Lejan Nich Mushiku mud Yesu

1. Yom ik yikata kusal anch atushalapol a Yehova ikal ashalijadina nau antu akwau afila mukan anch ad in Kristu?

CHOM chimwing chikata kuyikadish atushalapol a Yehova ashalijadina nau antu akwau afiling mukan anch ad in Kristu, ud mushikua wau mu mudimu wa kulejan (Tit. 2:14) Pakwez yisu yimwing tukutwish kuburen musangar mu mudimu wa kulejan. Pamwing ap ukutwish kwiyov mud mwiyovay mukadivar umwing wasadina kal mudimu nakash mud mukurump wa chikumangen. Ulondin anch: “Yisu yimwing nikatap kamu kwov ja kuya mu mudimu wa kulejan.”

2. Yisu yimwing yom ik yikutwisha kutushadishin mushiku wetu wa kulejan?

² Mu mudimu tusadina mulong wa Yehova, tukutwish kusanger kwipan nakash mu milad yimwing kusutamu mutapu tusangaredina kwipan mu mudimu wa kulejan. Mulong wak? Mulong mud anch twipan mu kutung ap kurijek Yot ya Want, kukwash kwindond kwashikedina mar madokila ku yom yatangau ap kuyikasikesh akadivar nau anambaz netu, tukutwish kuman kapamp kamwing yibudikin yiwamp ni mwamu tukwov musangar nakash. Tukat kusanger kand chisambu ni rukat chisu tukata kusal mudimu pamwing nau akadivar netu, ni twij anch asangaredining yom tukata kuyisadin ni ayikwatining nich usey. Pakwez, pamwing ap twalejen kal mu mivu yivud mu teritwar umwing pakad kumanamu antu avud asangaredina uruu. Ap tukat kutan antu akwila mu mutapu uyimp ku uruu wetu. Twij kand anch, mulong disuden dasej kal piswimp, antu avud kakwitiyap kamu uruu wetu. (Mat. 10:22) Yom ik yikutwisha kutukwash kulam ap kupandakesh mushiku wetu ni kudandamen kulejan?

3. Chilakej chida mu Luka 13:6-9 chitufundishin ik piur pa mushiku wa Yesu?

³ Tukutwish kwilej mutapu wa kwikal ni mushiku mu mudimu wa kulejan kusutin kushinshikin chilakej cha Yesu. Padingay pa divu, Yesu kimikap mudimu wa kulejan ap kapamp kamwing. Pakwez dichuku dawonsu dasutang, wapandakeshang mushiku wend mu mudimu wa kulejan. (Tang Luka 13:6-9.) Mud mwin kulam chir wasutisha mivu yisatu mu kukun mutond wa nfung walika kubudish mabuj, Yesu wasutisha piswimp mivu yisatu mu kulejan rusang ruwamp kud in Yuda, pakwez avud kikalap in kwilej end. Mud mwalikay kalam wa chir kuziy ap kushadish ruchingej anch mutond ukusongap mabuj, Yesu niyend kaziyap ap kukepish mushiku mu mudimu wend. Pakwez, wasala usu nakash wa kuyifundish in Yuda mulong wa kuyikwash kwitiy rusang ruwamp.

4. Yom ik yinying tukutwisha kwilejin ku chilakej cha Yesu?

⁴ Mu mutu wa mulong winou tukuman mutapu wamekeshay Yesu mushiku, pakampwil mu angond musamban a kwinsuden kwa mudimu wend wa kulejan. Kwilej yom yafundishay ni kwimburij yom yasalay kukutukwash kulam mushiku wetu. El tushinshikinany yom yinying tukutwisha kwilejin ku chilakej cha Yesu: (1) Chom cha usey nakash kud ndiy chading kusal rusot ra Yehova, (2) washinshikinang uprofet wa Bibil, (3) wachingejinang ukwash wa Yehova, ni (4) walama ruchingej anch antu akumutesh.

WASHINSHIKINA PA KUSAL RUSOT RA YEHOVA

5. Mutapu ik wamekeshay Yesu anch kusal rusot ra Nzamb kwawiy kwading kwa usey nakash mu mwom wend?

⁵ Yesu walejanang “rusangu ruwamp ra Want wa Nzamb” nich mushiku, mulong wading wij anch wawiy mudimu wading ukatinay Nzamb anch asal. (Luka 4:43) Kud Yesu, kulejan rusang ruwamp wawiy mudimu wading wa usey nakash. Ap mu angond akemp a kwinsuden kwa mudimu wend, wendangana “mu misumb ni mu mal,” mulong wa kuyilej antu. (Luka 13:22) Wayifumba kand in kwilej akwau mulong wa kulejan nau pamwing.​—Luka 10:1.

6. Midimu yawonsu tumusadidina Yehova yikwatijadin nchik ni mudimu wa kulejan? (Tal kand chipich.)

⁶ Nlel kand, Yehova ni Mwanend atuchingejidin anch tutek mudimu wa kulejan pa ndond ya kusambish. (Mat. 24:14; 28:19, 20) Yom yawonsu tumusadidina Yehova yikwatijadin ni mudimu wa kulejan. Chilakej, tukat kutung Yot ya Want ni kuyitazuk antu kwez kukumangenamu mulong wa kumwifukwil Yehova. Mudimu tukata kusal ku Betel ni mu jindond jikwau yikat kukwash mudimu wa kulejan. Anch kwashiken mar madokila ku yom yatangau, tukat kuyinkish akadivar nau anambaz netu yom yiswirikedinau, kadap ching kusu mulong wa kuyikwash ku mujimbu pakwez kand mulong wa kuyikwash kulam mwikadil wau wa mu spiritu, kuwejinaku ni mudimu wa kulejan. Anch twavurik anch mudimu wa kulejan ud wa usey nakash ni anch Yehova ukatin anch tuusal, tukwipan nich mushiku nakash mu mudimu winou. János, uda mukurump wa chikumangen mu Hongri ulondin anch: “Nikat kuvurik anch kwikil mudimu wa uteokras ukwau ukutwisha kuswinkan mudimu wa kulejan.”

7. Mulong wak Yehova ukatin anch tudandamen kulejan? (1 Timote 2:​3, 4)

⁷ Tukutwish kupandakesh mushiku wetu mu mudimu wa kulejan kusutin kuyiman antu mud muyimenau kud Yehova. Ukatin anch antu avud atesha rusang ruwamp ni kuritiy (Tang 1 Timote 2:3, 4.) Mulong rusang ruwamp rikutwish kupandish mwom ya antu, Yehova ukat kutukwash kuwapish mutapu wa kwambamb nau antu mu mudimu wa kulejan. Chilakej, broshir Yikata Antu​—Ikadish in Kwilej utwinkishin yiyul piur pa mutapu wa kusambish mambamb mulong wa kushiken ku dilejan da Bibil. Ap anch antu kitiyinap uruu wetu nlel, akutwish kuwitiy kurutu kwa mar makash kushik. Yom tuyilejina nlel akutwish kuyivurik kurutu kwa machuku ni akutwish kukwat mupak wa kumusadin Yehova. Pakwez chikutwish kusadik mwamu ching kusu anch twadandamen kulejan.

WASHINSHIKINA UPROFET WA BIBIL

8. Kwijik uprofet wa Bibil kwamukwasha nchik Yesu kusadin nawamp chisu chend?

⁸ Yesu wateshang mutapu wafanyina kuwanyin uprofet wa Bibil. Wading wij anch wafanyina kusal mudimu wa kulejan mu mivu yisatu ni chikunku kusu. (Dan. 9:26, 27) Wading uteshin kand nawamp uprofet wisambina piur pa mutapu ni chisu chafanyinay kufa. (Luka 18:31-34) Yom yading yijay Yesu yamukwasha kusadin nawamp nakash chisu chend. Mud chibudikin, walejana nich mushiku mulong wa kupwish mudimu wamwinkau kusal.

9. Mulong wak uprofet wa Bibil utubachikin kulejan ni mushiku?

⁹ Kutesh uprofet wa Bibil kukutwish kutukwash kulejan rusang ruwamp ni mushiku. Twij anch chisu chashalaku kal mu wa mangand minam chid chikemp. Twij kamu anch yinship yisadikina katat ni mikadil yikwetau antu nlel yimekeshin nawamp yom yasambelay kulejan Bibil piur pa machuku ma nsuden. Tumen kand anch njit jida pakach pa Dikand da pa Mangand Mawonsu da Angleter ni Amerik ni Risi ni jingand jimunungina chikas jiwanyishin kamu uprofet wisambidina piur pa mwant wa kwiyand ni mwant wa kurul mu “chisu cha kwisudiel.” (Dan. 11:40) Tuteshin kand nawamp anch Dikand da pa Mangand Mawonsu da Angleter ni Amerik adifanakeshin ni chidjatil cha chirumbidij chisambidinau mu Daniel 2:43-45. Tukwet kashinsh anch, mud mulejena uprofet wa Bibil, piswimp ap kamu Want wa Nzamb ukushesh maguvernema min mawonsu ma an a antu. Uprofet winou wawonsu umekeshin anch twazez kal kamu kwinsuden kwa machuku ma nsuden, chawiy tufanyidin kusadin nawamp nakash chisu chetu mu kwipan mu mudimu wa kulejan ni chitongijok cha kuswapej.

10. Uprofet wa Bibil ukutwish kutukwash mu mitapu ik yikwau kudandamen kulejan?

¹⁰ Uprofet wa Bibil utulejin kand uruu tusangaredina kulejan. Carrie, nambaz usadidina mu République Dominicaine ulondin anch: “Kutongijokin piur pa yom yiwamp yakaninay kal Yehova kusal mu machuku ma kurutu kukat kwimbachik kuyilejamu antu akwau.” Uwejidinaku anch: “Chisu nikata kuman milong yirishinau nich antu nlel, nikat kuman anch uprofet winou wintadinap kwau kusu am, pakwez uyitadin kand niyau.” Uprofet wa Bibil umekeshin anch Yehova ndiy utukwashina kusal mudimu winou wa kulejan, chawiy tufanyidinap kuziy. Leila, uda mu Hongri ulondin anch: “Isay 11:6-9 ukat kwinkwash kulejan rusang ruwamp ap kud antu amekena mud kakwitiyap kwau. Nij anch Yehova ukutwish kumukwash muntu mwawonsu kuswimp.” Mukadivar Christopher uda mu Zambi ulondin niyend anch: “Marko 13:10 wasambela kulejan anch rusang ruwamp rikupalangan pa mangand mawonsu, ni nikat kwov musangar wa kunung chikas mu kuwanyin kwa uprofet winou.” Uprofet ik wa Bibil ukukasikeshining niyey kudandamen kulejan rusang ruwamp?

WACHINGEJINA UKWASH WA YEHOVA

11. Mulong wak Yesu wading ukwet kuswir kwa kuchingejin mu ukwash wa Yehova mulong wa kudandamen kulejan nich mushiku? (Luka 12:49, 53)

¹¹ Yesu wading ni kashinsh anch Yehova ukumukwash mulong wa kudandamen kulejan ni mushiku. Ap anch Yesu wading ni nkeu, wading wij anch rusang ruwamp rikutwish kuletish rukis ni rupompat pakach pa antu. (Tang Luka 12:49, 53.) Antakel a chirelijon kasangerap yom yalejanangay Yesu, chawiy tupamp tuvud apakisha kumujip. (Yoh. 8:59; 10:31, 39) Pakwez Yesu wadandamena kulejan mulong wading wij anch Yehova ud nend. Walonda anch: “Tatuku wantuma am, ndiy udi ni yamam. . . . Ndiy kanshilap amwinam, mulong yisu yawonsu nikat kusal yom ya kumusangarish ndiy.”​—Yoh. 8:16, 29.

12. Mutapu ik wasambelay Yesu kuyitenchik in kwilej end mulong wa kudandamen kulejan chikalap nchik rupompat?

¹² Yesu wayivurisha in kwilej end anch afanyidin kuchingejin ukwash wa Yehova. Tupamp tuvud, wayinkisha kashinsh anch Yehova ukuyikwash ap anch ayizengol. (Mat. 10:18-20; Luka 12:11, 12) Mulong Yesu wading wij anch antu avud afanyina kuletish kanvundangesh pakuteshau rusang ruwamp, chawiy wayileja kubabal. (Mat. 10:16; Luka 10:3) Wayileja kulik kuyishindin antu alikina kutesh uruu. (Luka 10:10, 11) Kupwa wayileja kand kuchin anch ayizengol. (Mat. 10:23) Ap anch Yesu wading ni mushiku ni wamuchingejinang Yehova, kitekangap mu ubaj chamwamu.​—Yoh. 11:53, 54.

13. Mutapu ik ukutwisha kwikal ni kashinsh anch Yehova ukukukwash?

¹³ Nlel niyetu tukwet kuswir kwa ukwash wa Yehova mulong wa kudandamen kulejan ap anch twarish ni rupompat. (Kuj. 12:17) Mulong wak ufanyidin kwikal ni kashinsh anch Yehova ukukukwash? Shinshikin malembil ma Yesu mafundinau mu Yohan 17. Yesu wamwita Yehova chakwel ayilama ni kuyibangin atwimbuy end, ni Yehova wakula malembil minam. Buku wa Midimu ulejen mutapu wayikwashay atwimbuy kulejan nich mushiku chikalap nchik kuzengol. Mu malembil mend, Yesu wamwita kand Yehova kuyilam ni kuyibangin antu awonsu afanyina kwitiyij yom yafundishangau atwimbuy end​—kuwejinaku niyey. Yehova wadandamena kwakul ku malembil ma Yesu; niyey ukukukwash mud mwayikwashay kand atwimbuy.​—Yoh. 17:11, 15, 20.

14. Mulong wak tufanyidin kwikal ni kashinsh anch tukudandamen kulejan chikalap nchik yikokujol? (Tal kand chipich.)

¹⁴ Mulong disuden disejin piswimp, chikutwish kutukasiken kulejan rusang ruwamp ra want. Pakwez Yesu watwinkisha kashinsh anch tukutambul ukwash tukweta nich kuswir mulong wa kudandamen kulejan ni mushiku. (Luka 21:12-15) Mud mwasalay Yesu nau in kwilej end tukat kuyilik antu akwata mupak wa kututesh ap bwat ni tukatap kupwitamijan nau. Ap mu jingand mukangeshinau mudimu wetu, akadivar netu akat kutwish kulejan rusang ruwamp mulong akat kumuchingejin Yehova pakad kwichingejin ayinau. Nlel Yehova utwinkishin usu wa “kurumburil rusangu ruwamp patok wakad wom” mud mwasalay kand kud atwimbuy end asala mudimu winou mud mwakatay. (2 Tim. 4:17) Niyey anch wamuchingejin Yehova, ukukukwash kudandamen kulejan ni mushiku.

WALAMA CHITONGIJOK CHIWAMP

15. Yom ik yimekeshina anch Yesu wading ni chitongijok chiwamp piur pa mudimu wa kulejan?

¹⁵ Yesu walama chitongijok chiwamp piur pa mudimu wa kulejan. Kusal mwamu kwamukwasha kudandamen kulejan nich musangar. Chilakej, mu kusut kwa chisu, mu muvu wa 30 C.C. Yesu wamana anch antu asambisha kutesh rusang ruwamp, ni wayifanikesha nich mbut jiswila jiwanyidina kwangul. (Yoh. 4:35) Kupwa wayileja kand in kwilej end anch: “Yakwangul yidi yivud.” (Mat. 9:37, 38) Mu kusut kwa chisu wachirikinamu kand anch: “Yakwangul yidi yivud . . . Mulembijekany mwin chir chakwel ukutum in mudimu wa kwangul avud.” (Luka 10:2) Yesu wadandamena kwikal ni kashinsh anch kukwikal antu akukata kutesh rusang ruwamp.​—Luka 10:21.

16. Kusutin yilakej yasadinay, mutapu ik twija anch Yesu wading ni chitongijok chiwamp piur pa mudimu wa kulejan? (Luka 13:18-​21) (Tal kand chipich.)

¹⁶ Yesu wayikwasha in kwilej end kudandamen kwikal ni mushiku ni kashinsh kawonsu anch mudimu wau ukwikal ni yibudikin yiwamp. Shinshikin yilakej yend yaad yasadinay. (Tang Luka 13:18-21.) Yesu wasadina chilakej cha rubut ra mutond wa mutard mulong wa kumekesh anch rusang ruwamp akurilejan mu mutapu usangareshina ni kuripalangesh mu mutapu ushimwokishena. Mu chilakej chend chikwau, Yesu wafanikesha uruu wa Want ni chivish, mulong wa kumekesh anch Want wa Nzamb akez kuulejan mu jindond jivud pa mangand ni kuyibachik antu avud kuswimp, ap anch kuswimp kwinoku kukezap kamekan kapamp kamwing kud antu akwau. Chawiy Yesu wayinkisha in kwilej end kashinsh anch uruu ukulejanau ukez kayikwash antu avud.

17. Mayingishin ik matubachikina kudandamen kulam chitongijok chiwamp piur pa mudimu wa kulejan?

¹⁷ Tukutwish kwikal ni mushiku nakash mu mudimu wa kulejan anch twatongijokin mutapu usadikina mudimu winou pa mangand mawonsu nlel. Muvu ni muvu, mamiliyon ma antu asangaredina akat kukumangan ku Chivurikish ni tukat kwilej nau Bibil. Tunan twa antu akat kuyibatish ni kubombakan netu pamwing mu mudimu wa kulejan. Twijap kamu uvud wa antu akwitiya rusang ruwamp tulejena, pakwez twij anch Yehova ukat kukumangej chisak chijim cha antu akupanda ku mar makash makushikena piswimp ap. (Kuj. 7:9, 14) Yehova amwinend ndiy mwant wa mudimu ni wij anch kud antu avud akutwisha kwitiy rusang ruwamp, chawiy tudandamedina kamu kulejan.

18. Yom ik tusotina anch antu akwau ajingunin piur petu?

¹⁸ In kwilej a Yesu akat kuyijinguninang ku mushiku wau mu mudimu wa kulejan. Chilakej, pamanau antu mutapu walejanau atwimbuy nich kutakaman ni mushiku “ajingunina anch, komb antu inay ading pamwing nend Yesu.” (Mid. 4:13) Patumenau kand niyetu mu mudimu wa kulejan, antu afanyidin kujingunin anch tukat kwimburij chilakej cha Yesu, walejanang ni mushiku.