Tutumbishany Dijin Dia Yehova Pamwing

“A, tumushimanany [Yehova] niyamam, tutumbishany dijin diend pamwing!”—KUSENG 34:3.

1. Chilakej ik chiwamp chashay Yesu pasalay mujikit wend panap pansh?

UCHUKU wa Nisan 14, 33 pa chirung chetu, Yesu pamwing ni atwimbuy end awanga pamwing miminy ya kumushiman Yehova mu kapalikany ka piur mu chikumbu ku Yerusalem. (Mateu 26:30) Kadinga kapamp ka nsudiel kasalay Yesu musambu winou pamwing ni atwimbuy end. Pakwez, chading chifanyidin anch ndiy apwisha chikumangan chinech nich kuwang miminy ya kumushiman Yehova. Kudiosh kwisambishil djat ni kwisudiel kwa mujikit wend panap pansh, Yesu wamushimana Tatukwend ni wijikisha nich mushiku dijin diend. (Mateu 4:10; 6:9; 22:37, 38; Yohan 12:28; 17:6) Chakin kamu, ndiy wakula ku diladikij dia musangar dia nfund a kuseng palonday anch: “A, tumushimanany [Yehova] niyamam, tutumbishany dijin diend pamwing!” (Kuseng 34:3) Chilakej chiwamp mudi ik chetwetu kulondul!

2, 3. (a) Mutapu ik twija anch Kuseng 34 ukwet kurumburik kwa uprofet? (b) Chom ik tukushinshikina mu rusangu riner ni rambakedinap?

² Asaa akemp kupwa kwa kushiman nich miminy pamwing ni Yesu, kambuy Yohan wamana chishiken chimwing chishalijadina. Wamumana Nsalejend ni ampongirik aad akat kuyijip ni kuyipampin pa mitond. Wayimana amasalay in Rome chibukwinau mend ma ampongirik inay aad chakwel afa swa. Pakwez, ndiy wamana kand anch kabukunap kwau mend ma Yesu. Pezau amasalay piswimp ni Yesu, ndiy wadinga wafang kal. Mu Rusangu rend, Yohan wisambidin chishiken chinech mudi kuwanyin kwa uprofet ukwau udia mu Kuseng 34 ulondila anch: “Kwikil [difup]dimwing dibukukina.”—Yohan 19:32-36; Kuseng 34:20.

³ Kuseng 34 ukwet manans makwau ma usey kudi in Kristu. Chawiy lel, mu rusangu riner ni rambakedinap, tukushinshikin mikadil mwadingay David pafunday kuseng winou ni kupwa tukushinshikin minsamb yikwau yikasikeshina ya kuseng.

David Umuchinin Saul

4. (a) Ov, mulong wak wamupanau David many mudi mwant wa Isarel? (b) Mulong wak Saul ‘wamukata’ David nakash?

⁴ Padingay David uchidi nsand, Saul wadinga mwant mu Isarel. Pakwez, Saul wabwambwila ni Yehova wamulika. Pa chinech, muprofet Samwel wamuleja anch: “Ilel Yehova wakutambul kal want wa Isarel, ni chakin kamu waupanin kal kudi muntu ney, ukupandakenamu kuwap.” (1 Samwel 15:28, NW) Kupwa, Yehova wamutuma Samwel akamupana David many, mwan ikundj kasulans wa Yese, chakwel ikala mwant wa Isarel wa kaad. Pa chisu chinicha, paburenay spiritu wa Nzamb, Mwant Saul wovanga runeng nakash. David, nkaliweny mu kuwang, amuleta ku Giboa chakwel amusadila mwant, ni kuwang kwa David kwamudutisha Saul, ni “wamukata nakash.”—1 Samwel 16:11, 13, 21, 23.

5. Ov, mulong wak yitongijok ya Saul pantaliken nend David yaswimpa, ni chinech chamushindila David kusal ik?

⁵ Mu kusut kwa chisu, Yehova wamekesha anch udi pamwing ni David. Yehova wamukwasha David kumujip Goliyat chifuvu mwin Filistin ni wamukwasha pezay kwikal nich ntumb yijim mu Isarel mulong wa ukaliweny wend wa usalay. Pakwez, Saul wamwovila David mukau mulong wa chiyukish cha Yehova chadingay nich, ni wamukisa. Tupamp twaad padingay David ni kubul kadiad kurutu kwa Saul, mwant wamwasa murumbu. Tupamp twawonsu twaad, David wiyepa murumbu. Pasotay Saul kumujip kapamp ka kasatu, mwant wa kaad wa Isarel wamana chakin anch chimufanyidin kuchin mulong wa kupandish mwom wend. Chakin kamu, mulong Saul wadandamena kusal usu wa kumukwat chakwel amujipa, David wakwata mupak wa kuya kujingam pol pa teritwar wa Isarel.—1 Samwel 18:11; 19:9, 10, NW.

6. Ov, mulong wak Saul wapana mbil ya kuyijip antu awonsu adinga mu Nob?

⁶ Padingay mu weny wend ku mwimbu wa Isarel, David wimana mu musumb wa Nob, mwadinga dizang dia Yehova. Chimeken anch, David wadinga mu weny wa kuchin kwend pamwing ni chisak cha ansand, ni David wakimba chom chikutwishau kudia. Saul watesha anch mwin kupesh mujim wamwinkisha David ni amakundj adinga nend pamwing yakudia ni mpak ya musamun yatambulay David pafay Goliyat. Mu ujim, Saul wayijipa antu awonsu adinga ashicha mu musumb winiwa, pamwing ni in kupesh 85.—1 Samwel 21:1, 2; 22:12, 13, 18, 19, NW; Mateu 12:3, 4.

Kuchin Kakwau Rufu

7. Ov, mulong wak Gat yadingap ndond yiwamp ya David kujingamin?

⁷ Kudiokal ku Nob, David wachina waya kurand ku akilometre 40 mu teritwar wa in Filistin ni wakimba kujingamin kudiay Mwant Akish mu Gat, musumb wa chivadik wenday Goliyat. Pamwing ap David watonga anch Saul kakutwishap kwez kumukimb ku Gat. Mu machuku makemp kusu, atushalapol a mwant wa Gat amujingunina David. Pateshay David mu kununganijan anch amujingunin kal, “ndiy wamwova Akish mwant wa Gat wom nakash.”—1 Samwel 21:10-12.

8. (a) Kuseng 56 utulejin ik piur pa yamanay David mu Gat? (b) Mutapu ik wiyepay David kapamp kakwau ku rufu?

⁸ Chawiy in Filistin amukwata David. Chimeken anch chawiy chisu chafunday David kuseng kudiokila ku muchim mwamwilembilay Yehova anch: “Tekip mansoj mam mu mulond wey.” (Kuseng 56:8) Wamekesha ruchingej anch Yehova kakutwishap kuvuramen mar mend pakwez ukumubangin nich rukat ni kumuchidij. David watonga kand mutapu wa kumudimb mwant wa in Filistin. Wasala yom mudi chizarik. Pamanay mwamu, Mwant Akish wayiswejina atushalapol end mulong wa kumuletin ikundj “chizarik” kurutu kwend. Choviken, Yehova wayukisha nkeu ya David. David amwopata mu musumb, chawiy chiyepay kapamp kakwau rufu.—1 Samwel 21:13-15.

9, 10. Mulong wak David wafunda Kuseng 34, ni chom ik chikwau chadingay nich David mu manangu pafunday kuseng winou?

⁹ Bibil kalondilap anch amakundj a David achina nend pamwing mu Gat ap anch adandamena kumulam mu mal madinga piswimp ni Isarel. Chikalap nchik mwamu, kwikala kutanijan kwa musangar chisu chayilejau kudi David mutapu wamupandishau kapamp kakwau kudi Yehova. Uman winou wikala mufulandal wa Kuseng 34, mudi muchilejenau mu mazu masambedila kuseng winou. Mu maverse sambwad ma kusambish ma kuseng winou, David ukat kumushiman Nzamb mulong wa kumupandish ni uyilejin antu end inunga pamwing nend mu kumutumbish Yehova mudi Mupandish Mujim wa antu end.—Kuseng 34:3, 4, 7.

¹⁰ David ni amakundj end ajingama mu mandam ma Adulam mu teritwar wa mikandu ya Isarel, piswimp ku akilometre 15 kwingangel kwa Gat. Kwinikwa, in Isarel adinga akad kusanger kand ngikadil mwishin mwa winyikel wa Saul asambisha kwez ni kwinung nau pamwing. (1 Samwel 22:1, 2) Pafunday David mazu ma Kuseng 34:8-22, chimeken anch wadinga uyivurikin antu inay mu manangu. Yivurish yidia mu maverse minam yidi kand ya usey kudi etu ilel, ni tukez chakin kamu kutaninamu ku kwisambin kuseng winou muwamp kachom pa kachom.

Ov, Yitongijok Yey ya Kusambish Yidi Mudi ya David?

11, 12. Mayingish ik mitukweta ma kumushiman Yehova chikupu?

¹¹ “Am nikez kumuyukish [Yehova] ku miten yawonsu kushiman kwend kukez kudandamen mukan mwam.” (Kuseng 34:1) Chashakamay mudi mwin kuchin, David wiyakamisha nakash piur pa yom ya ku mujimbu, pakwez mudi muchilejenau mu mazu minam, kwibangin kwend pichuku-pichuku kwamushadishinap mupak wend wa kumushiman Yehova. Chidi chilakej chiwamp kudi etu piturishina nich mikadil yikash mu mwom! Twikala ku shikol, ku mudimu, ni ambay netu in Kristu, ap mu mujikit wa patok, maswir metu ma kusambish mafanyidin kwikal ma kumushiman Yehova. Tongin bil amboku pa miril ni miril ya mayingish tukweta ma kumushimen! Chilakej, kwikiling musul ku yitukutwisha kujingunin ni kusanger mu midimu yamushena yatangay Yehova. Ni shinshikin yom yasadilay kal kusutil ku chikunku cha dirijek diend didia pansh! Ap anch adi akayitil, Yehova uyisadidil antu ashinshamena mu mutapu ujim mu yisu ya katat. Ov, midimu ya Nzamb yidi nchik anch twayisikesh ni ya antu ifukwidilau mu mangand? Ov, witiyinap yafunday David anch: “[Kwikil] umwing udia mudi Ey Mwant pakach pa anzamb, ap kusu kwikil midimu yidia mudi midimu yey.”—Kuseng 86:8.

¹² Mudi David, tudi abachikinau kumushiman Yehova chikupu mulong wa midimu yend yipandakenamu yawosu. Chikwau kand, tukwet mazang pa kwijik anch Want wa Nzamb udi katat mu makas mwa Nswan wa chikupu wa David, Yesu Kristu. (Kuburik 11:15) Chinech chirumburikin anch nsudiel ya ditenchik dined dia yom yidi piswimp. Machuku ma kurutu ma chikupu mulong wa tutikit musamban ni kusut twa antu madi mu chak. Kupandikanamu muchadinga, kwikadil kal maswir makash ma kuyilej antu akwau yikusala Want wa Nzamb katat kamu ak mulong wa antu ni kuyikwash chakwel amushimana Yehova pamwing netu. Chakin kamu tufanyidin kutek pa ndond ya kusambish kusadil yisu yawosu tukweta chakwel kuyikasikesh antu akwau kwitiy “Rusangu Ruwamp” kurutu kwa chisu.—Mateu 24:14, MM.

13. (a) David wibazina mudi nany, ni antu a mutapu ik amwakula? (b) Mutapu ik ukatau kwez antu in kwikepish mu chikumangan cha Ukristu ilel?

¹³ “Mupim wam ukez kashimekin mudi [Yehova], ni in kwitudish akez kateshiluku, akikal ni musangar.” (Kuseng 34:2) Pinap David kibazinap piur pa yisal ya muntu ap umwing. Chilakej, kibazap piur pa mutapu wamudimbay mwant wa Gat. Ndiy wijika anch Yehova wamuchidija padingay mu Gat ni ndiy wapanda mulong Yehova wamukwasha. (Jinswir 21:1) Chawiy, David wibaza, kadiap mwi ndiy amwinend, pakwez mudiay Yehova. Pa chinech, antu idutishina eza kudi Yehova. Yesu niyend washimana chikupu dijin dia Yehova, ni chom chinech chayipwita in kwikepish, antu adinga itiyijina anch Ndiy ayifundisha. Ilel, antu in kwikepish a michid yawonsu akat kwez mu chikumangan cha pa mangand mawonsu cha in Kristu azizidilau many, ni Yesu ndiy Mutu wau. (Kolosai 1:18) Michim ya antu in kwikepish yidi yibachikinau pakatau kutesh akat kutumbish dijin dia Nzamb kudi atushalapol end in kwikepish ni pakatau kutesh uruu wa Bibil, uyitwishishinau kutesh kudi spiritu wa Nzamb.—Yohan 6:44; Midimu 16:14.

Kukumangan Kukasikeshing Ritiy Retu

14. (a) Ov, David wadinga ni kusanger ching kusu kumushiman Yehova ku ujindj? (b) Chilakej ik chashay Yesu piur pa yikumangan mulong wa kwifukwil?

¹⁴ “A, tumushimanany [Yehova] niyamam, tutumbishany dijin diend pamwing!” (Kuseng 34:3) David kadingap ni kusanger kumushiman Yehova ku ujindj. Wayiladikija ambay nend nich musangar kwinung nend mu kutumbish dijin dia Nzamb. Chawiy chimwing, Yesu Kristu, David Mujim, wasangera kumushiman Yehova patok—ku sinagog wa kwol kwau, ku misambu yasalangau ku tempel wa Nzamb mu Yerusalem, ni pamwing ni in kwilej end. (Luka 2:49; 4:16-19; 10:21; Yohan 18:20) Chidi chisend cha musangar mudi ik cha kulondul chilakej cha Yesu cha kumushiman Yehova pa chisu chin chawonsu chitwishikina pamwing ni ambay netu akaritiy, pakampwil katat mudi mutwija “anch Dichuku dikat kusej piswimp”!—Hebreu 10:24, 25.

15. (a) Uman wa David, wadinga nich chibudikin ik padi antwend? (b) Mutapu ik tukata kwisakin yikumangan yetu?

¹⁵ “Am namusota [Yehova], Ndiy wangakula wankamunina ku wom wam wawonsu.” (Kuseng 34:4) Uman winou wadinga wa usey nakash kudi David. Chawiy, wadandamena kulond anch: “Nshon kazwendj ou wadila, [Yehova] wamwova, wamupandisha ku milong yend yawonsu.” (Kuseng 34:6) Pa chisu cha kukumangan ni ambay akaritiy, tukwet yisu yivud ya kushimunin uman utungina ni mutapu Yehova watukwashay kujijaman ku mikadil yikash ya mar. Uman winou ukat kukasikesh ritiy, mudi kamu mazu ma David makasikesha ritiy ra ambay nend. Ku mutambu wa David, ambay nend “atala kudi Ndiy [Yehova] amunyika, ni jimpal jau kakez kajoviship usany.” (Kuseng 34:5) Ap anch adinga ni kumuchin Mwant Saul, awiy kovap usany. Amuchingejina Nzamb anch wadinga ni kumukwash David, ni jimpal jau jasangara. Mu mutapu mudi winou, antu asu asangaredina pamwing ni antu ikala kal in Kristu akin mu mivu yivud, akat kutal kudi Yehova mulong wa kuyikwash. Mulong amana ukwash wend, jimpal jau jisangera jimekeshin mupak wau wa kushal ashinshamena kudi ndiy.

Jikitishany Mulong wa Ukwash wa Angel

16. Mutapu ik ukatay Yehova kuyisadil angel end mulong wa kutupandish?

¹⁶ “Mwangel wa Nzamb ukat kujing nau awiy akata kumwov Ndiy wom ni kuyikamunin.” (Kuseng 34:7) David kamanap kumukamunin kudiay Yehova mudi chom chikutwisha kumushiken ching ndiy kusu. Chakin, David wadinga uzizidilau many wa Yehova, ukeza kwikal mwant wa Isarel; pakwez ndiy wadinga wij anch Yehova uyisadidil angel end mulong wa kuyilam in kumwifukwil end awonsu ashinshamena, ikala akweta yisend yijim ap akad yisend. Pa chirung chetu chinech, in kwifukwil akin amen kal mutapu Yehova uyilaminay. Mu Allemagne Nazi, mu Angola, Malawi, Mozambique, ni mu jingand jikwau jivud, anyikel aleta ruvundu rikash mulong wa kuyinongish Atuman a Yehova. Usu wau wikadil kal wa chamwamu. Pakwez, antu a Yehova mu jingand jinej adandamedin kusapurik chitumbishinau dijin dia Nzamb pamwing. Ov, mulong wak? Chidi mulong Yehova uyisadidil angel end atumbila mulong wa kuyilam ni kuyitakel antu end.—Hebreu 1:14.

17. Mutapu ik utukwashiningau angel a Nzamb?

¹⁷ Chikwau kand, angel a Yehova akutwish kusadish yom chakwel anch antu in awonsu akata kuyipwakesh akwau ayidiosha mukach mwa antu a Yehova. (Mateu 13:41; 18:6, 10) Ap anch tukutwish kuchijik kurutu kwa chisu, angel akat kudiosh yikangesh yisotila kukangesh kusal mudimu wa Nzamb, ni akat kutukamunin ku yom yikutwisha kutek mu chak urund wetu ni Yehova. Chipandikenamu usey, angel akat kututakel mu mudimu wa kulejan “rusangu ruwamp ra chikupu” kudi antu awonsu, pamwing ni adia mu jindond musadilau mudimu wa kulejan mu mikadil ya chak. (Kuburik 14:6) Uman wa ukwash wa angel awisambidining chisu ni chisu mu mikand yengamidina pa Bibil yikatau kupalangesh Atuman a Yehova. Uman winou udi uvud nakash mu chilik chakad kutwish kulond anch kudi kwau kushiken kwa yom.a

18. (a) Chom ik chitwitinau chakwel anch tutaninamu ukwash wa angel? (b) Chom ik chikwisambinau mu rusangu rambakedinap?

¹⁸ Chakwel kudandamen kutaninamu ukwash udiokila ku umutakel ni kutulam kudi angel, tufanyidin kudandamen kutumbish dijin dia Yehova ap pa chisu cha rupompat. Vurikany anch, mwangel wa Nzamb ujingining ching “nau awiy akata kumwov [Yehova] wom.” Chom chinech chitin ik? Wom wa Nzamb chom ik, ni mutapu ik tukutwisha kuukudish? Ov, mulong wak Nzamb mwin rukat usotil anch tumwova wom? Yipul yiney akuyisambin mu rusangu rambakedinap.

[Mazu madia kwishin kwa paj]

Ov, Mutapu ik Ukwakula?

• Yoziu ik yajijamenay David padingay uchidi nsand?

• Mudi David, pa chom ik tubangidina cha kusambish?

• Mutapu ik tumeninga yikumangan ya Ukristu?

• Mutapu ik ukatay Yehova kuyisadil angel end mulong wa kutukwash?

[Kart udia pa paj wa 21]

(Chakwel kutan mazu mawonsu, tal mu mukand)

Rama

Gat

Sikilag

Gibeya

Nob

Yerusalem

Betlehem

Adulam

Keyila

Heberon

Zif

Oresh

Karimel

Mayon

Engedi

Karung wa Mungu

[Dizu dirumburila]

Map: Based on maps copyrighted by Pictorial Archive (Near Eastern History) Est. and Survey of Israel

[Chipich chidia pa paj wa 25]

Ap anch wachinijoka, David watumbisha dijin dia Yehova