Mekesh Kusanger kwa Pakampwil —Mu Kwikal Mwin Kulondwish
1 Mupostol Paul washa chilakej chiwamp mu kulondwish chisu chawonsu minsamb yend ya rusangu ruwamp nich mwikadil ni manangu ma in kumutesh. (1 Kor. 9:19-23) Tufanyidin kwikasikesh chakwel kusal chilik chimwing. Nich kushinshikin kukemp, tukutwish kulondwish nich minsamb ya chilikej yibudikina mu Mudimu Wetu wa Want chakwel kuwanyish maswir ma antu adia mu teritwar wetu. Chisu tusejina ku chis, tukutwish kujingunin yisotilay mwin chikumbu ni kuyandjik mu minsamb yetu. Pakwez, kuchidi kand mutapu ukwau tukutwisha kwikal in kulondwish mu mudimu wetu.
2 Tulondwishany Minsamb Yetu Nich Yilondilau in Chikumbu: Chisu tulejena rusangu ruwamp, chisu ni chisu tukat kwipul chipul ni kuyit in chikumbu kwakul. Mutapu ik ukata kuman chakul? Ov, ukweting chaku cha kujikitish kwa piur-piur ni kudandamen kwey nich minsamb warijekang? Ov, yiulondila yimekeshin anch ushinshikidin yilondilay mwin chikumbu? Anch wamekesh kusanger kwakin mu yom yilondilau antu akwau, ukutwish kusadil yipul yikwau nich nkeu mulong wa kujingunin yitonginau chakin. (Jinsw. 20:5) Mwamu ukutwish kutalikeshil pa milad ya uruu wa Want yitadila nakash yakamish ya mwin kutesh.
3 Chinech chitin anch tusota kwisambin yom yikwau pa ndond pa kwisambin yitwarijekang kal. Anch twasambish nich kushimunin mulong wijikena katat ni mwin chikumbu wajimbul rusangu rijikena ap chipul cha pakampwil chimwakamishina, kusanger kwetu kwakin kwa kuwanyish maswir ma mwin chikumbu kukutubachik kukasikeshin minsamb ya Bibil pa yom ya usey nakash kud ndiy.—Filp. 2:4.
4 Tulondwishany Minsamb Yetu: Chisu chipwilay mwin chikumbu chipul, tukutwish kuchiman cha ukwash kudandamen minsamb kupwa kwetwetu kukimb rusangu rukwau piur pa mutu wa mulong. Tukutwish kand kupan mabuku mashinshikidina nakash mutu wa mulong. Yiney yawonsu yimekeshin kusanger kwetu kwakin mu kuyikwash antu akwau kumwijik Yehova.—2 Kor. 2:17.