“Nleja Mwakusadil Rusot Rey”

“Nleja mwakusadil rusot rey, mulong ey udi Nzamb wam.”—KUS. 143:10.

MANANS MA USEY MA KUVURIK

Ov, milong ik ya mu mwom wa David yimekeshina anch wading wakamin piur pa mutapu umenay Yehova yom?

Yom ik yamukwasha David kujingunin rusot ra Nzamb?

Chom ik chikutukwasha kushal mu kwitiyik kwa Yehova?

1, 2. Ov, kuchingejin mu rusot ra Nzamb kukutwish kutukwash mutapu ik, ni chom ik tukutwisha kuchingejin kwilej pa chinech kusutil kudiay Mwant David?

PIUDIA mu weny, ov, wasadilap kal mulad wa kart wa ordinater wakwasha kwikal ni chitongijok cha ndond uyila? Kutal yom mu mutapu winou uwamp kukutwish kukukwash kujingunin njil yiwamp ukutwisha kulondul. Kusadil yany ya chilik chimwing kukutwish kutukwash pitukwatina mipak ya usey. Kuman yom mu rutong ra piur ra Sakatang kukez kututwishish ‘kwendil mwin njil’ yitiyijinay Yehova.—Isay 30:21.

² Mu chirung chijim cha mwom wend, Mwant David wa mu Isarel wa pasak washa chilakej cha pakampwil cha kuchingejin rusot ra Nzamb. Tushinshikinany bil yinship kanang ya mu mwom wa David nich chitongijok cha kwilej kusutil ku yisal ya muntu wamekesha anch muchim wend wawonsu wading kudiay Yehova Nzamb.—1 Ant 11:4.

DAVID WAKWATA DIJIN DIA YEHOVA NICH USEY NAKASH

3, 4. (a) Ov, chom ik chamubachika David kurish ni Goliat? (b) Ov, mutapu ik wamanay David dijin dia Nzamb?

³ Shinshikin chisu chayay David kumusankan chilabu mwin Filistin Goliat mwin Gat. Chom ik chamubachika David nsand chakwel kumurishish muntu winou wadinga ni chimbu chilemp cha ametre aad ni asantimetre chidivu (2,9 m)? (1 Sam. 17:4) Ov, kwading kukapuk kwa David? Ov, rading ritiy rend mudiay Nzamb? Ngikadil yiney yawosu yaad yading nich usey nakash mu chisal chend cha kukapuk. Pakwez, kalimish mulong wa Yehova ni mulong wa dijin diend dijim pakampwil yamubachika David kumwas muntu winou mulemp njit. Nich ujim, David wipula anch: Nany “mwin Filistin winou wakad kuya ku mukand . . . ukuyifunyishana mwamu ku yisak ya amasalay a Nzamb mwom?”—1 Sam. 17:26.

⁴ Kurutu kwa Goliat nsand David walonda anch: “Ey wezil ni kurish ni yamam nich mpak yey ya musamun, ni murumbu, ni mubur. Pakwez am nezil ni kurish ney mu dijin dia [Yehova] Nzamb wa yisak ya amasalay a in Isarel wafunyishina ey.” (1 Sam. 17:45) Nich kumuchingejin Nzamb wakin, David wamwasa pansh chilabu mwin Filistin nich kusu ut wa ndundu ni diyal. Chidiap kusu pa mulong winou pakwez mu mwom wend, David wamuchingejina Yehova ni wakwata dijin dia Nzamb nich usey nakash. Chakin kamu, David wayikasikesha ambay nend in Isarel chakwel ‘uyaj utumbila mu dijin dia [Yehova].’—Tang 1 Jinsangu 16:8-10.

5. Mwikadil ik ukutwisha kurish nich ufanikena ni masaal ma Goliat?

⁵ Ov, wibazin kwikal nend Yehova mudi Nzamb wen? (Jer. 9:24) Ov, mutapu ik ukata kwakulang anch amutej ney, ambay ney, arund a shikol, ap anamaku akat kulond nayimp piur pa Yehova ni kuyisip Atuman end? Ov, ukat kulondang mulong wa kuchidij dijin dia Yehova pakatau kudisal masal, nich kuchingejin mu ukwash wend? Chakin, kuding “chisu chimwing cha kunenet,” pakwez tufanyidinap kwov usany wa kwikal Kaman wa Yehova ni mwin kwilej wa Yesu. (Mul. 3:1, 7; Mar. 8:38) Ap mwamu tufanyidin kwikal adimukina ni in kalimish mu kuyisadil antu akad kwitiyij, kangal twikal mudi in Isarel inay “iyakamisha nakash ni kuzalizal wom” pateshau kufuny kwa Goliat. (1 Sam. 17:11) Chinyim nich chinech, tusalany ni chiyul chikash chakwel kushiman dijin dia Nzamb. Rusot retu ridi ra kuyikwash antu chakwel ashikena kumwijik Yehova mudi Nzamb ufanyidina chakin kamu. Pa chinech, tusadidil Dizu diend difundinau ni kusal usu wa kuyikwash antu akwau kuman usey wa kushejin piswimp ni Nzamb.—Jak. 4:8.

6. Chom ik chasotay David kuwanyish kusutil ku kusankanijan nend Goliat, ni chom ik chifanyidina kwikal rutong retu ra kusambish?

⁶ Kusankanijan kwa David ni Goliat kutufundishin dilejan dikwau dia usey. Chisu chezay swa David kurutu kwa mikan ya kurish njit, wipula anch: “Chom ik chikumwelau muntu mwawonsu ukumujip mwin Filistin winou, ni kudiosh usany wa in Isarel?” Mu kwakul antu, achirikina yalondau pakusambish anch: “Muntu mwawonsu ukumujipa [Goliat], mwant ukumwinkish mapit mavud, ukumwinkish kand mwanend mband.” (1 Sam. 17:25-27) Pakwez rusot ra kusambish ra David radingap ra difut. Wading ni rutong rijim nakash. David wasota kumushiman Nzamb wakin. (Tang 1 Samwel 17:46, 47.) Ov, chidi nchik piur petwetu? Ov, rutong retu ra kusambish ridi ra kwijikish dijin dietu ayinetu ni kukumangej mapit ni kwikal nich katumb mu mangand? Chakin tusotil kwikal mudi David, wawanga anch: “A, tumushimanany [Yehova] niyamam, tutumbishany dijin diend pamwing!” (Kus. 34:3) Chawiy lel, tumuchingejinany Nzamb amboku, ni kutek dijin diend kurutu kwa dijin dietu ayinetu.—Mat. 6:9.

7. Ov, mutapu ik tukutwisha kukasikesh ritiy rikash riswiridina pitusankena antu akad kwitiyij?

⁷ Kukapuk kwa David mulong wa kumurish Goliat kwading kwitin kumuchingejin rawonsu Yehova. David mwan nsand wading ni ritiy rikash. Mwi njil yimwing mwakasikeshinay ritiy rend yading kusutil ku kumuchingejin Nzamb padingay ni kusal mudimu wa kafung. (1 Sam. 17:34-37) Niyetu tuswiridin ritiy rikash chakwel tudandamena mu mudimu wa kulejan, pakampwil pitukata kusankan antu akad kwitiyij. Tukutwish kukasikesh ritiy mudi riner kusutil ku kumuchingejin Nzamb mu mijikit yetu ya dichuku ni dichuku. Chilakej, tukutwish kusambish misamb piur pa uyakin wa Bibil ni antu ashicha piswimp netu pitudia mu transpor wa antu awonsu. Ov, mulong wak tukutwishap kuchirik kwinyim mu kwambamb ni antu tusankena mwinjil pitudia mu mudimu wa kulejan ku chikumbu ni chikumbu?—Mid. 20:20, 21.

DAVID WAMUCHINGELA YEHOVA

8, 9. Mu kusal ni Mwant Saul, mutapu ik wamekeshay David anch ulamin rusot ra Yehova mu manangu?

⁸ Chilakej chikwau cha kumuchingejin Yehova kudiay David chading chambatena ni Saul—mwant wakusambish wa in Isarel. Tupamp tusatu Saul mwin ris wapima chakwel amupampil David ku rubumbu nich murumbu, pakwez David wamwiyepa chisu ni chisu, ni walika kuchirishin. Kupwa, wamuchina Saul. (1 Sam. 18:7-11; 19:10) Kupwa Saul wasend amakundj 3000 atonday pakach pa in Isarel awonsu ni waya kumukimb David mwin mpay. (1 Sam. 24:2) Kupwa, pakad kwijik Saul wandama mu madam mwadingay David ni antu end. David wela kusadil chisu chinech mulong wa kumujip mwant wadinga utekina mwom wend mu ubaj. Ap mwamu, rading rusot ra Nzamb mulong wa David kumuswinkan Saul mudi mwant wa Isarel. (1 Sam. 16:1, 13) Chakin kamu, anch David watesha chiyul cha antu end, ing amujipa mwant. Pakwez David walonda anch: “[Yehova] wanlikish kal kusal chom chiyimp kudi nsalejam, ndiy kamu wazizilau kal many ma [Yehova].” (Tang 1 Samwel 24:4-7.) Saul wading uchid mwant uzizidilau many wa Nzamb. David kasotap kumutambul Saul want, mulong Yehova wading kandikal amudiosha. Kusutil ku kukatul kusu rizez ra nkandj mulemp wa Saul wadinga ulela, David umekeshin anch kadingap usotina kumusal Saul nayimp.—1 Sam. 24:11.

⁹ David wamekesha kand kalimish mulong wa uzizidilau many wa Nzamb pamumanau kapamp kakwau mwant. Pa chisu chinech, David ni Abishay ashika pa ndond yadingay Saul ni amutana walalang kal. Chawiy lel Abishay walonda anch Nzamb wamupan kal mukankuny winou mu makas ma David, ni wamwita chakwel itiya amupampila Saul pansh ni murumbu, David walika kusal chom chinech. (1 Sam. 26:8-11) Mulong David wading ni kusot umutakel wa Nzamb, kaziyap mu mupak wend wa kusal kulondulijan nich rusot ra Yehova kwikalap nchik kumukasikesh kwamukasikeshau kudi Abishay.

10. Mwikadil ik tukutwisha kurish nich muntu ni muntu ipend, ni chom ik chikutukwasha kushal ajijamena?

¹⁰ Niyetu tukutwish kurish nich mikadil ya arund asotila kutushindil kulondul yitongijok yau ya antu pa ndond pa kutukasikesh kusal rusot ra Yehova. Mudi Abishay, amwing akutwish ap kutukasikesh kusal kwambatan nich mulong kanang pakad kushinshikin rusot ra Nzamb. Chakwel kushal ajijamena, tuswiridin nawamp kwikal nich mu manangu chitongijok cha Yehova pa mulong ni kudandamen kulamat mu jinjil jend.

11. Yom ik wilejina kusutil kudiay David piur pa kutek rusot ra Nzamb piur nakash mu manangu mey?

¹¹ David wamulembila Yehova anch: “Nleja mwakusadil rusot rey.” (Tang Kuseng 143:5, 8, 10.) Pandond pa kuchingejin pa yitongijok yend amwinend ap kumubachik kudi muntu mukwau, David wading nich mushiku wa kwikal ulejinau kudi Nzamb. Ndiy ‘watongijokina pa yisalijok yawonsu ya Yehova ni kukat midimu ya makas mend.’ Tukutwish ayinetu kujingunin rusot ra Nzamb kusutil ku kushinshikin Mukand wa Nzamb ni kutongijokin pa jinsangu jivud ja mu Bibil ja yisalijok ya Yehova ni antu.

DAVID WAKATA YANY YIDIA KWINYIM KWA CHIJIL

12, 13. Mulong wak David wamwangila mem mamuletinau kudi ayilabu asatu pansh?

¹² Rukat ra David mulong wa yany yidiokila mu Chijil ni maswir mend ma kushakam kwambatan nich ridi kand rifanyidina kwimburij. Shinshikin chom chasadika pa chisu chamekeshay David maswir ma “mem ma kuna mu dijiy dia ku chis cha Betlelem.” Chawiy lel ayilabu asatu a David andama ku usu mu musumb—wadinga mu makas ma in Filistin—ni avita mem amuletinam. Pakwez, “ndiy kanap mem bwat, wamamwangila kurutu kwa [Yehova].” Ov, mulong wak? David urumburil anch: “Chakapuk chaya mwa kudi am kurutu kwa [Yehova] kinikunap mem minam. Ov, nikutwish nchik kuna mash ma mom ma antu inay ipanyina kushadish mom yau mulong wa kwinletil mem minam? Wawiy mulong walikinay kuna mem.”—1 Jnsg. 11:15-19.

¹³ David wading wij kusutil Chijil anch mash afanyidin kumamwangil kurutu kwa Yehova ni kafanyidinap kumadia. Watesha kand mulong wak chifanyidin kusal mwamu. David wading wij anch “mwom wa mujimbu ushiching mu mash.” Pakwez, minam madinga mem, kimadingap mash. Ov mulong wak David walika kuna mem minam? Wasangera yany yidia kwinyim kwa mbil yiney. Kudiay David, mem mading nich usey mudi mash ma amakundj inay asatu. Chikwau, chadingap chifanyidina kudi ndiy kuna mem. Pa ndond pa kumana, walonda anch ukutwish kumamwangil pansh.—Lev. 17:11; Kuv. 12:23, 24.

14. Chom ik chamukwasha David kwikal nich chitongijok cha Yehova piur pa milong yiney?

¹⁴ David wapima kwikal ukwatikena rawonsu mu Chijil cha Nzamb. Wawanga anch: “Nasangar kusadil rusot rey, A Nzamb wam, mwawiy, yijil yey yidi kal mu muchim wam.” (Kus. 40:8) David wileja Chijil cha Nzamb ni watongijokina nakash piur pach. Wachingejina mu manangu madiokila mu chijil cha Yehova. Mudi chibudikin, David wakatisha nakash kulondul, kangal kusu chijil chifundinau pakwez kand chitongijok cha Chijil cha Moses. Pitukata kwilej Bibil, chidi cha manangu kutongijokin pa yom tutangina ni kuyilam mu muchim wetu chakwel tukutwish kujingunin chimusangareshina Yehova pa mulong kanang.

15. Ov, Salomon wakanganya kulimish Chijil cha Nzamb mu mutapu ik?

¹⁵ Salomon mwan wa David ading amuyukishin nakash kudi Yehova Nzamb. Pakwez, mu kusut kwa machuku, Salomon wakanganya kulimish Chijil cha Nzamb. Walika kutesh chijil cha Yehova chakwel anch mwant mwin Isarel kafanyidinap “wavudish amband end.” (Kuv. 17:17) Chawiy lel, Solomon wata amband avud a michid yindj. Pikalay ipal, “akajend amukarumuna muchim kutal ku akish.” Chikalap nchik mutapu watwishay kutong, “Solomon wasala yom yiyimp kurutu kwa [Yehova] kamulondulap kwend [Yehova] ni muchim wawonsu mudi mwasalay tatukwend David.” (1 Ant 11:1-6) Chidi cha usey mudi ik anch tulondula chijil ni yany yidia mu Dizu dia Nzamb! Chilakej, chinech chidi cha usey pitwirijekina mulong wa uruw.

16. Ov, kujingunin chitongijok cha chijil cha kwat “ching kudi mwin Krist” kukwet usu wa mutapu ik padiau antu achingejina kwatan?

¹⁶ Anch antu akad kwitiyij asambish kutumekeshin rukat ra ikundj ni mband, ov, mutapu wetu wa kwakul umekeshin chitongijok cha David bil anch mudi cha Salomon? In kwifukwil akin ayilejin kwat “ching kudi mwin Krist.” (1 Kor. 7:39) Anch mwin Kristu watond kwatijan, ikundj ap mband afanyidin kwatijan ni mbay mwin ritiy. Anch twajingunin chitongijok cha kushindil kwinoku kwa Mufund, tukezap kulik kusu kwatijan ni muntu wakad kwitiyij pakwez tufanyidin kand kulik kukudish rukat ra ikundj ni mband pantaliken ni antu a mutapu winou.

17. Chom ik chikutwisha kutukwash chakwel kwipuk kufa mu mupit wa pornografi?

¹⁷ Tushinshikinany kand, mutapu ukutwisha Chilakej cha David cha kukimb nich mushiku umutakel wa Nzamb kutukwash kujijaman choziu cha kutal yipich ya antu asadila masandj. Tang mufund ulondwila, tongijokin piur pa yany yidiamu, ni kasikesh chakwel kujingunin rusot ra Yehova pa mulong winou. (Tang Kuseng 119:37; Mateu 5:28, 29; Kolosay 3:5.) Kutongijokin pa yany yend ya piur kukat kuturijek chakwel kulik kuwa mu mupit wa pornografi.

IKAL NICH CHITONGIJOK CHA NZAMB CHISU CHAWONSU

18, 19. (a) Ap anch wading wakad kuwanyin, chom ik chamukwasha David kushal mu kwitiyik kwa Nzamb? (b) Ov, wisu mupak wey?

¹⁸ Ap anch David wading mwin chilikej chiwamp mu yom yivud, wasala tupamp tuvud yitil yijim. (2 Sam. 11:2-4, 14, 15, 22-27; 1 Jsng. 21:1, 7) Pakwez, mu mwom wend David wamekana kwikal mwin kwit dilikishin ni kukarumuk anch wasal chitil. Wenda kurutu kwa Nzamb “mu kuziyil kwa muchim.” (1 Ant 9:4) Ov, mulong wak tukutwish kulond mwamu? Mulong David wapima kusal kulondulijan nich rusot ra Yehova.

¹⁹ Chikalap nich kulik kuwanyin kwetu, tukutwish kushal itiyikina kudi Nzamb. Nich rutong riner mu manangu, twilejany nich mushiku Dizu dia Nzamb, tutongijokinany nakash pa yom twilejina, ni kusal nakash kwambatan ni yom tulamina mu muchim wetu. chawiy, tukumwit Yehova mudi nfund a kuseng wita nich kwikepish anch: “Nleja mwakusadil rusot rey.”

[Chipich chidia pa paj wa 10]

Ov, yom ik yamukangesha David kumujip Saul padingay nich mutapu wa kusal mwamu?

[Chipich chidia pa paj wa 11]

Ov, chom ik tukutwisha kwilejin kusutil ku kulik kwa David kuna mem mamuletinau kudi antu end?