Ov, Ukwet Teritwar Wey?

1. Ov, teritwar wa muntu ipend chom ik?

¹ Teritwar wey yidi ndond yikwinkinau kusadil. Yifanyidin kwikal ndond yiswapela kushikang swa chakwel kulejan wikalap nchik amwiney ap pamwing ni mwin kulejan mukwau. Ap anch chidi cha ukwash kukwatikesh yitenchik ya chikumangen mulong wa kulejan pamwing ni akwau anch chitwishikin, kwikal nich teritwar wey wa kusadin mudimu chisu chikwau kukutwish kutukwash kupan uman nawamp, nakash kamu mu yikumangen yikweta teritwar mujim nakash.​—⁠Mid. 10:⁠42.

2. Yiyukish ik yimwing ukutaninamu anch ukwet teritwar wey?

² Yiyukish: Antu amwing atana yiyukish yikwau ya kulejan mu teritwar wau udia piswimp ni ndond yau ya mudimu chisu cha midi ap kapamp kamwing kamu kupwa kwa mudimu. Antu akwau asangera kusadil pamwing mudi dijuku piswimp ni kwol kwau mu chisu chimwing ap kupwa kwa Dilejan dia Buku dia Chikumangen. Chawiy lel, kuchirikinamu kusu ni malejan ma Bibil utanina mu teritwar wey udia piswimp, makusheshap chamwamu nfalang, usu, ni chisu. Mulong yom yivud yikutwish kusadik mu kachisu kakemp, kwikal nich teritwar wey kukutwish kuyikwash amwing kusal mudimu wa uchibol nkwash chisu ni chisu ap kusambish mudimu wa uchibol wa rawonsu. Chikwau kand, kusal mudimu mu teritwar wey ni kwijik nawamp antu adiamu kukutwish kuyisal atuchingejina ni kutukwash kwambatanish minsamb yetu nich maswir mau, ni kusal anch mudimu wetu wa kulejan wikala ni yibudikin yiwamp.

3. Yibudikin ik yamanay chibol umwing watambula teritwar wend?

³ Mband umwing chibol wakasikeshau kudi kalam wa munyimuku mulong wa kwikal nich teritwar wend urumburil anch: “Nitiyija chiyul chinech ni mu kusut kwa machuku nijikijana nawamp ni kwikal nich urund nau antu a mu teritwar wam. Natenchika yisu ya kusal kuchirikinamu kwambatan nich maswir mau. Mudi chibudikin, kuchirikinamu kwam kwiwejinaku kusambish pa 35 kushik ku 80 mwi ngond umwing, nikwet malejan ma Bibil sambwad.”

4. Mutapu ik ukutwisha kutambul ni kusal mu teritwar wey?

⁴ Mutapu Ukutwisha Kutambul Teritwar: Anch usotin kwit teritwar wey, muleja nkwash’ a mudimu ukata kutal mudimu wa teritwar. Ikal nich want ipey wa kumutazuk mwin kulejan mukwau chakwel asala ney pamwing, ni anch watan ku yikumbu kwakad antu ufanyidin kufund nawamp. Ufanyidin kusal usu wa kupwish teritwar wey mu angond anying. Anch chikukasikedin kusal mwamu, ukutwish kwit ukwash wa kalam wey wa Dilejan dia Buku ap antu akwau. Kwisudiel kwa angond anying, ukutwish kuchirish teritwar upwila ap kwit kusadinamu kand. Pakwez, ufanyidinap kushal rawonsu nich teritwar umwing pakwez muchirisha mulong antu akwau akutwish kumwit. Anch udi mu chikumangen chikweta teritwar mukemp ni chitwishikinap kutambul teritwar wey, ukutwish pamwing ap kwit kachikunku ka teritwar kudi kalam wey wa dilejan dia buku.

5. Ov, chom ik chitinau chakwel kuwanyish mudimu wetu wa kulejan?

⁵ Mudimu wetu wa kulejan “ku mangand mawonsu” udi mudimu umwing ujim. (Mat. 24:14) Witin kutenchik kuwamp kwa kusal usu. Kuwejaku ku kulejan pamwing ni antu akwau, kulejan mu teritwar wetu kukutwish kutukwash kulejan rusangu ruwamp kudi antu avud.