, mutapu ik wiyovila piur pa mudimu wey wa kulejan?

⁴ Kuyuk mudi ik, kwa kusal mudimu umutumbishina Muntu umwing kusu utufanyidina kwifukwil! Mudimu wa kulejan utukasikeshining. Uyiletidining yiyukish yivud nakash antu ipanininga mu “kulejan rusangu ruwamp.”—Mid. 20:24.