Lam Mushiku Wey mu Mudimu wa Kulejan

MUDIMU wa kulejan rusangu ruwamp udi mudimu umwing wa usey nakash usadikina nlel unou pa mangand. Piudia kashalapol wa Yehova, umening chakin kamu anch witapidil kal dilau mu kwipan mu mudimu wa kuyikadish in kwilej. Pakwez, wijing chakin kamu anch yisu yimwing ayibol ni in kulejan chiyikasikedining kulam mushiku wau mu mudimu wa kulejan.

Chiyikasikedining in kulejan amwing kutan muntu kanang ukutwishau kwisamb nend mu mudimu wa kulejan wa ku chikumbu ni chikumbu. Chikwau kand, antu amwing akutwish kuburen kwikal kwol kwau. Payitaniningau in chikumbu, mutapu wau wa kwakul ku uruu wa Want ukutwish kumekesh pamwing ap kulik ap kujiman. In kulejan amwing iyakamishining mulong ipanining nakash mu mudimu wa chingand usongininga mabuj pakwez oviling wom anch kakutwishap kuwanyish chisend chau. Yid yimwing ya chikumangen yasadina kal mudimu wa kulejan mu mivu yivud​—pakad kulik ap pakemp—​pakwez yasambishin kal kuziy.

Ov, chinech chikutwish kutushimokish pa kuman mutapu arishinau antu awonsu a Yehova nich yikokujol yikutwisha kukepish mushiku wau mu mudimu wa kulejan? Bwat kwau. Ov, nany pakach petu ukutwish kuchingejin anch chikutwish kutuswapel kulejan uruu wa uyakin wa dipandish wa Nzamb mu mangand mayikedilau kudi “muyimp,” Satan Djabul?​—1 Yoh. 5:19.

Chikalap nchik yikokujol ya pakampwil yiurishina nich mu kulejan rusangu ruwamp, ikal nich kashinsh anch Yehova ukutwish kukukwash chakwel uyipandakana. Ov, chom ik chikutwisha kukukwash chakwel ukudisha mushiku wey mulong wa mudimu wa kulejan wa win Kristu? El amboku tushinshikinany yiyul yimwing ya kusadil.

YIKWASHA ANTU AKWETA UKALIWENY UKEMP

Muvu ni muvu, tunan twa antu tutambwiling dibatish ni kwikal Atuman a Yehova asu. Anch uchidi musu mu kwipan kwey kudi Nzamb kusutil ku dibatish, ukutwish kusanger kamu pakad kwidjidjek piur pa ukwash udiokila kudi antu akweta ukaliweny ni mivu yivud mu mudimu wa kulejan kukupandakanamu ey. Anch wasadin kal mivu yivud mu mudimu wa kulejan Want, ov, chikwikalap chiwamp ni chisangareshina kuyikwash in kulejan asu?

Yesu wading wij anch in kwilejend afanyina kutambul umutakel chakwel ikala in kulejan ayifuvu ni wayileja mutapu wa kusal mudimu winou. (Luka 8:1) Nlel unou, kudi kand, kuswir kwa kuyifumb antu akwau chakwel ikala in kulejan ayifuvu.

Tufanyidinap kuchingejin anch mwin kulejan musu ukutwish kutambul ukaliweny wa kulejan nich kusutil ku kwipan kusu mu mudimu wa kulejan. Pakwez, ufanyidin kutambul yany ya pakampwil yidiokila kudi mulej muwamp ni wa rukat. Yany yiney yikutwish kumukwash mwin kulejan wakad ukaliweny wa kulejan chakwel ijika mutapu wa (1) kwirijek ni kusadil yiyul, (2) kwisamb ni mwin chikumbu ap muntu kanang usutina, (3) kupan mikand, (4) kumuchirikin muntu wamekesha kusanger ni (5) kusambish dilejan dia Bibil. Chakin kamu, kukwikal yibudikin yiwamp anch muntu ufumbinau utadin ni wimburijin milad ya kusadil mu mudimu wa kulejan wa mwin kumufumb. (Luka 6:40) Mwin kulejan musu ukutwish chakin kamu kusanger ukwash wa muntu kanang ukutwisha kumutesh ni kumukwash anch kudi kuswir kwa kumukwash. Mwin kulejan wakad ukaliweny ukutwish kand kutaninamu mu kutambul yany ni yiyul ya ukwash.​—Mul. 4:9, 10.

ISAMBA NI MBAY NEY WA MUDIMU ULEJENA NEND

Chikalap nchik usu wey wawonsu usadina mulong wa kwisamb ni mwin chikumbu, isamba nend mbay ney usadina nend mudimu wa chingand. Vurik anch Yesu wayituman in kwilej end “aad aad” mulong wa kulejan. (Luka 10:1) Pasalangau pamwing, awiy atwisha kukasikeshijan ni kukwashijan umwing ni mukwau. Chawiy lel, chisu chasutishangau mu mudimu wa chingand pamwing ni ambay nau akaritiy chayinkishanga mutapu wa ‘kukwashijan.’​—Rom 1:12.

Ov, yom ik ukutwisha kwisambinany? Ov, chitwishikwin pamwing ap kwisambin piur pa yom yisu yikasikeshina yakushikena? Ov, wajingunina dinans dimwing disangareshina mu dilejan diey dia panrey ap dia mu dijuku? Ov, akukasikesha kusutil ku yom yimwing watesha ku chikumangan? Yisu yimwing, mwin kulejan usadina nend pamwing ukutwish kwikal mbay wa mudimu wakad kusal nend chisu chawonsu. Ov, wij mutapu washikenay ku kwijik uyakin? Ov, chom ik chamukasikesha chakwel itiya anch dined didi dirijek dia Yehova? Ov, yisend ap ukaliweny ik yadingay nich? Pamwing ap ukutwish kumukwash nich ukaliweny wey. Chikalap nchik mutapu ukezau antu kwakul mu mudimu wa chingand, kusal pamwing ni muntu kanang mu mudimu wa chingand kuletining yisu yiwamp ya ‘kukwashijan . . . muntu ni mukwau.’​—1 Tes. 5:11.

DANDAMEN NICH YAKU YEY YIWAMP YA KWILEJ

Chidi cha usey kulam mushiku mu mudimu wa kulejan ni kudanamen nich yaku yiwamp ya kwilej. “Kashalapol ushinshamena ni kubabal” wapalenangesha jinsangu piur pa mitu ya milong kushalijan. (Mat. 24:45, TMK) Chawiy lel, mitu ya milong ukutwisha kwilej mulong wa kutambul yakudia ya muspiritu yishalijadining nakash. Tushinshikinany amboku chilakej chimwing piur pa mutu wa mulong uwamp wa dilejan dia muntu panrend: Ov, mulong wak mudimu wa kulejan-Want udi wa usey nakash? Mushet utekinau umekeshin mayingish mamwing.

Kushinshikin manans madia mu mushet winou kukutwish kukubachik chakwel udanamena kusal mudimu wa kulejan nich mushiku. Ov, mulong wak ukutwishap kwitekin mupak wa kwilej chakwel umana mulong wak kudi mayingish makwau mavud ukutwisha kwijik? Kupwa tongijokin pa mayingish ni pa maverse makasikeshina mitu ya milong yiney. Kusal mwamu kukez kukasikesh chakin kamu mushiku wey mulong wa mudimu wa kulejan.

TESH NAWAMP YIYUL

Dirijek dia Yehova dipanining yisu yawonsu yiyul yiletinau mulong wa kutukwash chakwel tukudisha ukaliweny wetu mu mudimu wa kulejan. Chilakej, kuwejaku ku mudimu wetu wa kulejan ku chikumbu ni chikumbu, tukutwish kulejan kusutil ku kufund mikand, kusutil ku telefon, mu kulejan mu balibal ap mu jindond mudia antu avud, ni kulejan rusang ruwamp kudi antu pakad kuchingejin ni mu teritwar wa kwisakin. Tukutwish kand kutenchik yom tukweta chakwel tutwisha kupan uman mu teritwar wakad kwendin nakash kudi in kulejan.

Ov, wateshin nawamp yiyul yiney? Ov, wapakishin kal kusadil yimwing pakach pa yiyul yiney? Antu avud asala mwamu asangara nakash pamanau yibudikin yiwamp. Shinshikin yilakej yiney yisatu.

Chilakej cha kusambish chimedin piur pa chibudikin cha yom yilondinau mu mitu ya milong yidia mu Mudimu Wetu wa Want piur pa mutapu tufanyidina kusambish malejan ma Bibil. Chinech chamubachika nambaz umwing utazukinau anch April chakwel asambisha malejan ma Bibil pamwing ni antu asatu pakach pa ambay nend a mudimu. Ndiy washimoka ni wasangara nakash pamanay mutapu witiyau antu inay asatu kwilej nend Bibil ni pasambishau kukumangan ku yikumangen ya chikumangan.

Chilakej cha kaad chimedin piur pa mutapu wa kupan magazet metu. Atukasikesha kuyikimb antu akata kusanger kutang mitu ya milong ya pakampwil yidinga mu ma gazet metu. Mu États-Unis, kalam wa munyingumuku umwing wafunda anch, papanay Réveillez-vous ! wadinga ni mutu wa mulong wisambina piur pa mutapu wimedina mwom wa muntu pa kutenchik jinfumbu mu chilik kanang. Ndiy ni mukajend apana kand mitu ya milong yilondina anch: “Mieux comprendre son médecin” mu mabiro 100 ma amingang adinga mu munyingumuku. Ulondin kand anch: “Kuyendil kwinoku kwading kwa ukwash nakash mu kulond kwa kusambish ni kupan mikand. Kupwa kwa kuta urund ni antu ndond yiney, twashikena ku kupandikesh minsamb yetu ni antu inay.”

Chilakej cha kasatu chimedin piur pa kupan uman kusutil ku telefon. Nambaz umwing utazukinau anch Judy wafunda ku mutiy ujim mulong kumekesh kujikitish kwend piur pa dikasikesh dia kupan uman ku telefon. Ndiy wafunda anch makwend wadinga ni mivu 86, ni wadinga ni milong ya ukash wa mujimbu, wipan yisu yivud mu mulad winou wa mudimu utumbila ni washikena ku kutan musangar nakash kusutil ku kutakel dilejan dia Bibil ku telefon pamwing ni muntu umwing wading ni mivu 92!

Yiyul yiletiningau mu mikand yetu piur pa kupan uman yaleta yibudikin yiwamp. Yisadina! Yikutwish kukukwash chakwel ulama musangar ni mushiku wey mu mudimu wa kulejan.

ITEKINA JINTONG JISIKENA

Kusal kwetu nawamp mu mudimu wa kulejan kwengamidinap kusu mu chilik kanang pa uvud wa mikand tupanininga, uvud wa malejan ma Bibil tukata kutakel ap uvud wa antu tukwashininga chakwel ikal atushalapol a Yehova. Kupwa, ov, antu inch adinga akad kwikal mu dijuku dia Nowa akwashay chakwel ikala in kumwifukwil Yehova? Pakwez, Nowa wawanyisha mudimu wend wa kulejan nawamp. Chidi chilakej chiwamp kudi etu tukata kumusadil Yehova nich kushinshaman.​—1 Korint 4:2.

In kulejan a Want avud amening anch chakwel akasikesha mushiku wau mu mudimu wa kulejan, afanyidin kwitekin jintong jisikena. Ov, jintong ik jimwing jifanyidinau kwitekin? Jintong jikemp ajinsambidin mu mushet ulondwilaku ou.

Nich ukwash wa Yehova, sal anch mudimu wey wikala usangareshina ni usongina mabuj. Piuwanyishina jintong jey, ukez kwikal ni musangar wa kuwanyish ni kwikal nich musangar wa kwijik anch yom yawonsu usadina yidi mulong wa kulejan rusangu ruwamp.

Chidi chakin anch, mudimu wa kulejan rusangu ruwamp ukutwish kwikal chikokujol. Chikwau kand, kukutwish kwikal yom kanang ukutwisha kusal chakwel wikala mwin kulejan wa Want ukweta mushiku mu kulejan. Ikala ni musangar ni mukasikesha mbay ney wa mudimu wa kulejan kusutil ku kwikal nich yaku yiwamp ya kwilej, kusutil ku kusadil yany yipaniningau kudi kashalapol ushinshamena ni kwitekin jintong jisikena. Kupwa, vurik anch Nzamb ukwatining nich usey chisend ukweta cha kulejan rusangu ruwamp mudi Kaman wend. (Isay 43:10) Musangar mud ik ukweta piudandamedina kulam mushiku wey mu mudimu wa kulejan!