Mushimanany Yehova Pichuku Pichuku
1. Chom ik chiyikasikeshinau atushalapol a Nzamb chakwel asala, ni mulong wak?
1 Mwant David walonda piur pa mupak wend wakwatay wa kumushiman Yehova “pichuku pichuku,” chikupu ni chikupu. (Kus. 145:2, 7, 21) Niyetu tukwet diyingish diwamp dia kumushiman Yehova pichuku pichiku.—Kus. 37:10; 145:14, 18; 2 Pita 3:13.
2. Ov, mutapu ik ukutwisha majuku kumushiman Yehova pichuku pichuku?
2 Mu Dijuku Dietu: Tukwet malejan mawamp machapau kal mitukutwisha kwisambin mu mambamb metu ma muspiritu pa chisu chitushinshikidina verse wa pichuku pichuku, pa chisu cha Difukwil dia mu Dijuku ni pa chisu chitwirijekininga mulong wa yikumangan ya chikumangen. Majuku mavud masadining usu wa kudil pamwing ap kapamp kamwing kusu pichuku pichuku. Chom chinech chikat kuyitwishish chakwel isamba patok, pakad kulond yom piur piur ni chiyinkishining mutapu wa kumushiman Yehova. Mambamb minam makad kuchingejin makatau kusambish anvaj makutwish mikal ukwash ukash mu kuyilil anau mu “kuyikand ni malejan ma Mwant.”—Efes 6:4; Kuv. 6:5-7.
3. Yisu ik yitukweta ya kumushiman Yehova pitudia ni akadivar netu?
3 Pamwing ni Akadivar Netu: Pitudia mu mudimu wa kulejan ap ku yikumangan ya chikumangen, tuding ni mitapu yiwamp ya kumushiman Yehova pamwing ni akwetu akaritiy. (Jinsw. 15:30; Filip. 4:8; Heb. 13:15) Anch etwawonsu twamukat Yehova mu chilik chimwing, chikutuswapel tulonda mazu mawamp ma kumujikitish Yehova mulong wa kuwap kwa muchim wend pa chisu chitukwisamba umwing ni mukwau.—Kus. 106:1.
4. Pa mikadil ik yiukutwisha kumushiman Yehova?
4 Pitwisambina ni Antu Akad Kwitiyij: Ap anch mikadil yikutwishap chisu chawonsu kututwishish kulejan mu mudimu wa patok pichuku pichuku, kuyilejang ap mu wiswimp ambay netu a ku mudimu, a ku shikol ni antu akwau atwombilamu piur pa Yehova ni antwend kukutwish kwakudish ruchingej mu michim ya antu akin. (Kus. 27:14; 1 Pita 3:15) Padingay mu weny mu avion, nambaz umwing watwisha kumulej uman muntu mukwau wadinga uyila mu weny wova anch amwongoj kal ni amukasikesha nich yom yateshay ni wamwinkisha nambaz adres wend ni nimero wa telefon wend chakwel asambishang kutazukijan. Mudi muyila ni kwiwejin kwa kanvundangesh mu mangand ni mikadil yiyimp nakash, antu a Yehova adandamedin kuyitwadil antu akweta matu ma kutesh ‘rusangu ruwamp, ra chom chipandakena kuwap.’ Chom chinech chiyinkishin antu akwau ruchingej ni kuyishikij ku kumushiman Yehova.—Isay 52:7; Rome 15:11.
5. Ov, mulong wak tukat kuswiriken kumushiman Yehova ni kuwanyishining chom ik?
5 Chikat kumusangaresh Yehova mudi ik pateshiningay atushalapol end akat kumushiman pichuku pichuku! Mudi muchidinga yitang ya Yehova yimekena yitwombilamu ey, niyetu tukutwish twamushiman pichuku pichuku mu majuku metu, mu chikumangen ni pa chisu twisambininga ni antu akwau akad kal kwikal akwetu tukata kumushiman nau Yehova pamwing.—Kus. 19:1-4.