Mutapu Uletininga Mazu Ma Yesu Musangar

“[Yesu] wakandama ku mukandu. Chashakamay pansh in kwilej end eza kudiay ndiy; Chad waburila mukan mwend wayileja anch.”—MAT. 5:1, 2.

1, 2. (a) Mu mwikadil ik walejanay Yesu Mafundish mend ma pa Mukandu? (b) Mutapu ik wasambishay Yesu malejan mend?

UDI muvu wa 31 C.C. Yesu wimika mu kachisu mudimu wend wakulejan mu Galalia chakwel aya ku Yerusalem mulong wa Kusut kwa Yehova. (Yoh. 5:1) Pachirikay ku Galalia, walembila uchuku wawonsu chakwel Nzamb amukwasha kutond atwimbuy 12. Chikwacha, runtu ramwombamu Yesu bwalikan, niyend wayoka ayej. Pamwing nau in kwilej end ni antu akwau adingaku, washakama pa mukandu ni wasambisha kuyilej.—Mat. 4:23–5:2; Luka 6:12-19.

² Yesu wasambisha malejan mend—Mafundish ma pa Mukandu—nich kuyilej anch musangar udiokiling ku urund uwamp ni Nzamb. (Tang Mateu 5:1-12.) Musangar udi ‘mwikadil wa kwiyov nawamp udiokila ku masip wavulijan wikal mazang makash.’ Yom chidivu yiletininga musangar yajimbulay Yesu yikasikeshidin kutulej mulong wak in Kristu akwet musangar, ni mazu minam madi yiyukish ilel unou mudi mwadingau pasutil mivu 2 000. El katat tumashinshikina dimwing ni dimwing.

Akweta “Kuswir kwa Yom ya Nzamb mu Michim”

3. Chirumburikin ik kwijik maswir metu ma yom ya Nzamb mu michim?

³ “Ayuk kwau antu ija anch: ‘Tukwet kuswir kwa yom ya Nzamb mu michim yetu.’ Inay awiy adia antu a mu Want wa Nzamb!” (Mat. 5:3, MM) “Antu ija anch: ‘Tukwet kuswir kwa yom ya Nzamb mu michim yetu’” ij anch aswiridin umutakel ni riy ra Nzamb.

4, 5. (a) Ov, mulong wak ukwetau antu kuswir kwa yom ya Nzamb mu michim ayukin? (b) Mutapu ik tukutwisha kuwanyish maswir metu ma muspiritu?

⁴ Antu ija maswir mau ma yom ya Nzamb mu michim ayukin mulong adi, “antu a mu Want wa Nzamb!” Kumwitiyij Yesu anch udi Mesia chayinkisha in kwilej end akusambish mutapu wa kuyikel nend pamwing mu Want wa Nzamb wa mwiur. (Luka 22:28-30) Ap anch tukwet ruchingej ra kwikal nswan nend Kristu mwiur ap anch tuchengedin mwom wa chikupu kurutu oku pa divu dikeza kwikal paradis mu winyikel wa Want, tukutwish twikal chakin kamu nich musangar anch twij maswir ma yom yetu ya muspiritu ni kwijik nawamp anch tudi enday Nzamb.

⁵ Kadiap antu awonsu ija kuswir kwau yom ya muspiritu, mulong antu avud kakwetap ritiy ni kakatap kwau kusanger yom yitumbila. (2 Tes. 3:1, 2; Heb. 12:16) Mu jinjil tufanyidina kusadil chakwel tuwanyisha maswir metu ma muspiritu mudi kwikal nich mushiku wa kwilejang Bibil, mushiku mu mudimu wa kuyikadish in kwilej, ni kukumanganang chisu chawonsu ku yikumangan ya Ukristu.—Mat. 28:19, 20; Heb. 10:23-25.

“Ayuk” Akata Kudil

6. Anany ‘adidila,’ ni ‘ayukin’ mutapu ik?

⁶ “Ayuk kwau akata kudil, mulong akez kuyongoj.” (Mat. 5:4) “Akata kudil” adi awiy antu amwing “ija anch: ‘Tukwet kuswir kwa yom ya Nzamb mu michim yetu.’” Kudil kwau kurumburikinap anch inanin mulong wa mashakamin ma mwom yau. Adidil mulong wa ushon ukwetau pa mwikadil wau mudi antu akayitil ni mashakamin madiaku masamwinau antu akayitil. Ov, mulong wak in kudil inay ‘ayukin’? Mulong amwitiyijin Nzamb ni Kristu ni ayongojin mulong adi ni urund uwamp ni Yehova.—Yoh. 3:36.

7. Mutapu ik tufanyidina twiyov mulong wa mangand ma Satan?

⁷ Ov, niyetu tudidil mulong wa uyimp upalangena mu mangand ma Satan? Ov, mutapu ik twiyovilinga piur pa yom yiletina mangand minam? Kambuy Yohan wafunda anch: “Yawonsu yidia mu mangand, maku ma mujimbu wa mbij, maku ma mes, kwibaz kwa yom, kiyidip ya Tatuku.” (1 Yoh. 2:16) Ov, chikwikal nchik anch twiyovu anch, “chiyul cha mangand,” usu uyimp uyiyikedila antu apumbukina kulemp ni Nzamb, wasambish kal kutushesh pakemp-pakemp? Komb tulembilany wakad kulik, twilejany Dizu dia Nzamb, ni tusotany ukwash wa amakurump. Mudi mutushejidina Yehova piswimp nakash, tukutwish twatan ‘rongoj,’ chikalap nchik yom yikutuletina ushon.—1 Kor. 2:12; Kus. 119:52; Yak. 5:14, 15.

Mutapu ik Uyukilau Antu “Itudishila”!

8, 9. Chirumburikin ik kwikal itudishila, ni mulong wak uyukinau antu itudishina?

⁸ “Ayuk kwau itudishila, mulong awiy akez kuswan ngand.” (Mat. 5:5) “Kwitudish,” ap anch kuziyil, kurumburikinap kuziy ap kuwap kwa ku mes kwa rubabek. (1 Tim. 6:11) Anch tudi itudishila, tukuziyil kusal rusot ra Yehova, tukwitiyij umutakel wend. Kwitudish kukumekan kand mu mutapu utushicha ni akwetu akaritiy ap ni antu akwau. Kuziyil kwinoku kukwatijadin nich chiyul cha kambuy Paul.—Tang Rome 12:17-19.

⁹ Ov, mulong wak antu itudishila ayukin? Yesu muntu witudishina walonda anch mulong “akez kuswan ngand.” Ndiy udia wa kusambish kuswan ngand. (Kus. 2:8; Mat. 11:29; Heb. 2:8, 9) Pakwez, antu itudishila “answan nend Kristu” niyawiy akwet chikunku mu uswan wend wa ngand. (Rome 8:16, 17) Mu chikunku cha ngand cha Want wa Yesu, mwawiy mukezau antu akwau avud itudishila kusanger mwom wa chikupu.—Kus. 37:10, 11.

10. Kuburen kwend kwitudish kukwet usu ik pa yisend yetu ni pa urund wetu nau akwetu?

¹⁰ Tufanyidin twikal itudishina mudi Yesu. Ov, tukusal nchik anch twijiken anch tuding in jimboj? Mwikadil winou wa jimboj ni wa kusot ching matend ukutwish wachinish antu kulemp netu. Anch tudi akadivar aswirikedina yisend mu chikumangen, mwikadil mudi winou ukutukangesh. (1 Tim. 3:1, 3) Paul wamuleja Titus chakwel adandamena kuyivurish in Kristu a mu Kret anch: “Kangal ikal in matungu, ap in matend, pakwez ikal in kudimuk, ni in kumekesh kwitudish kwakin kudi antu awonsu mu yisu yawonsu.” (Titus 3:1, 2, MM) Kwitudish kwinoku kudi chiyukish mudi kudi antu akwau!

Akweta Nzal ya “Kutentam”

11-13. (a) Chirumburikin ik kwikal nich nzal ni impu ya kutentam? (b) Mutapu ik ‘uyikutishinau’ antu akweta nzal ni impu ya kutentam?

¹¹ “Ayuk kwau akweta nzal ni impu ya kutentam, mulong awiy akez kayikutish.” (Mat. 5:6) “Kutentam” kwadingay nich Yesu mu manangu kudi ngikadil ya kusal yom yiwamp kukwatijan nich rusot ra Nzamb ni yijil yend. Mwin kufund Kuseng walonda anch: “Ukat kunong” mulong wa yijil yitentamina ya Nzamb. (Kus. 119:20) Ov, tukwatin nich usey nakash kutentam mu chilik cha kwov nzal ni impu ya kutentam?

¹² Yesu walonda anch antu akweta nzal ni impu ya kutentam akez kuyukishiu mulong akez “kayikutish,” ap anch akez kuyisangaresh chipandikena. Chom chinech chatwishika kamu kupwa kwa Pentakost wa muvu wa 33 C.C. mulong spiritu utumbila wa Yehova wasambisha “kuyijingunin antu a pa mangand . . . kutentam.” (Yoh. 16:8, MM) Kusutin ku spiritu utumbila, Nzamb wayitakela antu chakwel afunda Mifund ya Ukristu ya Ugrek, yidia ya kutaninamu “ni kuyilej kwirijek mu kutentam.” (2 Tim. 3:16) Spiritu wa Nzamb ututwishishin kand kumudjal “muntu musu watangau mudi mudiay Nzamb mu kutentam kwakin ni mu kutumb.” (Efes 4:24, MM) Ov, chitwongojinap kwijik anch antu akarumukina akimb dilikishin dia yitil yau pa dishin dia mulambu wa difut dia Yesu akez kwikal atentamina ku mes kwa Nzamb?—Tang Rome 3:23, 24.

¹³ Anch tuchingejin kushakan pa divu, nzal ni impu yetu yitukweta ya kutentam yikez kupwa pitukeza kutambul mwom wa chikupu mu mikadil yitentamina pa divu. Kurutu yisadika, tukwatany mipak ya kushakam kamu kukwatijan nich yijil ya Yehova. Yesu walonda anch: “Sambilany bil kusurib want [wa Nzamb] ni kutentam kwend.” (Mat. 6:33) Anch twasal mwamu, tukez kwikal nich yivud ya kusal mu mudimu wa Nzamb ni michim yetu yikez kusangar.—1 Kor. 15:58.

Mulong Uyiyukishinau “Akweta Riy”

14, 15. Mutapu ik tukumekesha riy, ni mulong wak “akweta riy” ayukin?

¹⁴ “Ayuk kwau antu akata kuyovil akwau riy. Nzamb ukez kuyovil niyau riy!” (Mat. 5:7, MM) “Akweta riy” adi antu akata kuyanaken akwau. (Mat. 14:14) Riy ramubachika Yesu ni wasala yilay mulong wa kuyok antu avud adinga amena mar. Riy rikat kumekan mu dirumburish pakatau antu kuyilikishin antu ayirumbukidina, mudi mukatay Yehova kuyilikishin antu akarumukina. (Kub. 34:6, 7; Kus. 103:10) Tukutwish twamekesh riy mu mutapu winou ni kusutil ku mazu ni yisal yetu ya ranaken yikata kuyikasikesh antu aburedina. Njil yimwing ya kumekeshin riy yidi ya kulejan antu akwau uyakin wa Bibil. Yesu wachovila chisak riy, chawiy “wasambisha [kuchilej] yom yivud.”—Marko 6:34.

¹⁵ Tukwet diyingishin dia kwitiyij mazu manam ma Yesu malonday anch: “Ayuk kwau antu akata kuyovil akwau riy. Nzamb ukez kuyovil niyau riy.” Anch twayisadin akwetu nich riy, niyawiy akutusadil chilik chimwing. Tukez kuman anch riy twayovila akwetu rikutwish kuwin dirumburish din diawonsu ditutalikedina rikutwishay Nzamb kutuletin pa chisu chikuturumburishau. (Yak. 2:13) Dilikishin dia yitil ni mwom wa chikupu yidi ching ya antu akweta riy.—Mat. 6:15.

“Ayuk Kwau Antu Adia Zwang mu Michim,” Mulong wak?

16. Chirumburikin ik kwikal “zwang mu michim,” ni mutapu ik ukatau antu akweta mwikadil winou ‘kumuman Nzamb’?

¹⁶ “Ayuk kwau adia zwang mu michim, mulong akez kamuman Nzamb.” (Mat. 5:8) Anch tudi “zwang mu michim,” kwikal kwetu zwang kukumeken mu rukat retu, mu maswir metu, ni mu manangu metu. Tukumekesh “rukat ridiokila mu muchim wa zwang.” (1 Tim. 1:5, MM) Anch twikal ishitwila mu michim, tukez “kamuman Nzamb.” Chom chinech chirumburikinap ching kamu anch kumuman Yehova nich mes, mulong “kwikil muntu ukutwisha [kumuman Nzamb] washal kand mwom.” (Kub. 33:20) Mulong ndiy wamekesha kamu untu wa Nzamb, chawiy Yesu walonda anch: “Muntu mwawonsu wanmena kal am, wamumen kal Tatuku.” (Yoh. 14:7-9, MM) Chitudia in kumwifukwil Yehova a panap pa divu, tukutwish ‘kumuman Nzamb’ kusutil ku kushinshikin yisalijok yend mu mwom wetu. (Yob 42:5) Pakwel anch in Kristu azizidilau many amumana Nzamb kukez kushikedin kamu kudiay in Kristu azizidilau many pa chisu chikezau kuyisangul ku mwom wa muspiritu, akez chakin kamu kamuman Tatukwau wa mwiur.—1 Yoh. 3:2.

17. Kwikal zwang mu michim kukwet usu ik padi etu?

¹⁷ Mulong muchim wa zwang udi wishitwila mu mwikadil ni muspiritu, kiukatap kutongijokin pa yom yijondila ku mes ma Nzamb. (1 Jins. 28:9; Isay 52:11) Anch twikal zwang mu michim, yawonsu tukulonda ni tukusala yikwikal nich chijingidij cha kwishitul, ni kukwikalap kachom ka rubabek mu mudimu wetu tumusadidila Yehova.

“In Chisambu” Akwikal An a Nzamb

18, 19. “In chisambu” afanyidin kwend mutapu ik?

¹⁸ “Ayuk kwau in chisambu, mulong akez kayipil anch an a Nzamb.” (Mat. 5:9) “In chisambu” akat kumekenang ku yom yikatau kusal ni yilikiningau kusal. Anch tudi mulad wa antu adinga isambidinay Yesu mu manangu, tukwikal in chisambu ni ‘tukuyifundakeshilap akwetu yiyimp ku yiyimp.’ Pakwez, ‘tukulondul yiwapila umwing ni mukwau, ni kudi antu awonsu.’—1 Tes. 5:15.

¹⁹ Dizu dia Grek dikarumwinau anch “in chisambu” mu Mateu 5:9 dirumburikining anch “in kulet chisambu.” Chakwel anch twikala pakach pa in chisambu, tufanyidin kamu kusal usu wa kuchimekesh. In kulet chisambu kakatap kusalang chom ap chimwing chikutwisha “kuyauril arund.” (Jinsw. 16:28) Chitudia in chisambu, tukusal jinzau jiwamp chakwel tulondula “chisambu nau antu awonsu.”—Heb. 12:14.

20. Anany adia katat “an a Nzamb,” ni anany kand akwau akeza kwikala an a Nzamb?

²⁰ In chisambu ayukin mulong “akez kayipil anch an a Nzamb.” In Kristu ashinshamena azizidilau many akat kuyilil kudi Yehova ni adi “an a Nzamb.” Ikadil kal ni urund wa piswimp nend Yehova mudi anend mulong amwitiyijin Kristu ni akat kumwifukwil nich michim yau yawonsu “Nzamb wa rukat ni chisambu.” (2 Kor. 13:11; Yoh. 1:12) Chadi chidi nchik ku mutambu wa “amikoku akwau” in chisambu a Yesu? Yesu ukez kwikal mudi ‘Tatukwau wa Chikupu’ mu chirung cha Winyikel wa Mivu Kanan, pakwez anch wapwa, ndiy ukez kuziyil amwinend kudi Yehova ni akez kwikal niyawiy an a Nzamb mu kurumburik kuwanyidina.—Yoh. 10:16; Isay 9:6; Rome 8:21; 1 Kor. 15:27, 28.

21. Mutapu ik tukusala yom anch “twashakam mu [s]piritu”?

²¹ Anch “twashakam mu [s]piritu,” kwikal nich chisambu kukez kwikal chimwing cha ngikadil yetu yikumanau antu akwau. Tukezap kwikal nich “kusudishijan ku muchim” ni ap kwovishan “mukau umwing ni mukwau.” (Gal. 5:22-26) Pakwez, tusalany usu wa kwikal “ni chisambu nau antu awonsu.”—Rome 12:18.

Ayuk Kwau ap Anch Ayizengodil!

22-24. (a) Ov, mayingishin ik ma musangar makwetau antu azengodilau mulong wa kutentam? (b) Yom ik tukushinshikina mu mitu ya milong yaad yilondwilaku?

²² “Ayuk kwau azengodilau mulong wa kutentam, mulong want wa mwiur udi wa awiy.” (Mat. 5:10) Parumburilay chom chinech, Yesu wawejaku anch: “Wayukany kwen pakunisalolau kudi antu, ni pakunizengolau, ni pakunitwambilanyau kuyip kwawonsu mulong wa kwingambat am. Zangamany kwen ni musangar ujim, mulong difut dien didia mwiur diaswej kujimb, mulong chawiy kand chayimeshangau aprofet adinga kurutu kwenen.”—Mat. 5:11, 12.

²³ Mudi aprofet a Nzamb a pakur, in Kristu niyau achingejin anch akuyiswingish, ayizengol, akuyitwambin makasu—yawonsu yiney “mulong wa kutentam.” Anch ajijamen yoziu yiney nich kushinshaman, tukwikal nich musangar wa kumushiman ni kumutumbish Yehova. (1 Pita 2:19-21) Mar metu makutwishap kukepish musangar wetu wa kumusadil Yehova katat ap mu machuku ma kurutu. Makutwishap kukepish musangar wetu wa kuyikel pamwing nend Kristu mu Want wa mwiur ap wa kutambul mwom wa chikupu mudi antu akushakama pa divu mwishin mwa winyikel. Yiyukish yiney yiletin kashinsh ka ranaken ra Nzamb, katusotidinay, ni muchim wend wa kupan.

²⁴ Kudi yom yivud yitukutwisha kwilejin ku Mafundish ma pa Mukandu. Malejan kushalijan akumashinshikin mu mitu ya milong yaad yilondwilaku ey. El tushinshikinany mutapu tukutwisha kusadin mazu minam ma Yesu Kristu.

Ov, Ukutwish Kwakul?

• Mulong wak akweta “kuswir kwa yom ya Nzamb mu michim” ayukin?

• Mayingishin ik ma musangar makwetau “antu itudishina”?

• Mulong wak in Kristu asanger ap anch ayizengodin?

• Kuyuk ik kwalonday Yesu ku kusangareshina pakampwil?

[Chipich chidia pa paj wa 5]

Yom chidivu yiletininga musangar yakasikeshidinay Yesu yidi ya ukwash ilel unou mudi muyadinga pasak

[Chipich chidia pa paj wa 7]

Njil yiwamp ya kumekeshin riy yidi ya kuyilej antu akwau uyakin wa Bibil