Kimb Mitapu ya Kulejan
1 Chikumangen cha Ukristu chikwet antu a mikadil yishalijadina nakash. Pakwez, tubombaken mu rutong retu ra kumushiman Yehova. (Kus. 79:13) Anch kuyelol ap mikadil yikwau ya mar yitukangeshin kwipan mu mudimu wa kulejan rusangu ruwamp, nchik lel tukutwisha kukimb mitapu ya kulejan?
2 Mu Mijikit ya Dichuku ni Dichuku: Yesu wasadilanga dichuku ni dichuku mutapu wend wa kushakam nau antu chakwel kupan uman. Wamuleja Mateu chisu chasutay kwi ndond ya kulambwishil yitad, Zakeu chisu chadingay mu weny, ni mband wa ku Samaria chisu chadingay ni kupim. (Mat. 9:9; Luka 19:1-5; Yohan 4:6-10) Mu mijikit yetu ya pichuku-pichuku, tukutwish ni yetu kuswimp mambamb ma chamwamu mikal uman kud antu twisambina nau. Kulam Bibil ku chikas, pamwing ni matrakt ap mabroshir, kukutukwash kwikal irijekina kulond ya ruchingej retu.—1 Pi. 3:15.
3 Ov, ubid ukukangeshin kwipan mu mudimu wa ku chikumbu ni chikumbu? Dimukin yisu chakwel kulejan uman kud amingang ezina ni kukutal ni antu umanijadina nau. (Midimu 28: 30, 31) Anch mikadil yikushichikin ku chikumbu chisu ni chisu, wapakishin kal kulejan uman wa ku telefon ap wa ku mukand? Nambaz umwing chisu ni chisu ukat kuyifundin yid ya dijuku. Ukat kufund yitongijok yikasikeshina ya Bibil ni yom yamanay kal chisu cha kulejan uman.
4 Ku Mudimu ap ku Shikol: Rusot retu ra kumushiman Yehova rikutubachik kand kukimb mitapu ya kukun mbut ja uyakin ku mudimu ap ku shikol. Mwin kulejan umwing wa mivu chinan wayileja ansand akwau a kalas yatangay mu Réveillez-vous ! piur pa ngond. Kupwa kwa kwijik kwisu kwadioshay rusangu, mulej wend wasambisha kwitiy Chinong cha Kalam ni Réveillez-vous ! pakad kusutish. Kwi ndond ya mudimu, anch twatek kamu kwetu kopi wa buku Chifundishinay Bibil ndond yikutwishau akwetu kumuman akutwish kwipul yipul yikutwisha kutushikij ku kupan uman.
5 Ov ukutwish kukimb mitapu ya kulejan mu mijikit yey ya pichuku-pichuku? Dichuku ni dichuku amboku mu kusadil nakash mikadil yetu, “tupeshany yakupesh ya kushiman kudiay Nzamb”.—Heb. 13:15.