Mekesh Kusanger kwa Pakampwil —Ku Kwikal Wirijekina
1 Kwirijek kuwamp mulong wa mudimu kutukwashin kuyisanger antu akwau pakampwil. Mutapu ik? Anch twirijek nawamp, tukwiyakamishap nakash nich minsamb yetu ni mwamu tukutwish kuta muchim nakash kudiay mwin chikumbu. Chikwau, kutukwashin kupwish wom ni kututwishish kulond yidiokila mu muchim. Mutapu ik, lel, tukutwisha kurijek minsamb ya ukwash?
2 Sadil Minsamb Yifanyidina: Tond yimwing ya minsamb yiyudilau mu Mudimu Wetu wa Want wa Chiwong 2006 yifanyidina mulong wa ndond yey, ni shinshikin mutapu ukutwisha kuyilond mu mazu mey amwiney. Londwish nich teritwar wey. Chilakej, anch ukat kusankan chisu ni chisu antu a relijon kanang ap a muchid kampand, tong mutapu yikutwisha kuyisangaresh minsamb yey. Kulondwish minsamb yey kukwatijan nau antu ulondishina kumekeshin kuyisanger kwa kashinsh.—1 Kor. 9:22.
3 Chisu usambishina kusadil minsamb, dandamen kuyiwapish. Mulong mazu ma kusambish madi ma usey nakash, shinshikin mutapu wakwilau antu ku mazu mey ma kwinsambishil. Ov, mutu wa mulong uyisangareshin? Ov, yipul wipwila ayakwil? Anch bwat, swimp kushik ni pa ukutanina minsamb yifanyidina.
4 Yikwashina Kuvurik: Avud chiyikasikedin kuvurik minsamb chisu chidiau ku chis. Anch umen anch mwamu chidia, ov, wapakishinap kal kwiyijidish ap kusutirik yikunku wisambidina dizu piur ni muntu mukwau? Chinech chikutwish kukukwash kulam nawamp yitongijok mu manangu ni kuyilond mutapu uswapela, wovikena. Chikutwish kand kukurijek chakwel kushinshikin yakul ya antu kushalijan.
5 Chikwau chikwashina kuvurik kudi kufund minsamb mu wiswimp pa dipaper ni kukendjikap dis kurutu kwa kushik ku chis. Amwing amen anch chivurish chinech chiswimp chiyikwashin kwikal akad wom ni kutwish kwambamb nawamp nau antu. Mu mitapu yiney, kwirijek kuwamp kukutwish kutukwash kumekesh kuyisanger akwetu pakampwil ni mwamu kuwapish minsamb yetu ya rusangu ruwamp.