Ov Ukat Kwiyijidish Amwiney Kutang ni Kufund?
1 Kwilej nich chitongijok cha kwikal nich ronganyin rakin ra Nzamb ni jintong jend kwitin kwikal muntu wilejinaku mu chisik kanang. Antu avud ashikena kal ku kwijik anch kwilej kutang ni kufund yidi nfungul yikeza kufungul njil ya kusal yivud mu difukwil dia Yehova Nzamb. (Kuj. 1:3) Avud adi antu amwing ileja kutang ni kufund kusutin ku tulas twa kwilej kutang ni kufund tutenchikinau mu yikumangen yivud. Mwi ndond chitwishikina, akat kusadilang broshir Iyijidisha Kutang ni Kufund (ay-DR), mulong wa tulas twinetu. Chamekan kal kwikal njil yimwing yiwamp ya kwilejin kutang ni kufund mu chisu chimwing chiswimp nakash.—1Tim. 4:13; Mat. 24:45.
2 Mutapu wa Kutenchik Tulas twa Kwilej Kutang ni Kufund: Tukwet pinap yikunku yikemp yidiokila mu broshir winou mulong wa kutukwash mutapu wa kutenchik tulas twa kwilej kutang ni kufund: “Mud kamu ku Shikol ya Mudimu ya Uteokras, in kulejan abatishinau kal ni akad kubatishiu akutwish kwifundish ku shikol ya kutang ni kufund. Anch amakurump aman anch chidi cha usey kurijek kalas kamwing ap tuvud mulong wa kutang ni kufund, afanyidin kutek muntu umwing chifuvu chakwel atakela tulas. . . . Chiwapidil anch akadivar akwata chisend chinech cha kufundish. Pakwez, anch kwikil mukadivar ukutwisha kutakel kalas, akutwish kumwinkish nambaz umwing chifuvu chisend chinech. . . . Amakurump akutwish kumwit nambaz kutakel kalas ka anambaz ni /ap kalas ka ansand nau ayangadim akad kubatishau. Anch nambaz waswinken pa ndond ya mukadivar mu ukaliweny winou wa kufundish, ufanyidin kudjal chitambal ku mutu. Chikwikal cha ukwash, ndond chitwishikina, anch tulas twikalaku tupamp twaad ap tusatu ku rubing chakwel in kwilej atwisha kuya kurutu mau mau. Kurutu kwa kuya ku mafundish makwau, akumwinkish mwin kwilej midimu ya kusal ku chikumbu, midimu yiney akuyital kud mulej kwinsambishil kwa difundish dikulondula. Chiwapidil kusal shikol yiney pa chisu chimwing chiyifanyidina in kwilej avud. Amwing akat kwanganang tulas mu yirund yikemp yikemp ni kufundish kurutu kwa Dilejan dia Buku dia Chikumangen. Akwau akat kwanganang tulas ni kufundish pa chisu cha Shikol ya Mudimu wa Uteokras. Chisu ni ndond ya shikol ya kutang ni kufund akat kuyitekang kud chisak cha amakurump mu chikumangen.”
3 Sakatang wetu, Yehova Nzamb, watutanga nich ukaliweny ukwamushena wa kutang ni kufund. Pakwez, ukaliweny winou ukatap kwez pakad kusal usu. Chiyukish chijim cha kwilej kutang ni kufund chidi kutwish kutesh Dizu dia Nzamb ni kuziyil ku mafundish ma Nzamb: “Ukez kutongijokang muten ni uchuku.”—Joshua 1:8.