Ov Chikumangen Chen Chikwet Teritwar Mujim?
1 Kudiosh kamu ku misumb ya Yudeya djat ni mu mal ma Galaliya, Yesu wapana kamu nawamp uman ndond yawonsu mu teritwar mujim wa Isarel. (Marko 1:38, 39; Luka 23:5) Tufanyidin niyetu kand kuyilej antu avud mud chitwishikina rusangu ruwamp. (Marko 13:10) Pakwez, winou ukutwish kwikal mudimu umwing ukash. Mulong wak?
2 Yikumangen yivud yikwet teritwar ukweta mal madia kulemp ni musumb ujim, kushik ku yitot ya akilometre. Yikumangen yikata kusadil mazu ma wingendj yikutwish kusadil mu jindond jikweta antu avud ja misumb yijim, ni kukimb antu akata kulond rudim rau. Ov, chom ik lel tukutwisha kusal mulong wa kuyikwash antu ashichinga mu materitwar minam majim kwilej uyakin piur pa Yehova, Yesu, ni piur pa Want?
3 Irijekany Nawamp: Kalam’a mudimu ni nkwash’a mudimu ukata kutal mudimu wa teritwar afanyidin kushinshikin usu usadila chikumangen mulong wa kuwanyish nawamp mudimu. Pamwing ap akutwish kusal program mulong wa machuku ma pakampwil ma Diampos pakutwishau antu avud kusutish dichuku dia kabuj mu mudimu. Chisu cha kusadil mu materitwar madia kulemp, salany program wa kusutish machuku mavud mu mudimu wa chingand anch chitwishikin, ni kusend yakudia ya pa chisu cha midi. Ukutwishany kukumanganany mulong wa mudimu pamanch nakash kupandakan muukata kusalany machuku mawonsu mulong wa kwikal nich chisu chiwanyidina cha kwend kuya ku teritwar ap kusadil chikumangan cha mudimu wa chingand piswimp nich teritwar muukusadilanya mudimu. Ufanyidinany kwikal in kulejan akemp mu motak chakwel anch antu awonsu atwisha kwikal nich midimu yivud yiwanyidina kusal mu kulejan. Tenchikany kusadil mu materitwar madia kulemp pikudia chisu chimwing chiwamp ni mikadil ya njil piyichiwapina.
4 Antu akata kusadil mu materitwar mukatau kulond rudim ra wingendj akutwish kwipuk kushadish chisu chifanyidina nich kwikal ni list wa katat wa majin ni ma adres ma antu ayilau ni kutal ni kart wa teritwar wa katat. Tenchikany materitwar chakwel anch chirund chikusala mudimu chikutwish kushik ku ma adres mawonsu mu teritwar mwawonsu wendidilau.
5 Talany nawamp anch ukwetany uvud wa mikand ufanyidina. Anch teritwar akat kumusadilang pa chipatu, chikwikal cha manangu kusha trakt ap gazet umwing mukur ku yikumbu ya antu akad kwikal kwol kwau. Anch ukwetany trakt Aimeriez-vous en savoir plus sur la Bible? mu rudim ren, mupanany kud muntu mwin mwawonsu ukusankananya ni kushap umwing ku chikumbu kwakad antu.
6 Sadilany Kamu Nakash Pamwing: Kusadil mudimu mu teritwar umwing mujim kwitining kusadil pamwing kwa muntu ni muntu mu chikumangen. Anch kudi kuswir kwa kuya nich motak, antu awonsu ayila pamwing akutwish kusang nfalang ja kuland kasarony. Chifanyidin kusadil manangu anch watanany in chikumbu asotina kwisamb. Ijikany anch kudi kuswir kwa kuyishiken antu awonsu adia mu teritwar, ni yitonginanyaku amboku antu akuchingedinany mu motak udiany nau chirund chimwing. Anch usotin kudandamen nich misamb ni muntu umekeshina kusanger chisu chilemp, ov ukutwishap kurijek chakwel antu akwau a mu chirund atwisha kudandamen nich mudimu wa chingand?
7 Salany yitenchik yifanyidina mulong wa kuchirikin kand chakwel kuyital antu amekeshina kusanger. Piufundinany ma adres, pakishany kwit nimero wa telefon wa muntu umekeshina kusanger chakwel ukutwishany kwisamb nend ni kupan uman kusutin ku telefon. Anch jinjil ja mal ma kumakunku jikwetap majin ap anch yikumbu yikwetap manimero, ukutwishany kufwatul nawamp kart umwing ni kufund yirumburil ya mutapu wa kutwish kumutan muntu wasangaredina chisu cha kuchirikinamu.
8 Tukwet chisend cha pakampwil cha kuwanyish yany ya Yesu: “Piukushikany mu musumb ap mu ul, sotany muntu wa kashinsh uwanyidina kukwakany. Shakamany nend djat ni piukudiokilanya kwi ndond yiniya”! (Mat. 10:11) Chakin kamu Yehova ukez kuyukish usu wey chiusotila kwipan mu mudimu winou ujim ukweta yiyukish!