Mutapu wa Kupan Chiyul

1. Nany ufanyidina kupan yiyul, ni mulong wak?

MUTAPU ik ukata kwiyov piur pa kupan yiyul? Antu amwing oviling musangar wa kusal mwamu. Pakwez akwau akat kwidjidjek ni kwiyov nayimp pa kupan chiyul. Chikalap nchik mutapu tukata kwiyov, yisu yimwing etu awonsu chitwitining kupan yiyul. Mulong wak? Mulong Yesu walonda anch in kwilej end akin akuyijikin ku rukat rimekeshijadinau amwing nau akwau. (Yoh. 13:35) Ni mutapu umwing wa kuyimekeshin akadivar nau anambaz netu rukat ud wa kuyinkish yiyul mu chisu chiyiswirikedinau. Dizu da Nzamb dilondin anch “yiyul ya murund yikat kusangarish . . . muchim.”​—Jnsw. 27:9.

2. Yom ik yifanyidinau amakurump awonsu kwijik kusal, ni mulong wak? (Tal kand mushet “Kupan Yiyul ku Yikumangan ya Mukach mwa Rubing.”)

² Pakampwil amakurump afanyidin kwijik mutapu wa kupan yiyul ya manang. Kusutin Yesu, Yehova wayitonda amakundj inay mulong wa kubangin chikumangen. (1 Pi. 5:2, 3) Mutapu umwing ukatau kusal mwamu ud kusutin kupan yiyul yimedina pa Bibil chisu chikatau kusal madiskur mu yikumangen. Afanyidin kand kupan yiyul kud mukoku win mwawonsu, kuwejinaku ni amikoku apumbukina kal mu ditang. Mutapu ik ukutwishau amakurump ni etu awonsu kupan yiyul yiwamp?

3. (a) Mutapu ik tukutwisha kwilej kwikal in kuyulan awamp? (Isay 9:5; Tal kand mushet “Mwimburija Yesu Chisu Upanina Chiyul.”) (b) Yom ik tukumana mu mutu wa mulong winou?

³ Tukutwish kwilej yom yivud piur pa mutapu wa kwikal in kuyulan awamp kusutin kwilejin kud antu ajimbwilau mu Bibil, pakampwil Yesu. Pakach pa yijiken yamupilau pad “Mwin Chiyul.” (Tang Isay 9:6.) Mu mutu wa mulong winou tukuman yom tufanyidina kusal anch muntu watwit chiyul ni yom tufanyidina kusal anch etu ayinetu twakwat mupak wa kuyulan pakad kutwit . Tukuman kand usey wa kupan chiyul pa chisu chiwanyidina ni mu mutapu uwamp.

ANCH MUNTU WATWIT CHIYUL

4-5. Anch muntu wakwit chiyul, chipul ik ufanyidina cha kusambish kwiyipul? Let chilakej.

⁴ Anch muntu wakwit chiyul chom ik ukutwisha kusal cha kusambish? Ukutwish kusangar ni kuman anch muruney ukuchingejidin. Ni ukutwish kwov ja kumukwash kapamp kamwing. Pakwez ufanyidin cha kusambish kwiyipul anch: ‘Ov, yam niwanyidina kamu kumuyul pa mulong winou?’ Yisu yimwing, mutapu uwamp tukutwisha kumukwash muntu udap wa kumwinkish chiyul, pakwez wa kumulej muntu uwanyidina kumuyul pa mulong winou.

⁵ Shinshikin chilakej ech. Tong bil mud anch muruney wa piswimp uyedin mayej makash. Wakulej anch wakimbang kal milad ya kwiyokish kushalijan, kupwa wakwipul anch wisu uwamp. Ap anch ukutwish kukat mulad kanang, pakwez udap dokter ni kakufumbap mulong wa kwokan. Mu chishiken mud chinech, mutapu uwamp ukutwisha kumukwash muruney ud wa kumukwash kutan muntu wafumbau kal mulong wa kwokan.

6. Mulong wak chid cha usey kuchingelaku pakemp kurutu kwa kupan chiyul?

⁶ Ap anch twaman anch tuwanyidin kupan chiyul pa mulong kampand, tufanyidin kuchingelaku pakemp kurutu kwa kumwakul muntu watwitang chiyul. Mulong wak? Jinswir 15:28 ulondin anch “mwin kutentam ukat kutong nawamp [kurutu kwa] kwakul.” Chad chikwikal nchik anch tukwet chakul? Ap mwamu, ­tufanyidin kwitekin chisu cha kukimbijol, kulembil, ni kutong nawamp. Chawiy tukwikal nich kashinsh ka kwakul nawamp kukwatijan ni mutapu utonginay Yehova. Shinshikin chilakej cha muprofet Natan.

7. Yom ik twileja kal kusutin chilakej cha muprofet Natan?

⁷ Pading pambambinay ni muprofet Natan, Mwant David wamuleja anch wading ukatin kutung tempel wa Yehova. Natan wamwakula kapamp kamwing anch ukutwish kwend kutung. Pakwez Natan wafanyina bil kumwipul Yehova. Mulong wak? Mulong Yehova kadingap kakatina anch David atung tempel. (1 Jsng. 17:1-4) Rusang riner ritufundishin anch, anch atwit chiyul tufanyidin “kulik kuswakal kulond.”​—Yak. 1:19.

8. Diyingishin ik dikwau ditubachikina kubabal nakash kurutu kwa kumuyul muntu kanang?

⁸ El tushinshikinany diyingishin dikwau dilejena mulong wak tufanyidina kubabal pitumuyudina muntu kanang: Anch twamuyul muntu mu mutapu uyimp, tukutwish kwifish nich anch yibudikin yiyimp yamushiken. Chakin kamu, tufanyidin kutong nakash kurutu kwa kumuyul muntu kanang.

ANCH TWAKWAT MUPAK WA KUYULAN PAKAD KUTWIT

9. Kurutu kwa amakurump kumuyul mukadivar ap nambaz, yom ik yifanyidinau kwikal nich kashinsh? (Galatiya 6:1)

⁹ Yisu yivud, amakurump afanyidin kwitekin chisu cha kumuyul mukadivar ap nambaz ‘uyila kuns.’ (Tang Galatiya 6:1.) “Muntu ukutwish kukwat mipak yimwing yiyimp yikutwisha kumushikij ku kusal chitil chijim mu kusut kwa chisu.” Chitongijok cha amakurump chid cha kumukwash muntu chakwel adandamena kumusadin Yehova machuku mawonsu. (Yak. 5:19, 20) Chakwel chiyul chau chikala cha usey, amakurump afanyidin cha kusambish kwikal ni kashinsh anch muntu ukimbinau kuyul uyil kamu kuns. Yehova watwinkishin kal want ipau wa kukwat mipak yimedina pa kom ketu. (Rom 14:1-4) Pakwez anch amakurump ajingunin anch mukadivar ap nambaz wasadin yom yiyimp yikutwisha kuyipish urund wend ni Yehova, mutapu ik ukutwishau kumuyul?

10-12. Papaninau chiyul pakad kuyit, yom ik yifanyidinau amakurump kusal? Let chilakej. (Tal kand yipich.)

¹⁰ Chiyiswapediningap amakurump kumuyul muntu pakad kuyit chiyul. Mulong wak? Kambuy Paul walonda anch muntu ukutwish kusambish kuya kuns pakad kutongin. Chawiy kurutu kwa kumuyul muntu winou, amakurump afanyidin kusal chom kanang chakwel chimuswapel muntu winou kutesh chiyul.

¹¹ Kupan chiyul pakad kutwit, kukutwish kwikal mud kukun mutond pa ndond yida divu dikash. Ndim ukat kukank, warijek divu chad lel wakun mbut. Kupwa chad, ukwichil mem chakwel mbut jipama. Chilik chimwing kand, kud yom yikutwishay kusal mukurump chakwel chimuswapel mukadivar kutesh chiyul. Chilakej, mukurump ufanyidin kuchingel pa chisu chiwanyidina mulong wa kumuyul mukadivar, kumwinkish kashinsh anch umubangidin kamu chakin ni kumulej anch kud chom kanang chikimbinay kwambamb nend. Anch muntu ukimbina kuyulan wijikening mud muntu muwamp ni ukweta rukat, chikuyiswapel antu akwau kutesh chiyul chend.

¹² Chakwel chimuswapel mukadivar ap nambaz kutesh chiyul pambambinau, mukurump ukutwish kumuvurish anch etu awonsu tukat kurumbwokang ni yisu yivud tukweting kuswir kwa kutuyul. (Rom 3:23) Anch mukurump wambambin ni mukadivar ap nambaz nich dizu da matul ni kalimish, ukutwish kumulej patok kusutin Bibil anch uyil kuns. Anch mukadivar ap nambaz wajingunin anch warumbukang kal, mukurump ufanyidin kumulej patok yom yifanyidinay kusal mulong wa kuswimp. Anch apwish kwambamb, mukurump ukumukwash mukadivar kwitiy chiyul kusutin kumulej yom yiwamp yisadiningay ni kupwish ni malembil.​—Yak. 5:15.

13. Mutapu ik ukutwishau amakurump kwikal ni kashinsh anch muntu uteshin chiyul?

¹³ Yisu yimwing, yom yilondinay mwin kuyulan ni yom yiteshinay muntu uyudinau yishalijadining. Yom ik yikutwishau amakurump kusal mulong wa kwikal ni kashinsh anch yiyul yau ayiteshin? Afanyidin kwipul yipul ni nkeu. (Mul. 12:11) Mutapu ukwakulay muntu uyudinau ukutwish kumukwash mwin kuyulan kwikal ni kashinsh anch muntu uyudinay wateshang nawamp chiyul chamwinkishangau.

KUPAN CHIYUL PA CHISU CHIWANYIDINA NI MU MUTAPU UWAMP

14. Mulong wak tufanyidin kwipuk kupan chiyul anch tujimen? Rumburil.

¹⁴ Mulong etu awonsu tud antu akad kuwanyin, tukutwish kusal ap kulond chom chikutwisha kuyitap antu akwau ku muchim. (Kol. 3:13) Bibil ulondin anch yisu yimwing muntu ukutwish kulond ap kusal chom kanang chikutwisha kutujimesh. (Ef. 4:26) Pakwez tufanyidin kusal usu wa kwipuk kuyulan chisu tujimena. Mulong wak? Mulong “ujim wa muntu ukatap kuwanyish kutentam kwa Nzamb.” (Yak. 1:20) Anch twayulan pa chisu tujimena, tukutwish kand kuyipish mulong nakash. Chinech chirumburikinap anch tukutwishap kumulej patok muntu waturumbukinang yitongijok yetu ni mutapu twiyovila. Pakwez, kurutu kwa kwambamb ni muntu tufanyidin kuchingel chisu tumena anch ujim watupwang kal. Shinshikin chilakej chiwamp cha Elihu, muntu ushinshamena wamuyula Job.

15. Yom ik twilejidina ku chilakej cha Elihu? (Tal kand chipich.)

¹⁵ Mu machuku mavud Job wasala usu wa kwakul ku makasu mamudimbenau kud antu ading amekena mud arunend, pakwez Elihu witekina chisu cha kumutesh Job, ni wamwanakena. Ku mutambu ukwau, Elihu wajimana mulong Job wading umufishin nich Yehova piur pa mar mamanay. Chikalap nchik mwamu, Elihu wachingela kurutu kwa kulond kupwa walonda kwa matul ni kalimish chisu chamuyulay Job. (Job 32:2; 33:1-7) Chilakej cha Elihu chitufundishin uyakin wa usey: Chid cha usey kupan chiyul pa chisu chiwanyidina, mu mutapu uwamp​—nich kalimish ni rukat.​—Mul. 3:1, 7.

DANDAMEN KUPAN NI KUTESH YIYUL

16. Kuseng 32:8 utufundishin dilejan ik?

¹⁶ Mu verse wa mutu wa mulong winou, Yehova ulondin anch: ‘Nikukutal ni kukuyul.’ (Tang Kuseng 32:8.) Chinech chimekeshin anch ukudandamen kutukwash. Ukanin kutwinkish chiyul ni kutukwash mutapu wa kuchisadin. Tukutwish kumwimburij Yehova! Chisu tukweta dilau da kuyiyul antu akwau, tufanyidin kuyikasikesh ni kuyikwash kukwat mipak yiwamp.

17. Mutapu ik tukutwisha kuyifanakesh amakurump apanina yiyul yovakena ni yimedina pa mbil ja Bibil? Rumburil. (Isay 32: 1, 2)

¹⁷ Chinech chawiy kamu chisu tukweta kuswir kwa kupan ni kutesh chiyul chiwamp. (2 Tm. 3:1) Amakurump akata kupan yiyul yovakena ni yimedina pa mbil ja Bibil ad “mudi tuwit twa mem tudia mwi mpay yakad mem.” (Tang Isay 32:1, 2.) Arund ija yom tukatina kutesh pakwez atulej yom tuswirikedina kamu chakin, akat kutwinkish chom chida cha usey nakash mud “mabuj ma utad wa or [mariyekinau] nich utad wa argent.” (Jnsw. 25:11) El etu awonsu tudandamen kwilej mutapu wa kupan ni kutesh chiyul chiwamp.