Antu Akweta Musangar pa Divu
1 ‘Ayuk kwau antu amukweta Yehova, mud Nzamb wau!’ (Kus. 144:15) Mazu minam mamekeshin anch Atuman’a Yehova adi antu amwing akweta musangar pa divu. Kwikil musangar ujim upandakenamu udiokila ku kumusadil Nzamb umwing wakin ni mwom, Yehova. Mulong ndiy udi ‘Nzamb wa musangar,’ antu akata kumwifukwilang akat kumekeshang musangar wend. (1 Tim. 1:11) Ov yisu yidia yimwing ya mitapu ya difukwil dietu yikata kutwikadish in musangar nakash mwamu?
2 Yiyingish ya Kwikal in Musangar: Yesu utulejin nich kashinsh anch musangar ukat kudiokal ku ‘kwijik kuswir [kwetu] kwa yom ya muspiritu.’ (Mat. 5:3) Dilejan dia Baibel diakad kujing ni kukumangan ku yikumangan yetu yawonsu ya Ukristu yikat kuwanyish maswir minam. Kwilej uyakin wa Dizu dia Nzamb kwatudioshin mu uswik wa yisalijok ya relijon wa makasu ni yilim. (Yohan 8:32) Mifund yitufundishin kand njil ya mwom yipandikena kuwap. (Isa. 48:17, NW) Mulong wa chinech, chawiy lel tukata kusanger urund uwamp wa Ukristu ni wa musangar pakach pa akadivar netu.—1 Tes. 2:19, 20; 1 Pita 2:17.
3 Tukat kuman musangar ujim udiokila ku kuziyil kwetu ku yany ya piur yitekinay Nzamb ya mwikadil wishitwila, mulong twij anch yikat kutuking ni kumusangaresh Yehova. (Jinsw. 27:11) Kabambansangu umwing walonda anch: “Yikalap nchik yany yau yawonsu yikash, Atuman’a Yehova kakatap kumekan mud antu amena mar bwat. Chidi kamu chinyim. Ansand nau amakurump [antu adia mukach mwau] akat kumekesh chifu cha kwikal in musangar chisu chin chawonsu ni kwikal isikena kamu nawamp.” Ov mutapu ik tukutwisha kuyikwash antu akwau kwikal nich mwom wa musangar mud winou?
4 Tuyikwashany Antu Akwau Kuman Musangar: Mangand mizwil too nich runeng, ni antu avud aburedin ruchingej ra machuku ma kurutu. Pakwez, etu tukwet ruchingej ra musangar, twij anch dichuku dimwing runeng rikez kwikal chom chikur. (Kuj. 21:3, 4) Chawiy lel, tukat kulejan nich mushiku, ni kukimb antu akweta michim yiwamp tukutwisha kwambulijan nau ruchingej ni yitiyij yetu piur pa Yehova.—Ezek. 9:4.
5 Nambaz umwing chibol walonda anch: “Kwikil chom chikutwisha kwilikan nich musangar wa kuyikwash antu kumwijik Yehova ni uyakin wend.” Tusalany yawonsu tukutwisha chakwel kuyikasikesh antu avud nakash kwitiyij malejan ma Baibel. Kumusadil Yehova ni kwipan chakwel kuyikwash antu akwau kumusadil ndiy kukat kulet musangar ujim nakash.— Midimu 20:35