Kukimb Chiyul Chiwamp

ANCH ukimbin chiyul, yidiaku yivud. Yapu yiletina yiyul piur pa kuya kurutu mu wingend-a-mushing wa muntu yiyil kurutu nakash mu mangand. Mu jindond kushalijan mudi mu Grande-Bretagne, mu Amerik mulondilau Latin, mu Japon ni mu États-Unis, mikand yilejena mutapu ukutwishay muntu kwikwash amwinend ayilandining nakash. Ma video, malejan matenchikinau ni maprogram ma pa televizion misambidina piur pa ukwash wa muntu amwinend mapalangen nakash mu antu. Ayisangaredin nakash mulong rutong ray ridi anch ukutwish wapwish milong yey amwiney, pakad kuya kwit chiyul kudi mwin kwilej manangu, kudi mwin kuyiyul in kwatijan, ap kudi mukurump wa relijon. Yom yiney yisambidin milong ik?

Kuya kurutu kwa muntu ipend, kutan musangar mu rukat, ni mutapu wa kuyilil an yawiy mitu ya milong yijim yisambidilau nakash. Mutapu wa kura nich kuziy, runeng, ni yibudikin ya kujip uruw niyawiy yidi milong yikwau yipalangena nakash. Kudi kand antu akwau avud nakash itina yiyul piur pa mutapu wa kurish nich kupumb kudia, kuna ruwand ni kuna maar pakad kupep pa chopu. Ov, yiyul yiney yidi ya ukwash? Chisu chimwing yiding ya ukwash, pakwez chisu chivud kiyidingap ya ukwash. Chawiy lel, chidi cha manangu tushinshikina chiyul cha Bibil chilondila anch: “Muntu wamwamu ukat kwitiyij mazu mawonsu, pakwez muntu ubabela ukat kushinshik kuyilay.”—Jinswir 14:15.

Mikand yilejena mutapu ukutwishay muntu kwikwash amwinend yishalijadin kulemp nich mikand yilejena mutapu wa kusal midimu ya makas mudi kukwat yipich, kupampish ap kwilej rudim. Mikand yiney yikutwish yikal ya usey nakash ni yakad kusot kusadil nfalang jivud mulong wa kwilej chom kanang cha pakampwil. Mikand ya ukwash wa muntu amwinend—yikala mu midimu ya wingend-a-mushing, piur pa uruw, piur pa kwikal nvaj ap ukash wa manangu—yishalijadin. Yikat kuyulan mutapu kanang wa mwom ap yikat kwisambin yitongijok kanang ya filozofi. Chawiy lel chidi cha manangu kwiyipul anch: ‘Nany uletina chiyul chinech? Kwisu kudiokila rusangu riner?’

In manangu kakutwishap chisu chawonsu kwikameshin yitongijok yau pa uman uwamp utaninau. Amwing akutwish alet chiyul chiyiletidina nfalang nakash, chijau anch akutwish atan nfalang jivud anch ayilej antu yom yisotinau kutesh. Pa chinech, mwi ngand yimwing kusu, chapu chisadininga mikand ya yiyul ya kwikwash nich muntu amwinend chikat kwisakin mamiliyar chinan ma madolar pa muvu ni muvu!

Yiyul ya Muntu Ipend Yikwet Usey Ik?

Anch wakarumukin ku yiyul ya muntu ipend, uchingejidin kutan chiyul chiwamp. Ap anch pa yisu yimwing, yiyul yiukutana yikutwish yikal ya piur piur ap yakad kovikan muyidia. Chilakej, chiyul mudi chinech: ‘Anch wikal ni yitongijok yiwamp, ukupandikan mu yom yivud. Chom chin chawonsu usotila, jikala nfalang, ukash wa mujimbu ap urund uwamp, ukutwish wikal nich ang ukwet yitongijok yiwamp.’ Ov, chiyul chinech chidi chiwamp? Ov, chikutwish chakukwash kura nich uyakin wa yom bil anch chikukunenganesh mu mwom?

Chilakej, mikand yisambidila urund ni uruw, yidi pamwing pa mikand yipalangena nakash. Ov, yiyikwashin antu chakwel ikala nich majuku mawamp, ma musangar? Kichidingap mwamu chisu chawonsu. Kukwatijan nich yalonday mband umwing, mwin kufund mikand yiletina ukwash wa muntu ipend piur pa rukat yadinga yipandakena nakash mu Amerik mulondilingau Latin “wayileja in kuyitang mutapu ukutwishau kwikal nich urund uwamp ni kwilamin kalimish.” Mwin kufund wadinga ni kulond anch kwikal nich urund uyimp kudi kwisal nayimp muntu amwinend. Uruu ujim udi anch chom cha usey chidi kusal chom chikutwisha kumwovish muntu musangar pa ndond pa kusot kwitiyij milong yey ni kusot kuyipwish.

Chakin, mikand yimwing ya ukwash wa muntu ipend yikutwish yikal nich chiyul chiwamp. Pakwez yikutwish kand yalet yiyul yiyimp. Mwin manangu ukutwish walet yitongijok yiwamp pa mulong kanang pakwez chiyul chend pa mulong ukwau chikutwish chayipish yom. Chikutwish chikal chikasikena kutond mu yiyul yiney yivud, yipwitijadina, yidia mu mikand yiney. Ov, yiyul ya nany ufanyidina kuchingejin? Iyipula amwiney anch: ‘Ov, chiyul chinech achitongijokina nawamp, ap anch chidi kwau chitongijok cha muntu wachifunda? Kusot mapit ni ntumb kukwet usu ik pa kushinshaman kwa muntu wachifunda?’

Mukand umwing umekena kwikal wa ukwash mu yisu yawonsu udi ching Bibil kusu. Uletining yiyul yiwamp piur pa milong yivud ya ukwash wa muntu ipend ni pa milong yikwau yivud. Wayibachikin kal mamiliyon ma antu asala kulondulijan nich chiyul chinech chilondila anch: “Sotany kutambul manangu masu mu muchim; mudjalany muntu musu.” (Efes 4:23, 24) Bibil utwinkishin njingunin ya manangu pa yom yikata kutuletin milong ni utulejin mutapu wa kurish nich. Cha usey, utwinkishin ukwash uwamp utubachikina chakwel tusala yom yiwamp. Mutu wa mulong ulondwilaku ou ukutulej mutapu wa kusal mwamu.