Mutapu wa Kusadil Minsamb ya Chilikej Yilejenau
1. Ov mutapu ik tufanyidina kuman minsamb ya chilikej yiletinau?
1 Minsamb ya chilikej yilejenau mulong wa kupan magazet metu ni mikand yikwau yikat kubudikin chisu ni chisu mu Mudimu Wetu wa Want. Chisu tuyila mu mudimu wa kulejan, tuswiridinap kuchirikin minsamb yiney yiyudilau mud kamu muyifundinau. Ayitekin mulong wa kutwinkish chitongijok chijim cha yom tukutwisha kulond. Tukutwish kwikal in kutwish nawamp anch twasadil minsamb mu mazu metu ayinetu. Kwimekesh kwetu mu mutapu wa chivadik kukwashin chakwel kumusangarish mwin chikumbu ni kumekesh win-yakin ni kashinsh.—2 Kor. 2:17; 1 Tes. 1:5.
2. Mulong wak tuswiridina kushinshikin yaku ya ndond tudia chisu turijekina minsamb yetu?
2 Ambatanish Minsamb Yey: Mutapu wetu wa kulejan rusangu ruwamp ukwatiken nakash nich yaku ya ndond. Ov ukutwish kumulangwish mwin chikumbu ni kusambish kwisamb nend, anch antu mu teritwar wey asotil usambisha minsamb pakad kulabijok? Chinech chishalijadin ndond ni ndond ni kud muntu ni muntu. Kujingunin kudi kand kwa usey mu kusadil kwa yipul. Yipul yifanyidina mu jindond jimwing yikutwish kunenganeshan mwi ndond yikwau. Chawiy lel, tufanyidin kusadil kujingunin kuwamp ni kwambatanish minsamb yetu kulondulijan ni yom yitiyikina ndond tudia.
3. Mulong wak tufanyidina kushinshikin mwikadil ni yitongijok ya antu twisambina nau?
3 Chikwau kand, tuswiridin kushinshikin mwikadil ni kutong kwa antu mu teritwar wetu chisu twirijekina mulong wa mudimu wa chingand. Chilikej, mutapu ukutwisha kwisambin Mateu 6:9, 10 ni mwin Katolik ushalijadin ni mutapu ukutwisha kuchisal ni muntu wakad kwijik malembil ma “Tatukwetu.” Nich kutongijokin kurutu, tukutwish chisu ni chisu kwambatanish minsamb yetu chakwel yiyisangarish antu tusankena mu mudimu.—1 Kor. 9:20-23.
4. Mulong wak kwirijek kudi kwa usey?
4 Ap anch twatong kusadil nakash ap pakemp minsamb ya chilikej mud yifundinau, kwikil yikuswinkana kwirijek kuwamp. Tufanyidin kutang rusangu ap mwimbu ututongina kupan ni kukimb manans makutwisha kusosil kusanger. Kupwa tuwejina yiney mu minsamb yetu. Kwiyijidish nich rusangu ruwamp ridia mu mikand yetu kwawiy kukutwisha kutukwash kuyipan nich musangar.
5. Mulong wak tufanyidina kurijek minsamb kushalijan, ni mutapu ik tukutwisha kusal mwamu?
5 Mazu Makwau ma Kusambish Nich: Ov atwinkishin mbil ya kusadil ching kamu mazu ma kusambish nich malejenau mu minsamb ya chilikej? Bwat. Anch chikuswapedil kusadil mazu makwau ma kusambish nich ap mufund ushalijadina, yisadila. Nich kusadil magazet, kimb mitapu ya kwisambin jinsangu jikwau jidia mukach jikutwisha kwikal jisangarishina pakampwil mu teritwar wey. Anch minsamb ya mudimu wa chingand yikwikal yakumenaku ku Chikumangan cha Mudimu, akutwish kusal yitenchik chakwel kusadil mazu makweta yibudikin yiwamp mu teritwar. Mu mutapu winou awonsu akutwish kuyikwash kulejan rusangu ruwamp nawamp.