Sangerany Mwom Ni Kumwov Yehova Wom

“Mwovany [Yehova] wom, en atumbila end, mulong kwikil chom chikuburenau kudi awiy akata kumwov Ndiy wom.”—KUSENG 34:9.

1, 2. (a) Mu mitapu ik kushalijan mumeningay Kristendom wom wa Nzamb? (b) Yipul ik tukushinshikina katat?

ALEJ a Kristendom akata kulejan kumwov Nzamb wom mwamu musadiningau chisu chivud pa mufulandal wa malejan makad kwikal ma Bibil anch Nzamb ukat kuyipup in kusal yitil chikupu mu karung ka kasu. Malejan minam madi mashalijadina nich yilejenay Bibil piur pa Yehova mudi Nzamb mwin rukat ni utentamina. (Disambishil 3:19; Kuvurik Yijil 32:4; Rome 6:23; 1 Yohan 4:8) Alej akwau a Kristendom amening yom mu mutapu windjing. Kakatap kulejanang kumwov Nzamb wom. Pakwez, akat kulejan anch Nzamb ulikidining kwend yom ni witiyijin muntu win mwawonsu chikalap nchik mulad wa mwom wend. Ni chinech kand kichawiyap chilejenay Bibil.—Galatia 5:19-21.

² Chakin, Bibil utukasikeshin kumwov Nzamb wom. (Kuburik 14:7) Uyakin winou ulangwishin yipul. Ov, mulong wak Nzamb mwin rukat usotil anch tumwova wom? Wom wa mutapu ik witinay Nzamb? Ov, mutapu ik tutanidinamu mu kumwov Nzamb wom? Tukwisambin yipul yiney pitudandamedina kwisambin Kuseng wa 34.

Mulong wak Kumwov Nzamb Wom?

3. (a) Ov, mutapu ik umena mbil ya kumwov Nzamb wom? (b) Mutapu ik ukwetau musangar antu amwovila Yehova wom?

³ Chidiay Yehova Sakatang ni Mukaleng Mwant wa mangand, chifanyidin kumwov wom. (1 Pita 2:17) Pakwez, wom winou udiap mwong upandakena kuyip wa nzamb mwin chisum. Udi wom wa kalimish mulong wa chidiay Yehova. Udi kand wom wa kulik kumunenganesh. Wom wa Nzamb udi uwamp ni ukat kumuletin muntu mashakamin mawamp, ukatap kulet ushon ap mwong. Yehova, “Nzamb [wa musangar],” usotil anch antu atangay asangera mwom. (1 Timoteu 1:11) Pakwez, pakwel anch tusal mwamu, tufanyidin kushakam kwambatan nich yisotilay Nzamb. Kudi antu avud, chom chinech chirumburikin kuswimp mulad wa mwom. Antu awonsu asadila usu wa kukarumuk amen usey wa uyakin wa mazu minam ma David malondila anch: “Pakany bil, utalany [Yehova] mudi mudiay muwamp! Wayuk muntu ukata kwikangil mwi Ndiy. Mwovany [Yehova] wom, en atumbila end, mulong kwikil chom chikuburenau kudi awiy akata kumwov Ndiy wom.” (Kuseng 34:8, 9) Antu awonsu amwovila Yehova wom kaburedinap chom cha usey wa chikupu mulong akwet urund uwamp ni Nzamb.

4. Kashinsh ik kaletay David ni Yesu piur pa kubangin maswir kudi Yehova?

⁴ Shinshikinany anch mudi muchadinga mu machuku mend, David wayilimisha antu end nich kuyitazuk anch “en atumbila.” Awiy adinga chikunku cha muchid utumbila wa Nzamb. Ateka kand niyawiy mwom wau mu chak pa kumulondul David. Ap anch wadinga ni kumuchin Mwant Saul, David wadinga nich ruchingej anch Yehova ukudandamen kubangin maswir mend ma usey. David wafunda anch: “An a ntambu akat kuburen ni kutany nzal, pakwez akata kumusurab [Yehova] kakez kuburenap chom chiwamp.” (Kuseng 34:10) Yesu wayinkisha in kwilej end kashinsh mudi kinak.—Mateu 6:33.

5. (a) In kwilej avud a Yesu adinga nich mwom wa mutapu ik? (b) Chiyul ik chaletay Yesu pa mulong wa wom?

⁵ Avud pakach pa antu amutesha Yesu adinga mu mashakamin mayimp, in Yuda a pansh nakash. Chawiy, Yesu “[wayovila] riy, wayinanyin, mulong awiy ading ni kutambitamb ni kupalangan mudi amikoku akad kafung.” (Mateu 9:36) Ov, antu inay a pansh adinga nich usu wa kumulondul Yesu? Chakwel asala mwamu, chading chiyifanyidin kumwov Yehova wom, kangal antu bwat. Yesu walonda anch: “Kangal wovany wom wa in kujip mujimbu, kwinyim kwa chinach kakwetip kand chom chikwau cha kusal. Am nikukubabeshany en ufanyidinanya kwov wom: Mwin kwel anch wajipan ndiy ukwet usu wa kutwalan mu Gehen, mwovany winau wom; inge, nakulejany anch mwovany ndiy wom. Atusakal atan kakat kuyilandiship ku makut maad? Kwikil umwing wa awiy uvuramedinau ku mes kwa Nzamb. Pakwez nswich ja ku mitu yen ajichindil kamu jawonsu. Kangal wovany wom; usey wen upandikenamu wa atusakal avud.”—Luka 12:4-7.

6. (a) Mazu ik ma Yesu mayikasikesha in Kristu? (b) Ov, mulong wak Yesu udi chilakej chiwamp cha kumekesh wom wa Nzamb?

⁶ Pakatau kuyipompat in kumwov Yehova wom kudi akankuny nau chakwel kuyilikish kumusadil Nzamb, akat kuvurik chiyul chinech cha Yesu anch: “Muntu wawonsu ukeza kangitiyil am ku mes kwa antu, ndiy mwinau ukez kitiyijau kand kudi mwan a muntu ku mes kwa angel a Nzamb. Pakwez ukez kangitun am kurutu kwa antu, ni yend akez kamutun kurutu kwa angel a Nzamb.” (Luka 12:8, 9) Mazu minam mayikasikesha in Kristu, pakampwil mu jingand mujidikinau difukwil diakin. Antu inay adandamedin kumushiman Yehova mu ujindj ku yikumangan ya Ukristu ni mu mudimu wau wa patok. (Midimu 5:29) Yesu washa chilakej chiwamp mu kumekesh “wom wa wi-Nzamb.” (Hebreu 5:7) Palondilay piur pend, Dizu dia uprofet dialonda anch: “Mwiku wa [Yehova] ukez kumwinkish ndiy . . . [mwiku wa kujingunin] rusot ra [Yehova] ni kumulimish. Ndiy ukez kusangar pakumuziyil [Yehova].” (Isay 11:2, 3) Chawiy, Yesu ufanyidin kamu kutulej yiyukish ya kumwov Nzamb wom.

7. (a) Chom ik chisotilay Yesu anch tusala? (b) Mutapu ik ukutwishau anvaj kulondul chilakej cha David?

⁷ Antu awonsu alondwila chilakej cha Yesu ni aziyidila ku malejan mend, chakin kamu, itiyijin ku rubil ridia mudi ratway David anch: “Ezany en an wingovany, nikunilejany mwakumwovil [Yehova] wom.” (Kuseng 34:11) Chadinga chovikena kudiay David kuyitazuk amakundj end mudi “an” mulong adinga ni kumuchingejin ndiy mudi ntakel wau. Ku mutambu wend, David wayinkisha in kumulondul ukwash wa kumwov Nzamb wom chakwel atwisha kwikal mu uumwing ni kusanger kwitiyik kudi Nzamb. Chilakej chiwamp mudi ik kudi anvaj in Kristu! Yehova wayinkisha ulabu piur pa anau amakundj ni amband chakwel “[kuyikand] ni kuyibabesh nich malejan ma [Yehova].” (Efesus 6:4) Kusutil ku kwisamb ni anau milong ya mu spiritu pichuku-pichuku ni kwilej nau Bibil, anvaj akat kuyikwash anau kusanger mwom mu kumwov Yehova wom.—Kuvurik Yijil 6:6, 7.

Mutapu wa Kumekesh Wom wa Nzamb

8, 9. (a) Chom ik chikata kusal anch mwom wa kumwov Nzamb wom wikal usangareshina? (b) Chom ik chitinau chakwel kulam rudim retu?

⁸ Mudi mutwalondang kwisambishil, kumwov Yehova wom kukatap kutukish musangar. David wipula anch, yik yifanyidinay kusal “muntu usotila mwom ni kukat machuku mavud chakwel amanang kuwap”? (Kuseng 34:12) Choviken patok, anch kumwov Yehova wom udi musul wa kusanger mwom wa chikupu ni kuman uwamp. Pakwez, chiswapeling kulond anch, “Nimwovil Nzamb wom.” Chom chikwau chidi cha kuumekesh kusutil ku mwikadil wetu. Chawiy, David udandamedin kurumburil mutapu tukutwisha kumekesh wom wa wi-Nzamb mu yisal.

⁹ “Alama kwend rudim rend ku kuyip ni milamu yend ku kulond ya rubabek!” (Kuseng 34:13) Mwiku wa Nzamb, wamubachika kambuy Pita ajimbula chikunku chinech cha Kuseng wa 34 payiyulay in Kristu kwisadil umwing ni mukwau nich rukat ra ukadivar. (1 Pita 3:8-12) Kulam rudim retu ku yom yiyimp kurumburikin anch twiyepa kupalangesh rinyinyit riyimp. Pakwez, tukez kudandamen chisu chin chawonsu kwikal in kutung pitwisambina ni antu akwau. Chikwau kand, tukez kwikasikesh kwikal in kukasikesh ni kulond uyakin.—Efesus 4:25, 29, 31; Yakob 5:16.

10. (a) Rumburil chirumburikina kwiyep ku uyimp. (b) Yik yidia mu kusal uwamp?

¹⁰ “Diokalany ku kuyip, salany kuwap, sotany chisambu ni uchilamatany!” (Kuseng 34:14) Tukat kwiyep yom yifishinay nich Nzamb, mudi masandj, pornografi, wij, urund ni aspiritu ayimp, chisum, kuleu, ni kuna mon ya kulewish. Tulikining kand kwipuwangesh kukweta yom yijondila. (Efesus 5:10-12) Chinyim ni chinech, tukat kusadil chisu chetu mulong wa kusal yom yiwamp. Chom chipandikenamu kuwap chitukutwisha kusal chidi kusal pakad kujing mudimu wa kulejan Want ni kwikadish in kwilej, kuyikwash antu akwau atwisha kutambul dipandish. (Mateu 24:14; 28:19, 20) Mu kusal yom yiwamp mudi kand kwirijek mulong wa kukumangan ku yikumangan ya Ukristu, kupan milambu mulong wa mudimu wa pa mangand mawonsu, kulam Chot chetu cha Want, ni kubangin piur pa maswir ma in Kristu adia mu kuswir.

11. (a) Mutapu ik David wasadilay yom yalejanay piur pa chisambu? (b) Chom ik ukutwisha kusal mulong wa ‘kusot chisambu’ mu chikumangen?

¹¹ David washa chilakej chiwamp cha kusot chisambu. Tupamp twaad wamana mutapu wa kumujip Saul. Tupamp twawonsu twaad, walika kumujip ni walonda kwa kalimish ni mwant, wachingejina kuchirish chisambu. (1 Samwel 24:8-11; 26:17-20, NW) Chom ik chifanyidina kusal ilel anch kwikal mwikadil usotila kurumbangesh chisambu mu chikumangen? Tufanyidin “kusot chisambu ni kuchilamat!” Chawiy, anch twaman anch kudi kupwitijan pakach petu ni mbay mukaritiy, tukwitiyij chiyul cha Yesu anch: “Yang . . . ukasambish kuchakul nend mwanamakwey.” Kupwa tukudandamen ni yisal yikwau ya difukwil diakin.—Mateu 5:23, 24; Efesus 4:26.

Kumwov Nzamb wom Kuletin Yiyukish Yivud

12, 13. (a) Yiyukish ik yisangaredinau ilel in kumwov Nzamb wom? (b) Yehova ukez kusal nchik, anch kudil kwetu mulong wa ukwash kwaswej?

¹² “Mes ma [Yehova] madi padi in kutentam, ni matu mend manzurikidin ku kudil kwau.” (Kuseng 34:15) Rusangu ra yisal ya Nzamb ni David yimekeshin uyakin wa mazu minam. Ilel, tukat kuman musangar ujim ni chisambu cha mu muchim mulong twij anch Yehova ukat kutulam. Tuchingejin anch ndiy ukudandamen kubangin maswir metu, ap pa chisu tukwikala mu mar makash. Twij anch katat kamu ak, in kwifukwil akin awonsu akez kuyandamin kudi Gog wa Magog wabwakau ni “Dichuku dia [Yehova] dikwatishena wom.” (Yowel 2:11, 31; Ezekiel 38:14-18, 21-23) Wikalap mwikadil wa mutapu ik watutanina kal, mazu ma David makwikal makin ku mutambu wetu anch: “In kutentam adila ni [Yehova] watesh, wayikamunina awonsu ku milong yau.”—Kuseng 34:17.

¹³ Chikez kwikal cha musangar mudi ik pa chisu chinicha pa kumuman Yehova ukat kutumbish dijin diend dijim! Michim yetu yikez kwizulijan nich wom ujim ni kalimish kupandakanamu muchidia ilel, ni akankuny awonsu akez kov usany. “Mpal ya [Yehova] yipompatijadin nau in kusal nayimp, mulong wa kujimangesh chivurikish chau pa mangand.” (Kuseng 34:16) Dikez kikal difut dijim mudi ik kuman dipandish dined dijim mu mangand masu ma Nzamb!

Yakushilamu Yitukwashina Kujijaman

14. Chom ik chikutwisha kutukwash kujijaman chikalap nchik mar?

¹⁴ Chakwel, kudandamen kumuziyil Yehova mu mangand mayimp ni mijondila kwitin kujijaman. Kumwov Nzamb wom kudi kwa ukwash ujim pitukudishina kuziyil. Mulong wa machuku makash mu tudia, atushalapol amwing a Yehova akat kuman mar makash makata kuziyish michim yau ni spiritu wau, kupandikanamu muchadinga pasak. Pakwez, akutwish kwikal nich kashinsh anch, ang amuchingejin Yehova, ndiy ukez kuyikwash chakwel ajijamana. Mazu ma David maletin rongoj rijim anch: “[Yehova] udi piswimp nau awiy akweta michim yinenganena, ukat kuyipandish akweta michim yitudishila.” (Kuseng 34:18) Chikasikeshin, David wadandamena kulond anch: “Mwin kutentam ukwet yakamish yivud, pakwez [Yehova] ukat kumudioshamu mu yawonsu.” (Kuseng 34:19) Chikalap uvud wa mar makutwisha kutushiken, Yehova ukwet usu wa kutudioshamu.

15, 16. (a) Mar ik mateshay David papwishay kufund Kuseng wa 34? (b) Chom ik chikutwisha kutukwash kujijaman ku yoziu?

¹⁵ Kupwa kamu kwa kufund Kuseng wa 34, David watesha mar mayishikena antu adinga mu Nob, ajipau kudi Saul ni pakach pau pading in kupesh avud. Wanenganana mudi ik pavurikay anch chidi mulong wa kwez kwend ku Nob chawiy chalangwisha nkabu ya Saul! (1 Samwel 22:13, 18-21, NW) Pakad kwidjidjek, David wakarumukina kudi Yehova chakwel amukwasha, ni chakin kamu watana rongoj mu ruchingej ra kurutu ra disanguk dia “ayingila”—Midimu 24:15.

¹⁶ Ilel, ruchingej ra disanguk rikat kutukasikesh ni yetu. Twij anch kwikil chom chikutwishau kusal akankuny netu cha kutujiyish chikupu. (Mateu 10:28) David niyend wamekesha ritiy mudi riner mu mazu manam: “Ndiy ukat kulam mafup mend mawonsu, kwikil dimwing dibukukina.” (Kuseng 34:20) Verse winou wawanina mudi mwovikenay padiay Yesu. Ap anch Yesu amujipa kwa chisum, “kabukunap” difup diend, ap dimwing. (Yohan 19:36) Mu kurumburil mu mutapu ujim, Kuseng 34:20 utwinkishin kashinsh anch kwikil yoziu ap yisu yirishinau nich in Kristu azizidilau many ni “ambay nau amikoku akwau”, yikeza kuyishesh chikupu. Mafup mau makezap kubukuk, mu kulond kwa chifanikesh.—Yohan 10:16.

17. Mar ik mayichingedina antu akad kukarumuk ayikisila antu a Yehova?

¹⁷ Mwikadil udi mutapu windjing ku mutambu wa muntu muyimp. Katat kamu ak akez kwangul uyimp wakunau. “Kuyip kukez kujip antu ayimp, ni awonsu ayikisila atentamina akez kayifish nich.” (Kuseng 34:21) Awonsu adandamedina kuyipompat antu a Nzamb akez kuman mar makash. Pakezay kuburik Yesu Kristu, awiy “akez kayitanyish mar . . . chikupu.”—2 Tesalonika 1:9.

18. Mutapu ik “chisak chipandikena kujimb” chatambwila kal difut, ni chidi nchik pa machuku ma kurutu?

¹⁸ Kuseng kwa David kupwil nich mazu am maletina kashinsh anch: “[Yehova] ukat kukamunin mipim ya atushalapol end, kwikil umwing wa awiy ikangidila mwi Ndiy ukez kafishau nich.” (Kuseng 34:22) Piswimp ni kwisudiel kwa winyikel wend wa mivu 40, Mwant David walonda anch: “[Nzamb] wapandisha mupim wam ku mar mawonsu.” (1 Ant 1:29, NW) Mudi David, in kumwov Yehova wom akez katat kutwish kutal kwinyim ni kusangar mulong wa kupandishiu kwau kudiokal ku kufishiu nich kwawonsu ku chitil ni kupandishiu kwa yoziu yin yawonsu. Pakwez, in Kristu avud azizidilau many atambwil kal difut diau mwiur. “Chisak chipandikena kujimb” cha antu a michid yawonsu akat kwinung katat pamwing ni atushalapol a anamakwend a Yesu mu kumusadil Nzamb ni kusanger mwikadil wishitwila kurutu kwa Yehova. Chidi mulong awiy itiyijina mu usu wa kuyipandish wa mash michilay Yesu. Mu Winyikel wa Mivu Kanan wa Kristu wezinaku, akez kuyinkish kwisakin kwawonsu kwa yakupesh ya difut, kuyishikij mu chilik cha kwikal antu awanyidina.—Kuburik 7:9, 14, 17; 21:3-5.

19. Yid ya “chisak chipandikena kujimb” yikwatin mupak wa kusal ik?

¹⁹ Ov, mulong wak ukezau kwinkish “chisak chipandikena kujimb” cha in kumwifukwil Nzamb yiyukish yiney yawonsu? Mulong awiy akwata mupak wa kudandamen kumwov Yehova wom, akat kumusadil nich wom ni kumuziyil nich kalimish. Chakin kamu, kumwov Yehova wom kukat kusangaresh mwom katat ni kutukwashin kulamat ku ‘mwom udia kamu wakin’—mwom wa chikupu mu mangand masu ma Nzamb.—1 Timoteu 6:12, 18, 19; Kuburik 15:3, 4.

Ov, Uvurikin?

• Ov, mulong wak tufanyidina kumwov Nzamb wom, ni chirumburikin ik kumwov wom?

• Kumwov Nzamb wom kukwet usu ik pa mwikadil wetu?

• Yiyukish ik yidiokilinga ku kumwov Nzamb wom?

• Yakushilamu ik yitukwashina kujijaman?

[Chipich chidia pa paj wa 29]

In kumwov Yehova wom akweting ujindj pa chisu chijidikinau mudimu wau

[Chipich chidia pa paj wa 31]

Chom chipandikenamu kujimb chitukutwisha kuyisadil amutej netu chidi kuyilej rusangu ruwamp ra Want