Sadil Mitapu Yiukweta Mulong wa Kupalangesh Uruu wa Want!

1. Ov, dilejan ik tukutwisha kwilej ku chilakej cha David?

¹ Mwant David wading muntu umwing kalikidinap mashakamin mend mamuziyisha. Chilakej, David wasota kutung chikumbu cha Yehova. Chisu chamukangeshau kusal mwamu, David watenchika jintong jend ni wikala tayad kupan ukwash kudi Salomon chakwel atunga tempel. (1 Ant 8:17-19; 1 Jnsg. 29:3-9) Ap anch kamwinkishap mbil ya kusal mwamu, pakwez David washinshikina pa yom yelay kuwanyish. Ov, mutapu ik tukutwisha kwimburij chilakej cha David pitukimbina mitapu kanang ya kupalangesh uruu wa Want?

2. Ov, kwishinshikin ik tukutwisha kwishinshikin?

² Chom Ukutwisha Kusal: In kulejan avud apipeja mashakamin ma mwom yau mulong wa kusal mudi ayibol akwash ap ayibol a rawonsu. (Mat. 6:22) Ov, ukutwish kwinung pamwing nau? Piukushinshikina mashakamin ma mwom wey mu malembil, ukutwish kuman anch ‘akwazuridil kal chis chijim mulong usala mudimu.’ Anch chidi mwamu, sadil mutapu winou!​—1 Kor. 16:8, 9.

3. Ov, mitapu ik ya kupan uman yitukutwisha kwitekin anch mikadil yetu yitukangeshinap kusal mudimu wa uchibol?

³ Ov, chikwikal nchik anch mashakamin mey ma mwom makukangeshin kusal mudimu wa uchibol? Ukukimbap mitapu yikwau yifanyidina. Chilakej, anch mudimu wey wa kumujimbu ukwinkishining chisu chakutanijan ni antu akad kwikal in ritiyij, ov, mulong wak ukusadilap mutapu ufanyidina chakwel uyinkisha uman? Ap anch urishin nich milong ya ukash wa mujimbu, ov, ukutwishap kwitekin yisu ya kupan uman kudi in kupan ukwash wa ukash wa mujimbu? Vurik anch kuding yitenchik mulong wa in kulejan akweta mipak kanang mu mudimu wau wa kulejan mulong wa uvud wa mivu yau ap milong yikash ya ukash wa mujimbu chakwel apana rapor wa mudimu wa chingand wa aminit 15, 30 ap 45 pa ndond pa kupan saa wa kabuj. Anch wizwishin rapor wey wa mudimu wa chingand wa pa ngond, ikal nich kashinsh ka kuwejaku chisu chiwasutisha mu kupan uman wa kukashimwish mudi kupan mikand, kuwejaku kand ma trakt kushalijan ni mapaper ma diladikij dia Chivurikish ni ma diladikij dia chitentam. Ukutwish pamwing ap kukashimuk anch wawanyishin kal asaa kanang mu mitapu yimekena mudi yikemp-yikemp!

4. Ov, wisu mupak wey pa mulong winou?

⁴ Chikalap nchik mikadil yetu yitukweta, el amboku tusadilany mutapu win wawonsu tukweta mulong wa kupalangesh rusangu ruwamp. Chawiy lel, tukez kutan musangar wa kwijik anch tusadining yom yawonsu yitukutwisha kusal mulong wa kukimb Want.​—Mar. 14:8; Luka 21:2-4.