Ikal Mwin Manangu—Mwova Nzamb Wom!

“Kumwov [Yehova] wom diawiy disambishil dia manangu!”—JINSWIR 9:10.

1. Mulong wak chiyikasikedining antu avud kutesh chitongijok cha kumwov Nzamb wom?

PASAK chadinga chom cha katumb kulond anch muntu kanang umwovil Nzamb wom. Ilel unou, antu avud amen chitongijok cha kumwov Nzamb wom mud chom chimwing chikur nakash, chikasikena kutesh. Akutwish kulond anch: ‘Anch Nzamb udi rukat, mulong wak nifanyidina kumwov wom?’ Ku mutambu wau, kumwov Nzamb wom kufanyidinap bwat, chidi chom chimwing chikwatishena kamu wom nakash. Pakwez wom wakin wa Nzamb urumburikin yom yivud, mud mutapu tukumana, wom winou udiap kusu chovil cha kwakam ap mwong.

2, 3. Wom wa Nzamb urumburikin kusal yom ik?

² Bibil usadidin wom wa Nzamb nich chitongijok chimwing chiwamp. (Isay 11:3) Kadi kalimish kakurukina ni kajim mulong wa Nzamb, rusot rikash ra kulik kusal yom yikisinay. (Kuseng 115:11) Wom winou urumburikin kwitiyij yijidik yawonsu ya Nzamb ni kusot kushakam kulondwish nich yilondilay Nzamb anch yitentamin ap yiyimp. Mukand umwing umekeshin anch wom winou ufanyidina ukat kumekeshang “yitongijok ya pa dishin pantaliken ni Nzamb ukata kushikij ku kushakam kwa manangu ni ku kulik yom yawonsu yiyimp.” Chawiy lel, Dizu dia Nzamb ditulejin anch: “Kumwov [Yehova] wom diawiy disambishil dia manangu!”—Jinswir 9:10.

³ Chakin, wom wa Nzamb ukwatin ku yom yivud ya mu mwom wa muntu. Ubombakenap kusu ni manangu pakwez ubombaken kand nich musangar, chisambu, mapit, kuvul kwa machuku, ruchingej ni kwikang. (Kuseng 2:11; Jinswir 1:7; 10:27; 14:26; 22:4; 23:17, 18; Midimu 9:31) Ukwatijadin kamu nakash nich ritiy ni rukat. Chakin, ukwatin kand ku urund wetu wawonsu nend Nzamb ni akwetu antu. (Kuvurik Yijil 10:12; Yob 6:14; Hebreu 11:7) Wom wa Nzamb urumburikin kwitiyij nich kashinsh anch Tatukwetu udia mwiur ukat kutubangin etu mu mutapu umwing wa pakampwil ni udi tayad kutulikishin yitil yetu. (Kuseng 130:4) Ching antu akad kukarumuk awiy akweta chakumwakamin Nzamb.a—Hebreu 10:26-31.

Kwilej Kumwov Yehova Wom

4. Yom ik yikutwisha kutukwash ‘kwilej kumwov Yehova wom’?

⁴ Mulong wom wa Nzamb udi wa usey chakwel kukwat mipak ya manangu ni kutambul yiyukish ya Nzamb, ov, mutapu ik tukutwisha ‘kwilej nawamp kumwov Yehova wom’? (Kuvurik Yijil 17:19) Mu Bibil mudi yilakej yivud ya amakundj nau amband amwova Yehova wom ‘ya kutulej nich etu.’ (Rome 15:4) Chakwel kutukwash kutesh chirumburikina chakin kamu kumwov Nzamb wom, tushinshikinany mwom wa umwing pa yilakej yidia mu Bibil, David, Mwant wa pasak wa Isarel.

5. Mudimu wa kubing amikoku wamukwasha mutapu ik David kwilej piur pa wom wa Yehova?

⁵ Yehova wamulika Saul, mwant wa kusambish wa Isarel, mulong wa kuyov kwend antu wom ni kuburen kwend kumwov Nzamb wom. (1 Samwel 15:24-26, NW) Pakwez, mwom wa David ni urund wend ni Yehova yamumekesha anch wadinga ikundj umwing umwovina chakin kamu Nzamb wom. Kudiosh kamu ku mivu ya ku usand wend, David wadinga chisu chivud ni kudish amikoku a tatukwend. (1 Samwel 16:11, NW) Mudimu wa kuyibing amikoku wasalangay uchuku machuku mavud wamukwasha David kutesh wom wa Yehova. Ap anch David watwisha kujingunin kusu chisu chikemp cha kujimb kupandakena kwa diur ni divu ni yawonsu yidiamu, ndiy washikena ku kulond kuwamp—Nzamb ufanyidin kalimish ketu ni difukwil dietu. Ndiy wafunda anch: “Anch natongijok ya maur mey, midimu ya miny yey, ngond ni atutumbu yiwashichika Ey, ing muntu udi nany lel chakwel ey ukumutong? Ni mwan a muntu nany ukwambamba nend?”—Kuseng 8:3, 4.

6. Kushinshikin kujimb kwa Yehova kwamwinkisha David yitongijok ya mutapu ik?

⁶ Chakin, David washimoka nakash pisikejay kukep kwend nich kujimb kwa maur mwizwila too atutumbu. Pa ndond pa kumubangish, ronganyin riner ramubachika kumushiman Yehova ni kulond anch: “Diur dikat kulejan uyaj wa Nzamb, ni yom ya mwiur yikat kumekesh mudimu wa makas mend.” (Kuseng 19:1) Wom winou wa Nzamb wamupwitina nakash David kud Yehova ni wamwikadisha muntu usotina kwilej ni kulondul jinjil jiwanyidina ja Nzamb. Tongin mutapu wiyovay David pamuwanginay Yehova anch: “Mulong Ey udi mujim upandikena, yiukata kusal yikwamushen. Ey udi kwey Nzamb amwiney pamwiney. Nlejap njil yey, A [Yehova], chakwel nikendil mu uyakin wey; bwalikesh muchim wam wova dijin diey wom.”—Kuseng 86:10, 11.

7. Kumwov Nzamb wom kamukwasha David mutapu ik kurish ni Goliyat?

⁷ In Filistin pakwatau ngand ya Isarel, chitabu ikundj wau wa ametre asatu, Goliyat, wayichirila in Isarel, wayel anch: ‘Tondany muntu nikurisha nend! Anch wawin, tukez kukusadilany.’ (1 Samwel 17:4-10) Saul ni chisak chend chawonsu cha amasalay ova wom nakash—pakwez David kovap wom bwat. Wadinga wij anch Yehova ndiy ufanyidinay kwov wom, kafanyidinap kumwov muntu wom, wikalap nchik usu ukwetay. David wamuleja Goliyat anch: “Nezin kud ey ni dijin dia Yehova wa yisak, ni chikumangen chinech chawonsu chikwijik anch Yehova kakatap kupandish nich mpak ya musamun ap murumbu, mulong njit yidi ya Yehova.” Nich mupil wend wa kwas nich atujil ni diyal kusu dimwing—nich ukwash wa Yehova—David wamujipa chitabu ikundj.—1 Samwel 17:45-47, NW.

8. Yilakej ya mu Bibil ya kumwov Nzamb wom yitufundishin yom ik?

⁸ Tukutwish niyetu kurish nich yikokujol ap akankuny akash mud yarishay nich David. Ov, chom ik tukutwisha kusal? Tukutwish kurish nich mud mwasalau David ni antu akwau ashinshamena a pasak—nich wom wa Nzamb. Kumwov Nzamb wom kukutwish kupandakan wom wa muntu. Nehemi Kashalapol ushinshamena wa Nzamb wayikasikesha ambay nend in Isarel, adinga ni kurish nau akankuny anch: “Kangal wayakamany antu inay. Tongijokany kudi Nsalejetu [Yehova], udi mujim, ukwamushena.” (Nehemi 4:14) Nich ukwash wa Yehova, David, Nehemi, ni atushalapol akwau ashinshamena a Nzamb atwisha kusal midimu yayinkau kud Nzamb. Niyetu tukutwish anch tumwovin Nzamb wom.

Kurish Nich Milong Yikutwisha Kubudikin Mulong wa Kumwov Nzamb Wom

9. Ov, mu mikadil ik mwamekeshay David wom mulong wa Nzamb?

⁹ Kupwa kwa David kumujip Goliyat, Yehova wamukwasha kand kuwin njit jikwau. Pakwez, Saul chovay mukau, ndiy wapakisha kumujip David—cha kusambish kapamp kamwing kamu, kupwa nich kadimbadimb, ni chad lel nau amasalay. Ap anch Yehova wamuleja David nich kashinsh anch ndiy ukez kadil want, David wafanyidina kuchinijok mu mivu kanang, kurish, ni kuchingel chisu chikezau kumudish want kud Yehova. Mu yawonsu yiney, David wamekesha anch wadinga ni kumwov Nzamb wakin wom.—1 Samwel 18:9, 11, 17; 24:2, NW.

10. Mutapu ik wamekeshay David wom wa Nzamb mu chisu cha ubaj?

¹⁰ Dichuku dimwing, David wachinina kwa Akish, mwant wa musumb wa Gath, wa in Filistin, mu ul wa Goliyat. (1 Samwel 21:10-15) Ayilol a mwant amujingunina David anch udi umwing wa akankuny a muchid wau. Mutapu ik wasalay David mu chisu chinech cha ubaj? Ndiy walembila kud Yehova. (Kuseng 56:1-4, 11-13) Ap anch ndiy warumba kwikal chizarik mulong wa kwipandish, David wading wij anch Yehova ndiy wamupandisha chakin ni kuyukish usu wend. David wamuchingejina Yehova nich muchim wend wawonsu ni ruchingej rend mwi ndiy ramekesha anch David wadinga chakin kamu ni kumwov Nzamb wom.—Kuseng 34:4-6, 9-11.

11. Mutapu ik tukutwisha kumekesh wom wa Nzamb mu yoziu, mud mwasalay David?

¹¹ Mud David, tukutwish kumekesh wom wa Nzamb anch twatek ruchingej retu mu kushilamu kwend anch ukutukwash kupwish milong tukweta. David walonda anch: “Pana njil yey kudi [Yehova], ukungamena mwi Ndiy, ni Ndiy ukez kachisal.” (Kuseng 37:5) Chinech chirumburikinap anch tukusend kusu milong tukweta twayitek mu makas ma Yehova wakad kusal chom ap chimwing ni kuchingej anch ndiy atukwasha. David kamwitap Nzamb ukwash ni kupwa washakam wakad kusal chom. Ndiy wasadila ukaliweny wend wa kutong ni manangu mend mamwinkishau kud Yehova ni kupakish kupwish mulong wadingay nich. Pakwez, David wading wij anch usu usadilau antu ukutwishap awinau kupwish milong. Mwamu kand chifanyidina kwikal ku mutambu wetu. Anch twasal yawonsu tukutwisha, tufanyidin kumushil Yehova yashalaku kal. Chakin, chisu chivud kudingap ap yitukutwisha kusal ching kusu kumuchingejin Yehova. Pinap pawiy pafanyidin kumekesh anch tumwovin Nzamb wom. Tukutwish kutan rongoj mu mazu malonday David anch: “Urund wa [Yehova] udi pamwing ni awiy akata kumwov wom, niyend ukez kayilej manswik mend.”—Kuseng 25:14.

12. Mulong wak tufanyidina kukwat nich usey malembil metu, ni yitongijok ik tufanyidin kamu kulik?

¹² Chawiy lel, tufanyidin kuman nich usey malembil metu ni urund wetu nend Nzamb. Pitumushejidina Yehova, tufanyidin ‘kwitiy anch uding kwaku, ni ndiy ukez kayifut awiy akata kumusot.’ (Hebreu 11:6; Yakob 1:5-8) Ni patukwashinay, tufanyidin ‘kumujikitish Nzamb,’ mud mutuyudilay kambuy Paul. (Kolosai 3:15, 17) Tufanyidinap ap pakemp kwikal mud antu arumburilau kud mwin Kristu uzizidilau many wamena kal yivud, walonda anch: “Antu atongina anch Nzamb udi mudi kashalapol wau mwiur. Pakwetau kuswir kwa chom, anch amwit ndiy kapamp kamwing wayakula. Anch wayinkish yisotinau, kasotinap kand kumuman.” Yitongijok ya mutapu winou yimekeshin kuburen wom wa Nzamb.

Yikata Kushiken Anch Wom wa Nzamb Wapwa

13. Chisu ik chakanganyay David kulimish Chijil cha Nzamb?

¹³ Ukwash wa Yehova watambulay mu chisu cha mar wajimbisha wom wa David piur pa Nzamb ni wakasikesha ruchingej rend mwi ndiy. (Kuseng 31:22-24) Pakwez, tupamp tusatu twa kabuj, wom wa David piur pa Nzamb wapwa, chom chamuletina yikokujol yivud nakash. Cha kusambish chimedin pa kurijek kwarijekay chakwel asendisha mushet wa manswik ma Yehova pa ditemb ni kuutwal ku Yerusalem pa ndond pa kuusendish pa makij ma in Levi, mud mwadinga Chijil cha Nzamb. Uza, wadinga ni kutakel ditemb, wafa kapamp kamwing papukunay ku Mushet chakwel kuushichik nawamp, mulong wa “chisal chinech chiburedina kalimish.” Mwaning, Uza warumbuka kamu nakash, ap anch David ndiy wamusarumwina rufu, pakanganyay kulimish Chijil cha Nzamb. Kumwov Nzamb wom kurumburikin kusal yom kulondwish nich yisotinay.—2 Samwel 6:2-9; Kuchind Michid 4:15; 7:9.

14. Yom ik yabudikinaku payichindau in Isarel kud David?

¹⁴ Kupwa, chamubachikau kud Satan, David wachinda in Isarel ading ayila kwi njit. (1 Jinsangu 21:1) Chasalay mwamu, David waburena wom wa Nzamb, ni chisal chinech chayijipesha in Isarel 70000. Ap anch David witiyila kurumbuk kwend ni kukarumuk kurutu kwa Yehova, ndiy nau antu adingay nend amana mar nakash.—2 Samwel 24:1-16, NW.

15. Yom ik yamushikija David ku kuwil mu masandj?

¹⁵ Kuburen kukwau kwa wom wa Nzamb kwa mu chisu chikemp kwamushikija David ku kusal masandj ni Bat-Sheba, mband a Uriy. David wadinga wij anch makaj ap kand kusot mband ap ikundj wayen chiyipin. (Kubudik 20:14, 17) Mulong wasambisha David pamumanay Bat-Sheba ukat kowal. Wom ufanyidina wa Nzamb wela kumubachik David kulik kutal ni kutongin yom yindjing. Pakwez, David ‘wadandamena kwend kumutal’ kushik ni pamwovilay ris ra kulal nend, ni ris riner rapandakanamu kumwov kwend Nzamb wom. (Mateu 5:28; 2 Samwel 11:1-4, NW) David wavuramena anch Yehova wadinga ni kushinshikin mwom wend wawonsu.—Kuseng 139:1-7.

16. Yibudikin ik yiyimp yamanay David mulong wa yitil yasalay?

¹⁶ Masandj masalay David ni Bat-Sheba maleta mwan. Kupwa kwa machuku makemp, Yehova wamutuma muprofet wend Natan kuya ni kumulej David chitil chend. Pachirishay manangu, David wachirikina kand kumwov Nzamb wom ni wakarumuka walik yitil. Wamwilembila Yehova chakwel kangal amudioshila spiritu wend utumbila. (Kuseng 51:7, 11) Yehova wamulikishina David ni kukepishaku dipup, pakwez kadioshap yibudikin yiyimp yawonsu ya yisalijok ya David. Mwan a David wafa, runeng ni mar mandamina mu dijuku diend. Madi masamun mayimp mud ik mulong kusu wa kudiul wom wa Nzamb!—2 Samwel 12:10-14; 13:10-14; 15:14, NW.

17. Rumburil runeng rikata kwez mulong wa yisalijok ya chitil.

¹⁷ Ilel unou, kuburen wom wa Nzamb mu milong ya ngikadil kukutwish ni kwawiy kwikal nich yibudikin yiyimp ya machuku mavud. Tongin bil runeng rikalay nich mband umwing changadim pateshay anch nfumwend mwin Kristu kanshinshamenap kand kudiay ndiy pasadinay mudimu ndond yindjing. Nich kusansan kwa muchim ni runeng, wikwat mwis wasambish kushikok kudil. Pasuta machuku minch chakwel anch amuchingejina kand nfumwend ni kumulimish? Yibudikin mud yiney yiyimp tukutwish kuyipuk anch tumwovin chakin kamu Nzamb wom.—1 Korint 6:18.

Wom wa Nzamb Utulamin ku Chitil

18. Rutong ik rikwetay Satan ni mutapu ik ukatay kusal?

¹⁸ Satan utwadil swa mangand mu kujiy, ni usotil kamu kuyijondish in Kristu akin. Chakwel kusal mwamu, ukat kusadilang njil yimwing yiswapela chakwel kutwandamin mu michim yetu ni mu manangu metu—kusutil ku yid ya mujimbu wetu, pakampwil mes metu ni matu metu. (Efesus 4:17-19) Mutapu ik ukusala anch waman pakad kuchingejin yipich ap yifwatul ya masandj, mazu ma masandj, ap antu asadila masandj?

19. Wom wa Nzamb wamukwasha nchik mwin Kristu umwing kupandakan choziu?

¹⁹ Shinshikin yamushikena André,b mukurump mwin Kristu, tatuku ni dokiter mwi Mputu. André padingay ni kusal uchuku wawonsu mudimu wend ku rupital, ambay nend a mudimu amband ading ni kumufundin tumikand—pafwatwilau muchim mud kufanikesh rukat r’ikundj ni mband—amutekinatu ku ulal, ni kumwit kusal nau masandj. André walika nich muchim umwing kushinshik yadingau ni kumwit. Chikwau kand, chakwel kwidiosh mwi ndond yiney yiyimp, ndiy wakimba mudimu kwindjing. Kumwov Nzamb wom kwikala kwa manangu ni kwamuletina yiyukish yivud, mulong ilel unou André ukat kukwash pa chipatu ku biro wa mutiy wa Atuman a Yehova wa mwi ngand yau.

20, 21. (a) Kumwov Nzamb wom kukutwish nchik kutukwash kwipuk kusal yitil? (b) Yom ik tukushinshikina mu mutu wa mulong ukulondula?

²⁰ Kutongin yitongijok yiyimp kukutwish kwamushikij muntu ku kwikal ni manangu ma kusot kusha urund wend upandikena kuwap ni Yehova ni kuswimp nich chakaday kwikal nich mbil. (Yakob 1:14, 15) Ku mutambu ukwau, anch tumwovin Yehova wom, tukwipuk—ap kuchin—antu, ndond, mijikit, ni kwipuwangesh kukutwisha kushesh mwikadil wetu wa kwichidij. (Jinswir 22:3) Wikalap nchik usany ap kwipan kukutwisha kwit kusal mwamu, usany ap kwipan kwinoku kudi kwakad usey anch twakwisikej nich kushadish kwitapil dilau dia Nzamb. (Mateu 5:29, 30) Kumwov Nzamb wom kurumburikin chakin kamu anch tulika kutal kwa kwikatil chom chin chawonsu twija anch chijondil, pamwing ni pornografi mu mitapu yin yawonsu, ni kwitin kand ‘kudiosh mes metu ku yom yamwamu.’ Anch twasal mutapu winou, tukutwish kumuchingejin Yehova anch ‘ukez kutulam’ ni kutwinkish chom chawonsu chiwamp tusotina chakin.—Kuseng 84:11; 119:37.

²¹ Chakin, kusal nich kumwov Nzamb wom kwa kashinsh kudi chisu chawonsu njil ya manangu. Kuding kand musul wa musangar wakin. (Kuseng 34:9) Wawiy mulong ukurumburilau patok mu mutu wa mulong ulondwilaku ou.

[Mazu madia kwishin kwa paj]

Ov, Ukutwish Kurumburil?

• Ngikadil ik ya Ukristu yidia mu kumwov Nzamb wom?

• Mutapu ik kumwov Nzamb wom kukat kupandakenamu kumwov muntu wom?

• Mutapu ik tukutwisha kumekesh anch tumen usey wa malembil?

• Kumwov Nzamb wom kukutwish kutulam mutapu ik ku yitil?

[Chipich chidia pa paj wa 25]

David wileja kumwov Nzamb wom kusutil ku kushinshikin yatangay Yehova

[Chipich chidia pa paj wa 26]

Chom ik ukusala anch wakad kuchingejin wawil mu mwikadil wa yoziu?