Kukimb Yakul Yakin

Mutapu ik nikutwisha kulam ukash wa mujimbu wam?

Chom ik nikutwisha kusal chakwel mwom wa dijuku diam wikala wa musangar?

Mutapu ik nikutwisha kwitapil dilau dia kulam mudimu wam?

OV, WIYIPULAP kal yimwing ya yipul yiney? Ov, watanap kal yakul yiwamp kamu? Muvu ni muvu, akat kupalangeshang mabuku kushalijan piswimp 2 000 makata kupan yiyul pa milong yiney ni yikwau yijim. Mu Grande-Bretagne kusu, in kutang ashadishining piswimp mamiliyon 150 ma madolar (nfalang ja États-Unis) pa muvu mulong wa kuland mabuku mapanina yiyul piur pa mutapu wa kurish nich yikokujol ya mwom. Mu États-Unis, kulandish kwa mabuku ma kwikwash nich kukat kwandjik piswimp mamiliyon 600 ma madolar pa muvu. Chakin kamu udiap kwey amwiney kusu ukata kukimb yiyul yiwamp ya kusadil mu mwom pichuku-pichuku.

Piur pa yiyul yidinga mu mabuku minam mavud, mwin kufund umwing walonda anch: “Mabuku mavud masu machirikididin kwau yom yafundau kal.” Chakin kamu, yiyul yivud yidia mu mabuku minam yimburijin manangu mafundau mu buku umwing mukur nakash wa mabuku madia mu mangand. Buku winou chakin kamu amupalangeshin nakash mu mangand. Amukarumwin kal mwawonsu wa kabuj ap chikunku mu jindim piswimp 2 400. Amuchapin kal mu mamiliyon 4,6 ni kusut mu mangand ma kabuj. Buku winou udi Bibil.

Bibil ulondil patok anch: “Mazu mawonsu ma Mukand wa Nzamb madiokala ku [s]piritu wa Nzamb, makutwish kuyilej antu kuyibabesh ni kuyitenchik, ni kuyilej kwirijek mu kutentam.” (2 Timoteu 3:16) Chakin, Bibil kamufundap mudi buku wa kwikwash nich. Rutong rend ra kusambish ridi ra kuyilej antu rusot ra Nzamb. Chikalap nchik mwamu, Bibil ulejen yom yivud piur pa mutapu wa kupwish milong yitukwatina etu awonsu, ni ushidilamu anch awonsu alondwila umutakel udiamu akez kutaninamu ukwash. (Isay 48:17, 18) Anch ayisadil, yiyul ya usey ya Bibil yiding ya ukwash, yikalap nchik muchid, chishankur, ap ndond yamulidinau muntu. Ov, ukutwishap kushinshikin mutu wa mulong ulondwila ou ni kwikwatin mupak wa kutal anch yilondilay Bibil pa milong mudi ukash wa mujimbu, dijuku, ni mudimu yidi yakin?