Tufanyidin Kumushiman Yehova Nakash Chivurikish cha Yakudia ya Urel ya Nsalejetu Chikusadik pa Ndol 16
1 Ruchingej rikat kwiwejinaku pitushejidina piswimp ni Ndol 16, 2003. Pa urel winiwa tukez kusal chivurikish cha rufu ra Yesu, ni kwinung pamwing ni mamiliyon ma ambay netu in kwifukwil a pa mangand mawonsu mu kushiman dijin dia Yehova. Yehova ufanyidin kushiman kwetu kwawonsu mulong wa ditenchik diend diamushena dia difut. Kusutin ku difut dined, kwawiy kukezay kupanin yiyukish yipandakena kuwap kud antu in awonsu akata kumuziyil. Tukat kwinung pamwing ni nfund-a-kuseng nich michim yetu yawonsu mu kulond nich dizu dikash anch: “Mwant Nzamb [Yehova, NW] udi mujim, chifanyidin kumushiman.”—Kus. 145:3.
2 Chinech chawiy chisu cha kutongijokin pa kuwap kwa Nzamb ni pa dibaz tukweta dia kumujikitish Yehova mulong wa kumutum “Mwanend kapwokal mu mangand chakwel etu tutambul mwom wa chikupu kudi ndiy.” (1 Yohan 4:9, 10) Kuvurikang ni kusal Yakudia ya Urel ya Nsalejetu kukat kukasikeshin mu michim yetu anch “Mwant [Yehova, NW] udi mwin riy ni ranaken . . . udi ni riy rijim.” (Kus. 145:8) Chakin kamu, difut didi chisal chijim nakash cha rukat ra Yehova pantaliken nau antu awonsu. (Yohan 3:16) Ang twatongijokin pa rukat ra Nzamb ni kushinshikin mwom wa Yesu ushinshamena ni wakad chitil, tudi abachikinau kumushiman Yehova. Tukez kumushiman ndiy chikupu ni chikupu, mulong wa rukat rend rijim rimekeshinay mu kwikadish mwom wa chikupu chom chitwishikina kud etu.—Kus. 145:1, 2.
3 Yikwasha Antu Akwau Kumushiman Yehova: Kumujikitish Nzamb mulong wa chipan chipandakena kujimb cha difut kutubachikin kuyitazuk antu akwau eza inunga netu pamwing mu kumushiman Yehova. Nfund-a-kuseng amupepila kufund anch: ‘Akat kuvurik katumb ka kuwap kwey, akez kuwang miminy ya musangar mulong wa kutentam kwey.’ (Kus. 145:7) Muvu wadiap ou kusu, mu mangand mawonsu Atuman’a Yehova asutishin asaa miliyar umwing ni kusut mu mudimu wa kulejan. Ov usu wau wading nich chibudikin cha mutapu ik? Rubing ni rubing piswimp antu 5100 ni kusut atambwil dibatish mud chijingidij cha kwipan kwau kud Yehova. Nich uvud wa antu 15597746 akumangana ku Chivurikish, kuwejinaku mamiliyon 9 ma antu akad kal kusambish kumushiman Yehova mud in kulejan a rusangu ruwamp, kudi ruchingej ra kwiwejinaku kuvud! Chitudia antwarubil a Want, tusangaredin chisend chetu cha kulejan rusangu ruwamp ni kukarumwin michim ya antu akwau kudiay Yehova, kud Mwanend, ni ku Want.
4 Mutapu uwamp wa kuyikasikesh antu akwau chakwel amushiman Yehova chidi kusutil ku kuyitazuk eza inunga netu pamwing mu kuvurik kwa Yakudia ya Urel ya Nsalejetu. Ov wafundin kal dilondurish dia majin ma antu in awonsu usotina kutazuk pamwing ni antu akwau uswiridina kuvurish dichuku ni saa? Ov wayinkishin kal antu awonsu akweta majin mau pa dilondurish diey dipaper dia diladikij? Ang kand kal, sal usu wa kuyinkish swa mu chisu chishadilaku ech. Yikwasha kusanger rutong ra chivurikish. Kwi ndond ya Chivurikish, irijeka chakwel kuyinkish angendj moy. Yikadisha iyova kwikal akinau nawamp, yijikisha kud antu akwau, ni yijikitisha mulong wa kwikalaku kwau.
5 Kukumangan ku Chivurikish kukutwish kuyibachik antu asu kuya kurutu muspiritu. Mwin kwilej Baibel umwing wadinga nich mayej ma manangu, chadinga chikasiken ku mutambu wend kuya ndond mudia antu avud, pakwez ndiy weza ku Chivurikish. Pamwipulau chitonginay piur pa chikumangan, ndiy wakula anch: “Wading uchuku umwing utumbila, niyam nadingaku.” Kudiosh kamu pinipa, ndiy wasambisha kukumangan ku yikumangan.
6 Kupwa kwa Chivurikish: Ov chom ik tukutwisha kusal mulong wa kuyikwash antu inay asangaredina chakwel ikala in kumushiman Yehova? Amakurump afanyidin kuta muchim pad antu asu akumangena ku Chivurikish ni afanyidin kutenchik chakwel anch in kulejan awanyishinau nawamp ayendila kamu swa kupwa kwa Chivurikish mulong wa kuchirikin nau yom yikasikeshina yilejinau ni yamenau. Amwing akutwish kusot kusambish kwilej Baibel. Chifanyidin kand kuyitazuk kwez kukumangan ku yikumangan yawonsu ya chikumangen rubing ni rubing, mulong kukumangan kwakad kujing kukutwish kuwejinaku ronganyin rau ra Baibel.
7 Akat kusal yitenchik yifanyidina mulong wa kuyikasikesh antu awonsu akata kutulang rapor kwa kumatok angond ni antu akad kusalang kand mudimu wa kulejan chakwel asambishang kukumangan pakad kujing. Ang akwit kud amakurump kumukwash muntu kanang wikadila kal wakad kusalang mudimu wa kulejan chakwel achirikina kand mu mudimu wa chingand, ikal tayad kwitiyin. Kumekesh kuyibangin akadivar kwa rukat kwa mutapu winou kwambaten nich chiyul cha mupostol Paul anch: “Yisu yawonsu yitumena nawamp chifanyidin etu kusal nawamp kudi antu awonsu, pakwez kupandakan kudi anamakwetu in ritiy.”—Gal. 6:10.
8 Tusalany etu awonsu usu wa pakampwil wa kwikalaku ku Chivurikish pa Ndol 16. Tusotinap kuburen chinship chinech chitumbila cha kumushiman Yehova. Mwaning, kusambish kamu katat ni chikupu ni chikupu, tumushimanany Yehova mulong wa midimu yend yijim!—Kus. 145:21.