Tusangerany Nich Yom Tukweta
1 Mifund yitubabeshin chakwel kuwanyish maswir ma yom ya ku mujimbu mulong wa yid ya chikumbu chetu, pakwez chinech chifanyidinap kwikal rutong retu ra kusambish mu mwom. Yom ya muspiritu yawiy yifanyidina kwikal pa ndond ya kusambish. (Mat. 6:33; 1 Tim. 5:8) Chikasiken nakash kwikal isikena mu ‘yirung yiney ya machuku ma mar makash.’ (2 Tim. 3:1) Chom ik chikeza kutukwash kusal mwamu?
2 Twitiyany Chitongijok cha Baibel: Dizu dia Nzamb dituyudil anch kulondul nakash mapit kukutwish kulet kusheshik kwa muspiritu. (Mul. 5:10; Mat. 13:22; 1 Tim. 6:9, 10) Mu chirung chinech cha mar, chikutwish kwikal cha chak kud umwing ni mukwau pakach petu kwikal wiyakamishina nakash nich mudimu wa ku mujimbu ap kubangin kusot kwa nfalang ni kutek mijikit ya muspiritu—yikumangan, kwilej, ni mudimu wa kulejan—pa ndond ya kaad mu mwom wetu. (Luka 21:34-36) Pakwez, Baibel uyudil anch: “Chifanyidin etu kusangar anch tukwet yakudia ni yidjal.”—1 Tim. 6:7, 8.
3 Chinech chirumburikinap anch ayitin in Kristu kwikal nich mwom wa uzwendj. Pakwez chikat kutukwash kujingunin yidia chakin kamu maswir metu ma yom ya ku mujimbu—yakudia, maswin, ni kwikal nich chikumbu cha kushakam chifanyidina. Anch tukwet yom ya mwom yiswiridikina, kitufanyidinap kudandamen kulondul pakad kuziy yom yivud ya ku mujimbu ni yipandikena kuwap. Chisu tutongidina kuland chom kanang ap kwikal nich mudimu ukwau, chikwikal cha manangu kwiyipul ayinetu anch, ‘Ov chinech chiswiridikin kamu chakin?’ Kusalang mwamu kukez kutukwash kutesh chiyul chipepidilau: “Kangal ris ra nfalang rakuyikelany, pakwez sangarany nich yom yiukwetany.”—Heb. 13:5.
4 Anch twachingejin mudiay Yehova, ndiy ukez kutuyukish. (Jinsw. 3:5, 6) Ap anch tufanyidin kusal mudimu ukash chakwel kutan yisakin ya dichuku ni dichuku, kitufanyidinap kukungin usu wetu wawonsu pa yom yiney. Twikala nich yom yikemp ap yivud, twikamedin padiay Yehova chakwel awanyisha maswir metu. (Filp. 4:11-13) Mud chibudikin, tukwet musangar wa Nzamb pamwing nich yiyukish yikwau yivud.
5 Twimburijany Ritiy ra Antu Akwau: Nvaj umwing mujich wadinga ulidila mwanend mband mwi njil ya uyakin wapipeja mwom wend pakemp-pakemp. Ap anch ndiy wadinga ni chikumbu chimwing chiwamp, ndiy wasoka mu chikumbu chikemp ni kupwa wasoka mu chikumbu cha antu avud. Chinech chamutwishisha kukepish asaa a midimu yend ya ku mujimbu chakwel ndiy atwisha kupan chisu chivud mu mudimu wa kulejan. Mwanend mband pakulay ni kwachik, maku watambula dipwasho ku mudimu kurutu kwa mivu yitinau, ap anch chinech chamuletina kuburen kwa yisakin yend ya nfalang. Katat nambaz wetu washiken kal mu muvu wend wa makum sambwad chidiay chibol wa rawonsu ni kand kal ashikena ku kwinan piur pa milambu ya yom ya ku mujimbu yapanay mulong wa kutek yisakin ya Want pa ndond ya kusambish mu mwom wend.
6 Mukurump umwing ni mukajend asala mudimu wa uchibol mivu yivud padingau ni kulil an asatu. Mud dijuku, awiy ileja kusanger nich kuwanyish maswir mau pa ndond pa kuwanyish yom yisotilau. Mukadivar ushimunin anch: “Twadinga tufanyidin kwikal nich mwom uswapela nakash. Ap anch twadinga ni yisu yimwing ya mar, Yehova wadinga ni kutwinkish chisu chin chawonsu yitwadinga tuswiridina. . . . Panadinga nikuman dijuku diam dikat kutek yisakin ya muspiritu pa ndond ya kusambish, natonga anch chom ni chom chidi pa ndond yach mud muchifanyidina, ni nading ni chitongijok chiwamp cha kuwanyish.” Mukajend uwejidin anch: “Panadinga ni kumuman [nfumwam] ukwatiken nakash nich milong ya muspiritu, nova musangar nakash.” An ni yawiy akwet musangar anch anvajau akwata mupak wa kumusadil Yehova chisu chin chawonsu.
7 Kud antu in awonsu akata kutond njil yiney ya kudandamen kud Nzamb pa ndond pa kulondul mapit ma ku mujimbu, Baibel ukanin yiyukish yivud katat ni mu mwom wezina kurutu.—1 Tim. 4:8.