Mutapu wa Kurijek Kupan kwa Magazet

1. Mulong wak chiwapin kurijek mutapu wetu ayinetu wa kupan magazet pa ndond pa kukwat pa mutu mulad wa kupan uyudilau mu Mudimu Wetu wa Want?

¹ Ukutwish kwiyipul anch: ‘Ov, mulong wak tufanyidina kurijek kupan kwa magazet, mulong yiyul piur pa kupan magazet yikat kubudikin mu nimero ni nimero wa Mudimu Wetu wa Want?’ Ap anch antu avud amen anch yiyul yiney piur pa kupan magazet yidi ya ukwash, pakwez kwirijek kwa muntu ipend kudi ni kwawiy kwa usey. Mutapu wa kupan ukweta mabuj mu teritwar kanang ukutwishap kwikal ufanyidina mu teritwar mukwau. Chawiy lel, tudiap ashindidilau kusadin yiyul ya chilikej piur pa mutapu wa kupan magazet mudi kamu chiyilejenau kachom pa kachom. Anch twatond kusadin mulad wa yiyul ya chilikej, chiwapin kuyisadin mu mazu metu ayinetu.

2. Kutond mutu wa mulong wa kwisambin kwitin kand kusal yom ik?

² Tond Mutu wa Mulong: Anch wapwish kutang gazet, tondamu mutu wa mulong ufanyidina mulong wa teritwar wey ni ukusangareshina kamu nakash. Kashinsh key ni chirungil ukwikala nich pa kulejan mutu wa mulong winou yikutwish kumubachik muntu wisambina nend kusot ni ndiy kutang mutu wa mulong winiwa. Ap anch ukez kwisambin mutu wa mulong umwing uyisangareshina antu avud mu teritwar wa pol pen, uwapidil kand kwijik milong yisambidinau mu mitu ya milong yikwau yidia mu gazet upanina. Chinech chikez kukukwash kuswimp minsamb yey anch watan muntu ukutwisha kusanger nakash mutu wa mulong ukwau udia mu gazet.

3. Mazu ma kusambish nich ma mutapu ik ufanyidina kusadin chakwel kwikal ni yibudikin yiwamp?

³ Ipul Chipul: Kupwa, rijek kamu nawamp mazu mey ma kusambish nich. Mazu mey ma kusambish nich madi ma usey nakash. Chiwapin kumwipul muntu wisambinany nend chipul chitongishina chakwel kuvuvurish kusanger kwend mu mutu wa mulong watondang kwisambin. Yipul ya kwijik yitonginay muntu yiding kamu yiwamp nakash. Kangal kumwipul muntu wisambinany nend yipul yikutwisha kumubachik kuchidij yitongijok yend ap kumwovish kuyip.

4. Wisu ukwash wa kumutangin muntu wisambinany nend mufund pichitwishikina?

⁴ Tang Mufund: Kwisudiel, tond mufund wa kutang anch mikadil ya muntu wisambina nend yikutwishishin, pamwing ap ukutwish kutang mufund udia mu mutu wa mulong ukeza kwisambin. Kutang mufund kukez kumukwash muntu wisambinany nend kuman anch uruu wetu udiokil mu Dizu dia Nzamb. (1 Tes. 2:13) Mufund ukez kumwinkish kand uman ap anch walik kwend kutambul magazet. Amwing avuvurishin kal kusanger kwa muntu wisambinau nend mu kutang mufund kurutu kwa kumwipul chipul. Ukutwish kusadin mufund nich kulond anch: “Nading nisotin kwijik yitongijok yey piur pa yilondilay Bibil mu verse winou.” Chad lel pwitin yitongijok ya muntu ku mutu wa mulong udia mu gazet ni kwisambin mu wiswimp mulong wa kuvuvurish kusanger kwend kurutu kwa kumwinkish gazet.

5. Yany ik ya dishin ufanyidina kuvurik mu manangu pa wirijekina chakwel kupan magazet?

⁵ Kwikil chijil kanang chitekinau piur pa yitukutwisha kulond pitupanina magazet. Chisu chivud, chiding chiwamp kulond mu mutapu umwing uswapela ni wiswimp. Sadil mazu ukutwisha nawamp ni makutwisha kulet yibudikin yiwamp. Shinshikin pa usey ujim nakash wa magazet, ni ikal uzangurokina. Anch wirijek kamu nawamp, ukez kwikal kamu chifuvu mu kupan Chinong cha Kalam ni Réveillez-vous ! kudi “atondinau kal kupand kwa chikupu.”​—⁠Midimu 13:⁠48.