Ikalany Ija Kwisamb!
1 Chakwel kuwanyish mudimu wetu wa kulejan ni wa kwikadish in kwilej, tufanyidin kupan rusangu kud antu akwau. (Mat. 24:14; 28:19, 20) Kwambamb kukutwish kwikal kukash ap pakach pa arund. Chom ik chikutwisha kutukwash kuyishiken angendj nich rusangu ruwamp?
2 Kudiokal ku Wingendj Kushik ku Kwikal Murund: Pakish amwiney kwitek pa ndond ya antu wisambina nau mu mudimu wa kulejan. Mu mangand m’ilel, choviken nawamp anch antu amwing akutwish kuman mu mutapu uyimp, ap kand kwikal nich wom, wa angendj. Chinech chikutwish kukangesh mambamb. Mutapu ik lel ukutwisha kupandakan wom ukutwisha kumekan kapamp ka kusambish kud antu usankanijadina nau? Kurutu kamu kwa kulond dizu ap dimwing, njil yimwing yitukata kwisambin yidi kumekan kwa kwikepish kwa untu wetu. Kudjal kuwamp ni kwitudish kwetu yikat kukwash kupwish wom.—1 Tim. 2:9, 10.
3 Njil yikwau yikata kutwishish mambamb yidi mwikadil wa kulik kwiyakamish, mwikadil wa urund. Chinech chikat kukwash kuyikadish antu akwau iyova nawamp ni kuyikadish tayad kutesh nawamp. Pa chinech, kwirijek kuwamp kudi kwa usey nakash. Anch twij nawamp kamu yitusotila kulond, tukwiyakamishap nakash. Ni mwikadil winou wa chisambu cha mu manangu ukutwish kuyipwitin antu ku uruu wetu. Mband umwing walonda piur pa kumwendil kud Kaman anch: “Yinivurikinaku mulong wa chifu chend cha masip, yadinga chisambu cha manangu. Nashimoka nakash.” Chinech chamwazurila mband winou njil ya kutesh rusangu ruwamp.
4 Ngikadil Yikata Kupwitin ku Kutesh: Tufanyidin kutal chakin kamu yisakin ya antu akwau. (Filp. 2:4) Njil yimwing ya kusal mwamu yidi kulik kuyikelang misamb. Chakin kamu, mambamb mitining kand kutesh. Chisu tuyitina in kututesh kupan yirumburil yau ayinau ni kuyitesh nich kusanger nakash yirumburil yau, akat kwiyov anch tukat kuyitek muchim nakash. Chawiy lel chisu chilondilau in kukutesh, kangal kwakul swa ni kuwejin yom yindjing ku misamb yey. Yijikitisha anch ukutwish kuchisal nich muchim utok, ni pakish kwambatanish yiulondina nich yilondilau. Anch yilondilau yilejen chom kanang chiyikwatina ku michim yau, ambatanish misamb yey nich milong yikwetau.
5 Kwikepish ni kwitudish kwa manangu kukat kutwal mambamb kurutu. (Jinsw. 11:2; Midimu 20:19) Antu adinga ni kumushejin Yesu piswimp mulong ndiy wadinga mwin ‘kushimpish muchim ni kwitudish.’ (Mat. 11:29) Ku mutambu ukwau, mwikadil wa kwitutul nakash ukat kukangeshang mambamb. Chawiy lel, ap anch twitiyijin anch tukwet uyakin, chikwikal cha manangu kwipuk kulond kusansena.
6 Chikwikal mutapu ik anch yilondilay muntu yimekeshin yitiyij yakad kwambatan nich mafundish ma Baibel? Ov tukwet chisend cha kumwonan? Mwawiy, pakwez tufanyidinap kuchisal kapamp kamu ka kusambish. Chisu chivud chiding cha ukwash kutungin pa yitongijok yambatena nich ya mwin kututesh kurutu kwa kwambambin mafundish ma Baibel makutwishay kuman mud makasikena kwitiyij. Chinech chitining kushimpish muchim ni kubabal. Paul washa chilikej chiwamp pa mulong winou chisu chapanay uman kurutu kwa in kurumburish a ku Aropagus.—Midimu 17:18, 22-31.
7 Chipandikenamu yawonsu, rukat ra kashinsh rikez kutukwash kwikal nich misamb yikata kusongish mabuj. Mud chadingay Yesu, tufanyidin kuyovil riy antu ‘aziyila ni kujilijil mudi amikoku akad kafung.’ (Mat. 9:36) Chawiy chinech chikata kutubachik kuyitwadil rusangu ruwamp ni kuyikwash kwandam mwi njil ya mwom. Uruu wetu udi wa rukat, chawiy lel tudandamenany kuulejan nich rukat. Anch twasal mwamu, tumwimburijin Yehova Nzamb ni Yesu Kristu—in Kwisamb a kusambish mu mangand.