MUTU WA MULONG WA KWILEJ WA 28
MUMINY 88 Nleja Njil Yey
Mulong Wak Tufanyidin Kwit Chiyul?
“Manangu mad kud awiy akata kutambul chiyul.”—JNSW. 13:10.
MU WINSWIMP
Tukuman yom tufanyidina kusal mulong wa kutaninamu nakash mu chiyul chitwinkishinau.
1. Mutapu ik tukutwisha kukwat mipak ya manang ni kutwish yom tutenchikina? (Jinswir 13:10; 15:22)
ETU awonsu tukatining kukwat mipak yiwamp. Ni tukatining kand kutwish yom yawonsu tutenchikina. Dizu da Nzamb ditulejin mutapu tukutwisha kuwanish yom yiney yaad.—Tang Jinswir 13:10; 15:22.
2. Yom ik yikaninay Yehova kutusadin?
2 Chakin kamu, Muntu ukutwisha kutwinkish manang ni yiyul yiwamp ud Tatukwetu Yehova. Ukanin kutukwash palondinay anch : “Nikukutal ni kukuyuI.” (Ks. 32:8) Mazu minam mamekeshin anch Yehova kimediningap kwend kusu pa kutuyul pakwez kand ukat kutubangin—ni kutukwash kusadin chiyul chend.
3. Yom ik tukushinshikina mu mutu wa mulong winou?
3 Mu mutu wa mulong winou, tukusadin Dizu da Nzamb mulong wa kwakul ku yipul yinying: (1) Mikadil ik nifanyidina kumekesh mulong wa kutaninamu mu chiyul chiwamp? (2) Nany ukutwisha kwinginkish chiyul chiwamp? (3) Mutapu ik nikutwisha kumekesh anch nikwet kamu kuswir kwa chiyul? (4) Mulong wak nifanyidin kwipuk kuyit antu akwau kwinkwatin mupak?
MIKADIL IK NIFANYIDINA KUMEKESH?
4. Anch tukimbin kutaninamu mu chiyul chiwamp, mikadil ik tufanyidina kumekesh?
4 Mulong wakutaninamu mu chiyul chiwamp, tufanyidin kwijik mimbu yetu ni kwikal ikepishina. Tufanyidin kwijik anch yisu yimwing, pakad ukwash wa antu akwau, tukutwish kuburen ukaliweny ap ronganyin tuswirikedina mulong wa kukwat mupak wa manangu. Anch twikepishinap ni kwijik mimbu yetu, Yehova kakutwishap kutukwash. Mud chibudikin, chisu tutangina Dizu Dend, tukutwishap kuman anch tukwet kuswir kwa kusadin chiyul chitwinkishinay. (Mike 6:8; 1 Pi. 5:5) Pakwez anch twikal ikepishina ni twijik mimbu yetu, chikutuswapel kutesh chiyul chimedina pa Bibil ni kuchisadin.
5. Yom ik yafanyina kumwikadish Mwant David mwin kwitutul?
5 Shinshikin yom tukutwisha kwilejin ku chilakej cha Mwant David. Yom yasalay mu mwom wend yafanyina kumwikadish mwin kwitutul. Kurutu kwa kwikal mwant, wading mwin kuwang ukweta ukaliweny nakash. Amutazuka kumuwangin mwant. (1 Sam. 16:18, 19) Kupwa kwa kumutond David mud mwant, Yehova wamwinkisha usu kusutin spiritu Wend utumbila. (1 Sam. 16:11-13) Antu amutumbishang mulong wayijipang akankuny nau, chilakej Goliat chitabu ikundj mwin Filistin. (1 Sam. 17:37, 50; 18:7) Anch David wading mwin kwitutul, wafanyina kutong anch mulong wa yom yiney yawonsu yasalay, kadingap kakweta kuswir kwa kutesh chiyul cha antu akwau. Pakwez kasalap mwamu.
6. Mutapu ik twija anch David wasangerang kutambul yiyul? (Tal kand chipich cha pa chibur.)
6 Kupwa kwa kwikal mwant, David walama arund amwinkishang yiyul. (1 Jsng. 27:32-34) Chitushimwokishinap, mulong David wading ni chaku cha kutesh yiyul yiwamp. Kitiyangap kwend ching yiyul ya antu amakundj pakwez ni ya amband, mud Abigayil. Ading amwatin kud Nabal, ikundj mwin kwitutul, wakad kujikitishang ni wakad kuyilimishang antu akwau. Nich kwikepish, David wasadina chiyul chend, mud chibudikin, wipuka kusal chitil chikash.—1 Sam. 25:2, 3, 21-25, 32-34.
Mwant David witiya ni wasadina chiyul chamwinkishau kud Abigayil (Tal paragraf wa 6)
7. Malejan ik tukutwisha kwilejin ku chilakej cha David? (Mulej 4:13) (Tal kand yipich.)
7 Tukutwish kwilej malejan mamwing kusutin chilakej cha David. Chilakej, tukutwish kwikal ni ukaliweny wa kusal yom kanang ap kwikal ni ulabu wa kuyitakel antu akwau. Chikalap nchik mwamu, tufanyidinap kutong anch twij yom yin yawonsu ni tukwetap kuswir kwa yiyul ya antu akwau. Mud David, tufanyidin kwitiy chiyul chiwamp, chikalap nchik muntu utuyudina. (Tang Mulej 4:13.) Anch twasal mwamu, tukwipuk kusal yom yiyimp yikutwisha kutusal etu ayinetu ni antu akwau kand nayimp.
Tufanyidin kwitiy chiyul chiwamp, chikalap nchik muntu utuyudina (Tal paragraf wa 7)c
NANY UKUTWISHA KWINGINKISH CHIYUL CHIWAMP?
8. Mulong wak Jonatan wading uwanyidin kumuyul David?
8 Shinshikin dilejan dikwau tukutwisha kwilejin ku chilakej cha David. Witiya chiyul chamwinkishau kud antu ading akweta urund uwamp ni Yehova ni ading ija nawamp chikokujol chading chirishinay nich. Chilakej, pading pakimbinay kwijik anch ufanyidin ap bwat kuchirish urund pamwing ni Mwant Saul, David watesha chiyul chamwinkishau kud Jonatan, mwan a Saul. Mulong wak Jonatan wading uwanyidin kumwinkish chiyul? Mulong Jonatan kadingap ching kusu ni urund uwamp ni Yehova, pakwez kand wading umwij Saul nawamp. (1 Sam. 20:9-13) Chom chinech chitufundishin ik?
9. Anch tuswirikedin chiyul, kud nany tufanyidina kuchit? Let chilakej. (Jinswir 13:20)
9 Chisu tukweta kuswir kwa chiyul, chid cha usey kuchit kud muntu ukweta urund uwamp ni Yehova ni wija mulong wetu nawamp.a (Tang Jinswir 13:20.) Chilakej, tong bil mud anch mukadivar nsand ukwet kuswir kwa kuman nambaz muwamp ukutwishay kwatijan nend, nany ukutwisha kumwinkish chiyul chiwamp? Mwaning, murund wakad kal kwatan ukutwish kumukwash anch wamwinkish yiyul yimedina pa mbil ja Bibil. Pakwez mukadivar ukutwish kutambul yiyul ya pakampwil ni ya usey anch wayiman ambay a uruw aswila mu spiritu, amwija nawamp, ni amusadidina kal Yehova pamwing mu mivu kanang.
10. Yom ik tukimbinanya kuman katat?
10 Twaman kal mikadil yaad tufanyidina kwikal nich ni nany ukutwisha kutwinkish chiyul chiwamp. Katat tumanany mulong wak tufanyidin kumekesh anch tukwet kamu kuswir kwa chiyul ni anch chid chiwamp kuyit antu akwau kutukwatin mupak.
MUTAPU IK NIKUTWISHA KUMEKESH ANCH NIKWET KAMU KUSWIR KWA CHIYUL?
11-12. (a) Yom ik tufanyidina kwipuk kusal yisu yimwing? (b) Yom ik yasalay Mwant Jerobowam chisu chakimbay kukwat mupak wa usey?
11 Yisu yimwing muntu ukutwish kumekesh mud ukimbin chiyul, pakwez mu uyakin ukimbin kwend anch antu itiy mupak wakwatinay kal. Tukutwishap chakin kamu kulond anch muntu winou ukwet kuswir kwa chiyul. Muntu winou ufanyidin kwilejin ku yom yamushikena Mwant Jerobowam.
12 Jerobowam wikala mwant mu Isarel kupwa kwa Salomon kufa. Pikalay Jerobowam mwant, antu ading ni yom yiwamp yivud, pakwez iyova anch Salomon wayisadisha mudimu nakash. Chawiy aya kumutal Jerobowam chakwel ayipipejinaku yom. Jerobowam wayita chakwel amushilaku chisu mulong wa kutongijokin pa mupak wafanyinay kukwat. Cha kusambish, wita chiyul kud amakurump amukwashang Salomon. Chinech chading chom chiwamp chasalay. (1 Ant 12:2-7) Pakwez, kasadinap chiyul chamwinkishau amakurump. Mulong wak? Ov, chimeken anch Jerobowam wading wakwatang kal mupak wa yom yafanyinay kusal, ni wading ukimbin kwend anch muntu kanang itiya mupak wend? Anch mwawiy, chiyul chamwinkishau kud ansand chamekesha anch itiyin mupak wend wakwatay. (1 Ant 12:8-14) Jerobowam wayakula antu kukwatijan ni yom yamulejau kud arunend. Mud chibudikin, antu amubwambwila Jerobowam, ni atonda mwant mukwau. Kusambish kamu pinipa, Jerobowam wasambisha kurish ni milong yikash.—1 Ant 12:16-19.
13. Mutapu ik tukutwisha kwijik anch tukwet kuswir kwa chiyul cha antu akwau?
13 Yom ik tukutwisha kwilejin ku chilakej cha Jerobowam? Chisu tukimbina chiyul, tufanyidin kumekesh anch tukwet kamu kuswir kwa kutuyul. Mutapu ik tukutwisha kumekesh mwamu? Tukutwish kwiyipul ayinetu anch: ‘Ov, nikat kwit chiyul kupwa nachilik mulong chikwatijadinap ni yom nikatina?’ Shinshikin chilakej.
14. Chisu tutambwila chiyul, yom ik tufanyidina kuvurik? Let chilakej. (Tal kand chipich.)
14 Tongin bil anch amwinkish mukadivar mudimu ufutinau nfalang jivud. Kurutu itiya mudimu winou, mukadivar winou wit chiyul kud mukurump. Mukadivar wamulej mukurump anch mudimu winou ukusal anch ikala kulemp ni dijuku dend mu chisu chilemp. Mukurump wamuvurish mukadivar winou mbil ja Bibil jimekeshina anch chisend chend cha kusambish chid cha kuwanyish maswir ma mu spiritu ma dijuku dend. (Ef. 6:4; 1 Tm. 5:8) Mukadivar winou walik kwitiy yom yimulejinau kud mukurmp, chawiy wadandamen kwit yiyul kud antu akwau mu chikumangen djat ni pakutaninay muntu ukumuleja anch itiya kwend mudimu winou. Ov, tukutwish kulond anch mukadivar winou ukimbin chakin kamu chiyul, anch ukimbin kwend anch muntu kanang itiya mupak wend wakwatinay kal? Tufanyidin kuvurik anch muchim wetu ukutwish kutudimb. (Jer. 17:9) Yisu yimwing akutwish kutwinkish chiyul chakad kutusangaresh, pakwez chawiy chikutwisha kwikal chiyul tuswirikedina.
Ov, tukimbining chakin kamu chiyul chiwamp, anch tukimbining kwetu anch muntu kanang itiya mupak wetu? (Tal paragraf wa 14)
OV, NIFANYIDIN KUYIT ANTU AKWAU CHAKWEL ANKWATIN MUPAK?
15. Yom ik tufanyidina kwipuk kusal, ni mulong wak?
15 Muntu ni muntu ukwet chisend cha kukwat mipak yend amwinend. (Gal. 6:4, 5) Mud mutwamanang mu mutu wa mulong winou, muntu wa manang ukimbining chiyul mu Dizu da Nzamb ni kud in Kristu aswila mu spiritu kurutu kwa kukwat mupak kanang. Pakwez, tufanyidin kwipuk kuyit antu akwau kutukwatin mipak. Antu amwing akutwish kusal mwamu kusutin kumwipul muntu mukwau anch: “Anch yeya yom ik welang kusal?” Antu akwau akutwish kusal mwamu kusutin kwimburij mipak yakwatau antu akwau, pakad kwishil chisu cha kutongijokin nakash pa mulong winou.
16. In Kristu a mu chikumangen cha Korint afanyina kukwat mupak ik piur pa mbij jayilambulangau pamwing ap atupwany? (1 Korint 8:7; 10:25, 26)
16 El tushinshikinany mupak wafanyinau kukwat in Kristu a mu chikumangen cha Korint piur pa kuda mbij jayilambulangau pamwing ap atupwany. Paul wayifundina in Kristu inay anch: “Twij anch kapwany chid chom chamwamu mu mangand ni anch kud Nzamb umwing kusu.” (1 Ko. 8:4) Kukwatijan ni yom yiney yalonday Paul, antu amwing mu chikumangen akwata mupak wa kuda mbij jalandangau mu sok ap anch ading ajilambulang kal kud atupwany. Antu akwau akwata mupak wa kulik kuda mbij mulong amana anch kom kau kakuyifish nich. (Tang 1 Korint 8:7; 10:25, 26.) Winou wading mupak umutadina muntu ni muntu panrend. Paul kayilejap in Korint kuyikwatin akwau mupak ap kwimburij yom yisadinau akwau. Muntu ni muntu wafanyina “kupan kuchind mulong wa amwinend kud Nzamb..”—Rom 14:10-12.
17. Yom ik yikutwisha kutushiken anch twikal kwetu in kwimburij yom yisadinau antu akwau? Let chilakej. (Tal kand yipich.)
17 Mutapu ik yom mud yiney yikutwisha kusadik nlel? Tushinshikinany mulong utadina kusadin yikunku yikemp yikemp ya mash. Mwin Kristu win mwawonsu ufanyidin kwikwatinap amwinend mupak wa kwitiy ap bwat kusadin yikunku yikemp yikemp ya mash.b Chikutwish kutukasiken kutesh nawamp mulong winou, pakwez mupak ututadin ayinetu, ud pakach pa chisend chifanyidinay muntu ni muntu kwisendin. (Rom 14:4) Anch twimburij yom yisadinau antu akwau, tukutwish kuziyish kom ketu. Tukutwish kufumb kom ketu ni kukakasikesh kusutin kukasadin nawamp. (Heb. 5:14) Chawiy, chisu ik tufanyidina kwit chiyul kud in Kristu aswila kal mu spiritu? Tukutwish kusal mwamu anch kupwa kwa kukimbijol twajingunin anch tuchidandamedin kwikal ni kuswir kwa kutesh nawamp mbil ja Bibil jitadina mulong wetu.
Tufanyidin kwit chiyul kupwa kwa kukimbijol (Tal paragraf wa 17)
DANDAMEN KWIT CHIYUL
18. Yom ik yatusadidinay kal Yehova?
18 Yehova umekeshining anch utuchingejidin kusutin kutwinkish want ipau wa kwikwatinap ayinetu mipak. Watwinkishin kal Dizu dend, Bibil. Ni watwinkishin kal kand arund a manang akata kutukwash kutongijokin pa mbil ja Bibil. Kusutin kusal mwamu, Yehova utubangidin mud Tatukwetu wa rukat (Jnsw. 3:21-23) Yom ik tukutwisha kusal mulong wa kumekesh anch tumujikitishin?
19. Mutapu ik tukutwisha kudandamen kumusangaresh Yehova?
19 Shinshikin uyakin ou: Anvaj akat kusangar nakash anch ayiman anau akat kukul ni kwikal atushalapol a Yehova akweta manang ni akata kuyikwash antu akwau. Chilik chimwing kand, Yehova ukat kusangar patumenay tukat kukul mu spiritu, kwit yiyul, ni kukwat mipak yimusangareshina.
MUMINY 127 Nifanyidin Kwikal Muntu wa Mutapu ik?
a Yisu yimwing in Kristu akutwish kwit chiyul kud antu akad kumwifukwil Yehova, chilakej, piur pa milong ya nfalang, ya kwiyokish, ap milong yikwau kand.
b Mulong wa kwijik yom yivud piur pa mutu wa mulong winou, tal mu buku Sanger Mwom Chikupu!, dilejan da 39 dinans da 5 ni chikunku “Jingunin Kand.”
c KURUMBURIL CHIPICH: Mukurump umwing umuyudin mbay nend uda niyend mukurump piur pa mutapu walondangay ku chikumangan chasadikang.