Wayuk Muntu Umwovila Yehova Wom!

“Wayuk muntu umwovila [Yehova] wom.”—KUSENG 112:1.

1, 2. Kumwov Yehova wom kukutwish kulet ik?

MUSANGAR ukatap kwiyezin. Musangar wakin wengamidin pa kutond kuwamp, kusal yom yitentamina, ni kulik kusal yom yiyimp. Sakatang wetu, Yehova, watwinkisha Dizu diend, Bibil, chakwel atuleja mutapu tukutwisha kusanger mwom upandikena kuwap. Kusutil ku kukimbijol ni kulondul umutakel wa Yehova, charumburik anch kumwov Nzamb wom, chakin kamu tukutwish kwitudish ni kusangar.—Kuseng 23:1; Jinswir 14:26.

² Mu mutu wa mulong winou, tukushinshikin yilakej ya pa chirung cha Bibil ni ya katat yilejena anch kumwov chakin Nzamb wom kukat kumwinkish muntu usu wa kujijaman mu chipwichik cha kusal yom yiyimp ni kumukasikesh kusal yom yiwamp. Tukuman kand anch kumwov Nzamb wom kukutwish kutuletin musangar ni kutushikij ku kutenchik mwikadil uyimp wa mwom, mud mwasalay Mwant David. Tukez kand kuman anch kumwov Yehova wom udi uswan upandikena kuwap ukutwishau anvaj kuyiswanish anau. Chakin kamu, Dizu dia Nzamb ditulejin anch: “Wayuk muntu umwovila [Yehova] wom.”—Kuseng 112:1.

Kuchirish Musangar Washadika

3. Chom ik chamukwasha David alanka kudiokal ku yitil yend?

³ Mud mutwisambinang mu mutu wa mulong wasambelang ou, tupamp tusatu David wakanganya kumwov Nzamb wom wakin ni wasala yitil. Pakwez, mutapu witiyijay dipup dia Yehova walejana anch ndiy wadinga chakin kamu muntu umwovila Nzamb wom yikalap nchik yitil yasalay. Kumwov kwend Nzamb wom ni kumulimish kwamubachika David kwitiyij kurumbuk kwend, wonana mwom wend, ni wachirisha kand urund wend uwamp ni Yehova. Ap anch kurumbuk kwend kwamuletina riyind ni padi antu akwau kand, kukarumuk kwend kwakin kwasala anch Yehova adandamena kumukwash ni kumuyukish. Chilakej cha David chikutwish chakin kamu kuyikasikesh in Kristu akutwisha ilel unou kuwil mu chitil chijim.

4. Kumwov Nzamb wom kwamukwasha nchik muntu umwing kuchirish kand musangar?

⁴ Shinshikin yamushikena Sonja.a Ap chadingay mwin kulejan wa chisu chawonsu, Sonja wakwata urund ni arund ayimp, wasambisha kwiyandjik mu ngikadil yakad kwikal ya Ukristu, ni amwopata mu chikumangen. Chisu chachirishay manangu mend, Sonja wasala yom yawonsu yadinga yiswirikena mulong wa kutenchikiril urund wend ni Yehova. Amuchirisha mu chikumangen. Mu chirung chinech chawonsu, Sonja kashadishap maku mend ma kumusadil Yehova. Mu kusut kwa chisu, wasala kand mujikit wa chibol wa rawonsu. Kupwa, amwata kud mukurump umwing mwin Kristu ukweta chilakej chiwamp, ni katat usadil ni musangar pamwing nend mu chikumangen. Ap anch Sonja wova ushon nakash mulong wa kupumbuk kwapumbukay mu chisu kanang mwi njil ya Ukristu, ndiy usanger anch mulong kumwov kwend Nzamb wom kwamukwasha kumuchirikin Yehova.

Chiwapin Kuman Mar Kupandakanamu Kusal Chitil

5, 6. Rumburil mutapu ik ni mulong wak David wapandisha mwom wa Saul tupamp twaad.

⁵ Inge, chidi cha ukwash nakash, anch kumwov Nzamb wom kumukwashin muntu kwiyep kusal chitil chijim. Mwamu chadinga ku mutambu wa David. Dichuku dimwing, Saul waya ni amasalay tunan tusatu kumukwat David, Saul wandama mu dibuku—mu dibuku din kamu mwadinga mujingamenay David ni antwend. Antu a David amukasikesha anch amujipa Saul. Ov, Yehova kamutekap mukankuny nend mwin kufa mu makas mend? David wamushejina Saul pakemp-pakemp ni wakatul rubul wa yidjal yend. Mulong David wadinga umwovila Nzamb wom, ap chisal chinech cha chamwamu chavundangesha kom kend. David wayela antwend adinga ajimena anch: “Chitwishikinap ku mutambu wam, mu muchimenay Yehova, anch namusala nsalejam chom chinech, uzizidilau many wa Yehova.”b—1 Samwel 24:1-7, NW.

⁶ Dichuku dikwau, Saul wateka chibeng cha amasalay uchuku, chad ndiy ni antwend awonsu ni alala “tul tukash twadiokala kudiay Yehova.” David ni mwipwend chifuvu Abishay andama mukach mwa chibeng ni aya zwant padiay Saul wadia ulela. Abishay wasota anch amujipa Saul kapamp kamwing ni chikupu. David wamulikisha Abishay, ni wamwipul anch: “Ov, nany woninap kal chikas chend kumutaliken uzizidilau many wa Yehova ni washala mwer?”—1 Samwel 26:9, 12, NW.

7. Chom ik chamukwata David alika kusal chitil?

⁷ Ov, mulong wak David walika kumujip Saul pikalay ni mutapu wa kusal mwamu tupamp twaad? Chadinga mulong wading umwovil Yehova wom kupandakanamu wom wamwovay Saul. Mulong wa kumwov kwend Nzamb wom ufanyidina, David witiyija kuman mar pichitwishikina pa ndond pa kusal chitil. (Hebreu 11:25) Wadinga nich ruchingej rikash mudiay Yehova anch ukat kulam antwend ni ukumulam amwinend. David wadinga wij anch kumuziyil ni kumuchingejin Nzamb kukez kulet musangar ni yiyukish yivud, pakwez kumudiburil Nzamb kukez kumuletin rukis ra Nzamb. (Kuseng 65:4) Wadinga wij kand anch Nzamb ukez kuwanyish kushilamu Kwend kwa kumwikadish David mwant ni ukez kumudiosh Saul pa chisu chisotilay amwinend ni mu mutapu wend.—1 Samwel 26:10, NW.

Kumwov Nzamb Wom Kuletining Musangar

8. Mwikadil wa David mwishin mwa chipwichik udi nchik chilakej?

⁸ Chitudia in Kristu, tukutwish kuchingejin anch akutuswingish, kutupompat, ni yoziu yikwau. (Mateu 24:9; 2 Pita 3:3) Pa yisu yimwing, tukutwish kurish nich yikokujol yidiokila kud ambay netu akaritiy. Pakwez, twij anch Yehova umen yom yiney yawonsu, uteshin malembil metu ni, pa chisu chifanyidina, ukez kutenchik milong kulondwish nich rusot rend. (Rome 12:17-21; Hebreu 4:16) Chawiy lel, pa ndond pa kuyov wom akankuny netu, tukat kumwov Nzamb wom ni kumuchingejin chakwel atupandisha. Mud David, tukatap kwifundakesh ayinetu, ap kujiril yijil yitentamina mulong wa kwiyep mar. Kwisudiel, chinech chikat kulet musangar. Mutapu ik?

9. Let chilakej chimekeshina anch kumwov Nzamb wom kukutwish kulet musangar rikalap nchik rupompat.

⁹ Mishoner umwing ipal wasadila chisu chilemp mu Afrik ulondil anch: “Nitongin chilakej cha maku umwing ni mwanend mband wa dikum dia mivu, mulong wa kulik kwau kwandam mu milong ya mangand kwa Ukristu awiy alika kuland makart ma chisak cha chipolitik. Ayichanya yibul kud amakundj amwing in chisum ni kupwa ayileja kuchirik kwol kau. Padingau ni kuchirik ku chikumbu, maku wapakisha kumwongoj mwanend mband wadinga ni kudil ni kusot kwijik mulong wak chom chinech chayishikena. Pa chisu chinicha kasangarap bwat bwat, pakwez adinga nich kom kishitwila. Kupwa, kupwa asangar kamu nakash anch mulong amuziyila Nzamb. Anch alanda makart ma chisak cha chipolitik, ing antu ela kusangar nakash. Amakundj ela kuyinkish milond ya maar matalijadina ni kuyijil maj mwi njil mwawonsu djat ni kwol kwau. Pakwez changadim ni makwend, ijika anch, ang ajiril yijil, akez kikal in riyind nakash pa mangand.” Kumwov kwau Nzamb wom kwayichidija ku yom yiney yawonsu.

10, 11. Yibudikin ik yiwamp yatanay mband umwing wamwova Nzamb wom?

¹⁰ Kumwovang Nzamb wom kukat kuletang kand musangar pa chisu cha kurish nich yoziu yitadila mutapu wa kulimish kutumb kwa mwom. Pakay Mary madikaj ma mwanend wa kasatu, dokiter wamukasikesha kumadiosh. Dokiter wamuleja anch: “Udi mu mwikadil wa ubaj nakash. Mu asaa 24 ay ashalaku kal ukutwish kwikal mu mwikadil wa ubaj nakash ni ukufa. Ni mwan niyend ukufa kwend. Chikalap nchik, kwikil chom chilejena anch mwan ukwikal mukash.” Mary wading wilejin Bibil ni Atuman a Yehova pakwez wadinga kand kal ababatishiu. Mary ulondil anch: “Ap mwamu, nakwata mupak wa kumusadil Yehova, najijamana kumuziyil, yikalap nchik yikutwisha kubudikin.”—Kubudik 21:22, 23.

¹¹ Padingay ni madikaj, Mary wileja nakash Bibil ni wabangina dijuku diend. Chawiy lel mwan wavadika. Mary ushimunin anch: “Kuval kwadinga kukash pakemp kupandikanamu pinayivala an aad a kusambish, pakwez kwadingap kwa mar nakash.” Kumwov Nzamb wom kwamukwasha Mary ilamina kom kishitwila, ni kupwa wababatishiwa. Pakulay mwan winou, niyend wileja kumwov Yehova wom, ni katat ukat kusadil ku biro umwing wa mutiy wa Atuman a Yehova.

‘Ikasikeshina Mudiay Yehova’

12. Kumwov Nzamb wom kwamukasikesha David mutapu ik?

¹² Wom wa David mulong wa Yehova wasala yivud kupandakanamu kusu kulik kusal uyimp. Wamukasikesha kukwat mupak ukash padingay mu mikadil yikash. David ni antwend amuchina Saul, mu muvu umwing ni angond anying aya ku Sikilag mwi ngand ya in Filistin. (1 Samwel 27:5-7, NW) Dichuku dimwing amakundj kadingakwap, ij in kubuu a in Amalek osha musumb ni ayisenda amband awonsu, an ni yivam yawonsu. Pachirikau ni kutal yashikenaku, David ni antwend adila. Ujim wakarumuka swa wikal rukuny, ni antu a David asota kumwas mayal. Wikalap nchik ushon wovay, David kashadishap ruchingej. (Jinswir 24:10) Kumwov kwend Nzamb wom kwamubachika kukarumukin kud Yehova, ni “wikasikeshina mudiay Yehova.” Nich ukwash wa Nzamb, David ni antwend ayikwata in Amalek ni ayitambula yom yawonsu.—1 Samwel 30:1-20, NW.

13, 14. Kumwov Nzamb wom kwamukwasha nchik mwin Kristu umwing kukwat mipak yiwamp?

¹³ Ilel, antu a Nzamb niyawiy akat kurish nich mikadil yiyitina kumuchingejin Yehova ni kukapuk mulong wa kukwat mupak ukash. Tushinshikinany chilakej cha Kristina. Padingay uchidi changadim, Kristina wileja Bibil ni Atuman a Yehova. Pakwez wadinga ni kusot kwikal chid cha chisak cha in kubul piano, ni waya kurutu nakash mu mudimu winou. Chikwau kand, kom kend kamubachika kand kulejan ni chawiy lel wova wom wa kwitiyij chisend chidiokilinga ku dibabatish. Chadandamedinay Kristina kwilej Dizu dia Nzamb, ndiy wasambisha kwov usu wa Dizu dia Nzamb. Wileja kumwov Yehova wom, ni wajingunina anch Yehova uyichingejin atushalapol end anch amukata nich muchim wau wawonsu, manangu mau mawonsu, mupim wau wawonsu, ni usu wau wawonsu. (Mako 12:30) Chinech chamubachika kwipan kud Yehova ni kubabatishiu.

¹⁴ Kristina wamwita Yehova ukwash mulong wa kuya kurutu muspiritu. Kristina urumburil anch: “Nading nij anch mu mwom wa kubul piano mwadinga kwend maweny chisu chawonsu ni kwovijan mulong wa kubul tupamp 400 pa muvu. Chawiy nakwata mupak wa kwikal mulej mulong wa kwikal nich nfalang ja kwikwash nich amwinam ni kusal mud mwin kulejan rusangu ruwamp wa chisu chawonsu.” Pa chisu chinicha, Kristina adinga ni kumutek ku program chakwel aya kulond patok ya kuya kwend kurutu mu chot chimwing cha kuwangin chijikena nakash mwi ngand yau. Ndiy ulondil anch, “kubul kwam kurutu kwa antu avud kwakarumuka kwikal kwa nsudiel.” Kristina amwata kal kud mukurump mwin Kristu. Awonsu pamwing akat kusadil ku biro wa mutiy umwing wa Atuman a Yehova. Ndiy usanger anch Yehova wamwinkisha usu wa kukwat mipak yitentamina ni anch ukutwish katat kusadil chisu ni usu wend mu mudimu wa Yehova.

Uswan Upandikena Kuwap

15. Chom ik chadinga chisotilay David kuyishil anend, ni mutapu ik wasalay mwamu?

¹⁵ David wafunda anch: “Ezany en an wingovany, nikunilejany mwakumwovil [ Yehova] wom.” (Kuseng 34:11) Mud tatuku, David wadinga nich chitongijok cha kuyinkish an uswan upandikena kuwap wadingay nich—kumwov Yehova wom wakin, ni wisikena. Kusutil ku mazu ni ku yisal, David wamufanikesha Yehova, chadingap mud Nzamb mwin kwakamishan, uchingejina kuman mutapu ukujirilau yijidik Yend, pakwez mud Tatuku wa an adia pa divu, mwin rukat, mwin kuyibangin ni mwin kuyilikishin. David wipula anch: ‘Ov, nany ukutwisha kujingunin kurumbuk kwend?’ Chipul chinech, chimekeshin ruchingej rend mudiay Yehova anch kakatap chisu ni chisu kusop mulong wa kujingunin kurumbuk kwetu, ndiy wawejaku kand anch: “Ntokishap am ku tuyimp tujingamina.” Pakwez, David wadinga nich kashinsh anch, ang wasal usu wend wawonsu, mazu mend ni yitongijok yend yikez kwitiyik kud Yehova.—Kuseng 19:12, 14.

16, 17. Mutapu ik ukutwishau anvaj kuyilej an kumwov Yehova wom?

¹⁶ David udi ilel unou chilakej kud anvaj. Ralph ni mwanamakwend asadidil ku biro wa mutiy umwing wa Atuman a Yehova, ulondil anch: “Anvajetu atulila mu mutapu umwing wa kwel anch tusangera uyakin. Pitwadinga anikanch, adinga ni kututek mu mambamb mau piur pa mijikit ya chikumangen, ni twasangera nakash uyakin mud mwasangerau niyawiy. Atulila chakwel twitiyij anch tukutwish kusal yom yiwamp mu mujikit wa Yehova. Chakin kamu, dijuku dietu diashakama mivu yivud mwi ngand yimwing mwadinga kuswir kukash kwa atutwambil a Want, akwasha kusal yikumangen yisu.

¹⁷ “Chom chatukwasha kushal mwi njil yitentamina chadingap muruzu wa yijidik yikash, pakwez chadinga anch ku mes kwa anvajetu, Yehova wadinga wakin ni mwin rukat ni muwamp nakash. Asota kumwijik Yehova nawamp nakash ni kumusangaresh, ni twilejina ku kumwov kwau Nzamb wom wakin ni ku kumukat. Ap pa chisu twasalanga chom kampand chiyimp, anvajetu kasalangap chakwel twiyova anch Yehova utukisin; ni kadingap kututekin yijidik ya chamwamu. Chisu chivud, adinga ni kutushichik pansh kupwa kwisamb netu, yisu yimwing Maku wadinga ni kusukumun mansoj mu mes, wapakisha kushik ku michim yetu. Ni chasonga mabuj. Twilejina ku mazu ni ku yisal ya anvajetu anch kumwov Yehova wom chawiy chom chipandikenamu kuwap ni kwikal umwing wa Atuman kudi kwa musangar ni mazang, kudiap chisend chilimina.”—1 Yohan 5:3.

18. Chom ik tukeza kutambul anch twamwov Nzamb wakin wom?

¹⁸ Mu “mazu ma nsudiel ma David,” tutanginamu anch: “Anch mwin kuyiyikel antu utentamin, uyikedil mu wom wa Nzamb, ukwikal mud musas a muten, anch muten wasambuk.” (2 Samwel 23:1, 3, 4, NW) Chimeken anch Salomon, mwan a David ni mwin kumuswinkan, watesha kurumburik kwa mazu minam, mulong wamwita Yehova anch amwinkisha “muchim wa kuziyin” ni ukaliweny wa “kwonganyin pakach pa kuwap ni kuyip.” (1 Ant 3:9, NW) Salomon wajingunin anch kumwov Yehova wom wawiy musul wa manangu ni musangar. Kwinyim, weza kulond mu wiswimp yidia mu buku wa Mulej mu mazu minam: “Kwinyim kwa yom yiney yawonsu, kwashal chom chimwing cha kulond. Mulimisha Nzamb, ziyil ku malejan mend, mulong wa chom chinech chawiy chamutangilau muntu. Nzamb ukez karumburish yisalijok yetu yawonsu, yiyimp ni yiwamp, ni yawonsu yitwasala ku ujindj.” (Mulej 12:13, 14) Anch twatesh chiyul chinech, chakin kamu tukez kuman anch chibudikin cha “kwitudish ni kumwov [ Yehova] wom” chidiap ching kusu kwak manangu ni musangar pakwez kand “dipit, ni katumb, ni mwom.”—Jinswir 22:4.

19. Chom ik chikeza kukutwishish kutesh chirumburikina “kumwov [Yehova] wom”?

¹⁹ Kusutil ku yilakej yidia mu Bibil ni ya katat, twaman kal anch kumwov Nzamb wom ufanyidina kukwet chibudikin chiwamp mu mwom wa atushalapol akin a Yehova. Wom winou ukutuchidijap ching kusu ku kusal yom yakad kumusangaresh Tatukwetu wa mwiur pakwez ukutwish kand kutwinkish usu wa kurish nau in kutupompat ni kutukasikesh kujijaman mu yoziu ni yisu ya mar makash yikutwisha kutushiken. Chawiy lel, etu awonsu ansand ni amapal, tusala usu wetu wawonsu ni mushiku wa kwilej Dizu dia Nzamb, kutongijokin pa yitwilejina, ni kumushejin Yehova piswimp nakash mu malembil ma chisu chawonsu madiokila mu muchim. Anch twasal mwamu, kitukezap ching kusu kutan “ronganyin ra Nzamb” pakwez tukez kutesh chirumburikina “kumwov [ Yehova] wom.”—Jinswir 2:1-5.

[Mazu madia kwishin kwa paj]

Ov, Ukutwish Kurumburil?

Ov, mutapu ik kukutwisha kumwov Nzamb wom

• kumukwash muntu kulank ku chitil chijim nakash?

• kumuletin musangar chikalap nchik yoziu ni kuzengol?

• kutukasikesh tusala rusot ra Nzamb?

• kwikal uswan upandikena kuwap kud anetu?

[Chipich chidia pa paj wa 28]

Kumwov Yehova wom kwamukangesha David kumujip Mwant Saul

[Chipich chidia pa paj wa 31]

Kumwov Nzamb wom kudi uswan upandikenamu kuwap ukutwishau anvaj kuyiswanish anau