Ov Uwanyishinany Sens Mudimu Wen?
Buku wa Midimu, utulejin anch in kwilej a Yesu awanyisha mudimu wau nich ‘kupan sens uman’ kud antu piur pa Want wa Nzamb. (Midimu 2:40; 8:25; 28:23) Riner rawiy radinga chakin rutong ra mupostol Paul. (Midimu 20:24) Ov riner rawiy rutong ukweta chiudia kashalapol wa rusangu ruwamp? Ov mutapu ik ukutwisha kuwanyish rutong riner?
2 Twirijekany: Chakwel kutwish kupan uman umwing uwamp mu mudimu wa kulejan, chidi cha usey kwirijek nawamp. Chinech chidi kamu chakin pa chisu tupanina magazet, mulong makat kulondil chisu ni chisu mutu wa mulong kushalijan. Chakwel kutukwash kwikal awanyishinau, nimero winou wa Mudimu Wetu wa Want ulejen mutu usu wa mulong—mulong udia ku kamaku, ulejena chilikej cha mitapu ya mazu ma kupan nich magazet ma nsudiel, Tour de Garde ni Réveillez-vous! Akez kwisambin mutu wa mulong ufanyidina ukuyisangaresha antu avud mu nimero ni nimero. Ov mutapu ik tukutwisha kusadil mazu minam miswimp?
3 Tondany mutu wa mulong umwing utonginany anch ukwikal usangareshina nakash mu teritwar wen. Tangany nawamp yiyul yipaninau, fundany manans mafanyidina kusadil makutwisha chakin kuvuvurish kusanger. Kimbany verse umwing ujimbwilau mu gazet wambatena nawamp kamu nich misamb ni ukutwisha kumutangin muntu wisambina nend. Pwishil nich misamb yiswimp chakwel kumukasikesh muntu wisambinany nend kutang gazet, anch chifanyidin, murumburila mu mazu kanang anch ukutwish kupan mulambu wend mulong wa kukwash nich mudimu wa mangand mawonsu wa Atuman’a Yehova. Katat, chirikin kand mazu mey ma kupan nich uman.
4 Irijeka Chakwel Kusadil Baibel: Anch twasambel kwirijek nawamp, chitwishikin chisu chivud kuwejin verse kanang mu misamb yetu. In kulejan avud akweta ukaliweny wa kulejan atwishining kuchisal kamu nawamp nakash. Ov mutapu ik ukatau kuchisal? Akat kuyang ku chikumbu ni chikumbu nich Baibel mu makas, amulangwish mwin chikumbu, ni kulond anch:
◼ “Tukat kuyipul antu tusankena anch itiyijin chitongijok chinech . . . ” Tang Disambishil 1:1, kupwa ipul anch: “Ov witiyijin chakin kamu mazu minam?” Anch muntu witiyin, lond kand anch: “Niyam nitiyijin. Ov utongin kamu anch, anch Nzamb ndiy watanga yom yawonsu, ndiy udia dishin dia uyimp?” Chingel chakul cha mwin kwisamb ney, tang Mulej 7:29. Buril buku Ronganyin pa paj 71, ni tang paragraf 2. Mukasikesha kutang buku winou. Anch muntu wisambina nend kitiyijinap mazu ma Disambishil 1:1, mukasikesha kushinshikin buku La Bible : Parole de Dieu ou des hommes?
5 Tulondulany Kusanger Kwawonsu: Tukutwishap kuwanyish sens mudimu wetu anch tulondwilap piswimp antu amekeshina kusanger. Chisu tukweta misamb yisangareshina, tufundany dijin dia muntu ni adres wend, ap anch kamekeshinap kusanger mu kutang magazet ap mikand yikwau. Twikasikeshany kukudish kusanger kwamekeshinay muntu nich kuchirik swa wakad kulab. Kupwa, kangal twidjidjek kumwit kusambish nend dilejan dia Baibel.
6 In kwilej a mu mivu chitot ya kusambish ading ij anch Yesu wayinkisha mbil ya ‘kupan sens uman’ piur pend. (Midimu 10:42) Mbil yiney yimwing yitutadil kand niyetu, mulong yidi njil yimwing kusu tukutwisha kwikadish in kwilej. (Mat. 28:19, 20) Tusalany usu wetu wawonsu chakwel kuwanyish sens mudimu wetu. —2 Tim. 4:5.