Ukutwish Kwikal Nich Mapit!
1. Mulong wak kushinshikin mudimu wa uchibol wa rawonsu?
1 Ov, ukimbin musangar ujim ni kusal yom yijim-yijim mu mwom wey? Ov, ukat kutan musangar ni mazang mu kuyikwashang antu akwau? Ov, usotil umusadila nakash Yehova? Anch wakul anch mwawiy ku chimwing cha yipul yiney, komb ukutwish wasal mudimu wa uchibol wa rawonsu. Mwawiy kamu, Yisend ya dijuku ni yidia mu Mifund, pamwing ni yikangesh ya ku mujimbu, yidi yom ya kushinshikin.
2. Jimbulaku mapit mamwing ma muspiritu misakidinau ayibol a rawonsu.
2 Mikand yapepilau Nzamb yafunday Salomon yilondil anch chiyukish cha Yehova chiletining dipit. (Jinsw. 10:22) Nlel unou, yiyukish ya Yehova yiletining bil mapit ma muspiritu. Ayibol a rawonsu isakidin mapit mavud. Chilakej, awiy akweting musangar ujim wa kuyinkish antu akwau mudi mukatau ‘kulam yisu ya muten’ pa yom yau yisadilau. (Kol. 4:5; Mid. 20:35) Yehova usangaredin midimu yau ya rukat. “Yipau [yiney ya] mwiur” yikezap kuwa usey. (Mat. 6:20; Heb. 6:10) Chikwau kand, chiudianya ayibol lamany “dis . . . didi zwang” ni muchingejinany Yehova akwinkishany yiuswiridinanya, urund wau ni ndiy ukukasikan.—Mat. 6:22, 25, 32; Heb. 13:5, 6.
3. Kushalijan ik kudia pakach pa kusot mapit ma muspiritu ni ma ku mujimbu?
3 Kusot mapit ma ku mujimbu chisu ni chisu kushikijining ku “kwisupul kwa maku mayimp.” (1 Tim. 6:9, 10; Yak. 5:1-3) Pakwez kichidingap mwamu nich chiyukish cha Yehova. Pakatau ayibol a rawonsu kusutish chisu kanang cha chisu chau mu mudimu, chikat kuyikwash alama kwisikan kwau muspiritu ni ikala nich kuman kuwamp kwa yom yikweta usey. (Filip. 1:10) Mukadivar umwing injenyer walika mudimu wend wadinga umusedininga chisu chilemp chakwel asala mudimu wa uchibol. Walonda anch: “Mudimu wam nasalang wading wa yakamish. Pakwez uchibol ukwetapu yakamish. Katat nikat kuyikwash antu ni kuyifundish uyakin. Mudimu winou usangareshin chipandakenamu mulong wa kuyilej antu akwau uyakin.”
4. Mutapu ik uyukinau ayibol a rawonsu papaninau yiyukish kudi antu akwau?
4 Adi Yiyukish Kudi Antu Akwau: Nlel unou, etu awonsu turishin nich “yom yikash.” (2 Tim. 3:1) Antu kwawonsu kudiau aswirikedin ruchingej. In kulejan a Want asanger payimenau ayinau antu aburedina ruchingej nakash aswimp yifu yau asangar ni itiyijin rusangu ruwamp. Musangar ujim mud ik mulong wa ayibol a rawonsu, asadining usu wa kuwanish asaa 800 muvu ni muvu mulong wa mudimu winou wa kupandish mwom!—1 Tim. 4:16.
5, 6. Yik yikutwisha kukukwash wikala chibol wa rawonsu?
5 Ov, watongidinap kal nakash chakwel usala mudimu wa uchibol wa rawonsu? Kukutwish kwit kulam “chisu cha muten” mulong wa yom yikweta usey. (Efes 5:15, 16) Mwamu mwasalau antu avud ni aswapesha mashakamin mau, kwayitwishisha akepishaku chisu chasalangau mu mudimu wa ku mujimbu chakwel ipana nakash mu kulejan rusang ruwamp ra Want. Ov, ukutwish watenchik milong yey chakwel ubombakan nau?
6 It manangu kudi Yehova chakwel utenchika program muwamp. (Yak. 1:5) Yiyukish ik ukutwisha kuchingejin kutambul? Mapit mavud ma muspiritu! Yehova ukutwish kukuyukish kand ku mujimbu ku yawonsu uswirikedina. (Mat. 6:33) Awonsu akata kumupak Yehova mu mutapu winou akutambul “yiyukish yivud ya mitapu ni mitapu.”—Mal. 3:10.