Chisadina Bibil Ikala wa Usey mu Machuku Metu
‘Mazu mawonsu ma mukand wa Nzamb madi ma ukwash makutwish kuyilej antu ni kuyitenchik mu mwom.’—2 Timote 3:16.
MU KUSUT kwa yitot ya mivu, Bibil washikedin kal ku kuyishikij antu a michid yivud chakwel aswimpa mashakamin ma mwom wau mikala mawamp. Mufund ujimbwilau kwiur oku ulejen mulong wak Bibil udi wa ukwash pa mulong winou—manangu madiamu madiokil kudi Nzamb. Ap anch amufunda kudi antu, Bibil utulejin yitongijok ya Nzamb. Bibil ulondil anch: “Antu anyikeshau kudi spiritu utumbila alonda mazu matambulau kudi Nzamb.”—2 Pita 1:21, Les Saintes Écritures — Traduction du monde nouveau.
Bibil udi ni umutakel uwamp mu jinjil jaad. Ya kusambish, utwinkishin mutapu uwamp wa kuman muudia mwom uwamp. Ya kaad, ukwet usu wa kuyibachik antu chakwel akarumuka muchifanyidina chakwel ashikena ku mashakamin ma mwom uwamp. El tushinshikinany jinjil jinej jaad.
Njingunin mu Jintong Jiwamp
Nzamb ushidilamu mu Bibil anch: “Am nikez kukwijidish ni kukulej mwi njil yiukeza kuya, nikez kuyul padi ey ni dis diam.” (Kuseng 32:8) Talany anch Nzamb kaletinap ching kusu chiyul pakwez uletin kand njingunin, yawiy ukaliweny wa kuman mukach mwa chom ap yidia kwinyim kwa chom. Kwikal nich njingunin ya kuman jintong jidia jakin ni ja usey kukutwish kwatuking palemp nich kuushesh mwom wetu mu kusot jintong ja chamwamu.
Chilakej, kudi antu avud, ntumb ni mapit yawiy yidinga jintong mu mwom yau. Kudi mikand yivud yilejena mutapu ukutwishay muntu kwikwash amwinend chakwel ayipandakana antu akwau, ikala nich ntumb ap ikala mpich. Pakwez, Bibil utulejin anch: “Antu akata kusal midimu yikash chakwel apita, mulong wa ris ra yom yikwetau akwau . . . chidi mudi kumulondul rinkind.” “Ukatila nfalang, kajikwetap jiwanyidina.” (Mulej 4:4; 5:10) Ov, chiyul chinech chidi cha ukwash kudi etu ilel unou?
Mudi chilakej chilejena mutapu udia chiyul cha usey chidiokila mu Bibil, el tushinshikinany yamushikena Akinori, udinga mu Japon. Akinori wapandakana kubambel kukash, watambula diplom diend dia shikol ya iniversite umwing muwamp ni watana mudimu umwing wa ntumb nakash. Yom yadinga yimeken mudi yikat kwiyezin ayinay. Chikalap nchik mwamu, kupandakan kwend kwamushikijap ku musangar wadingay ni kuchingejin. Pakwez, runeng ni kuziy yashesha ukash wa mujimbu wend. Arund nend a ku mudimu kadingap ni kumwongoj. Wanenganana, wikala china maar ni wasambisha kutongin ja kwijip. Chad wasambisha kwilej Bibil ni Atuman a Yehova. Yom yilejay yamushikija ku kukarumun manangu piur pa kuman chom cha usey nakash mu mwom. Pakad kulab, runeng rend rasota kumuyedish rasambish kupwa pakemp-pakemp. Pa ndond pa kwikal nich chibeng ni ris, Akinori wimena amwinend yilondila ruswir ridia mu Bibil anch: “Mwom wa mujimbu kudi kushakam zong kwa muchim.”—Jinswir 14:30.
Chom ik umena anch chawiy chidia rutong ra usey mu mwom? Chom ik ukutwisha kusal chakwel wikala nich musangar wakin? Ov, chikutwish chikal kwikal nich uruw uwamp? Ap anch, kuyirijekin an mwom? Kwikal ni arund avud? Kwikal nich musangar mu mwom? Jintong jinej jawonsu jidi jiwamp. Chakin kamu, Bibil ujikasikeshidin, pakwez kichidiap mudi rutong retu ra kusambish mu mwom. Nich njingunin yiwamp, Bibil ulejen chom cha usey chitinau chakwel kwikal nich mwom wa musangar palondinay anch: “Mulimisha Nzamb, ziyil ku malejan mend, mulong wa chom chinech chawiy chamutangilau muntu.” (Mulej 12:13) Anch twadiul kusal mwamu, mwom ukwikal wakad rutong, wakad usey, ni wakad kurumburik. Ku mutambu ukwau, Bibil utwinkishin kashinsh anch: “Mwin kumukungamen [ Yehova, NW] ukutan musangar.”—Jinswir 16:20.
Mutapu Uyishikijinay Bibil Antu ku Kukarumuk
Kambuy Paul wafunda anch: “Dizu dia Nzamb didi diom, ni usu.” Mudi mpak ya musamun, yitwila mitambu yaad, dikutwish kwandam mu yitongijok yijingamena ya muntu. (Hebereu 4:12) Bibil ukwet usu wa kukarumun mashakamin ma antu mulong ukuyikwash imena ayinau mudiau chakin kamu ni kichidiap kusu kuman mutapu witongidinau. Antu akweta michim yiwamp, akez kushiken ku kujingunin anch aswirikedin kukarumuk. Chilakej, piur pa antu adinga mu chikumangen cha Ukristu mu Korint wa pakur adinga pa kusambish ij, in kuleu maar, in kwimik dis ni adinga ni kusal yom mudi yiney, Paul walonda anch: “Mwamu mwadingau amwing pakach pen; pakwez en akutokishilany kal . . . mu [spiritu, NW] wa Nzamb wetu.” (1 Korint 6:9-11) Ni ilel unou, spiritu utumbila wa Yehova uchikwet usu mudi mwadingay, ni ukutwish kuyishikij antu ku kukarumuk.
Mario, udinga Mwimputu, wadinga mwin chisum ni wadinga ni kuna ni kulandish diamb. Dichuku dimwing, mpurish wamutambula diamb wend, wova ujim nakash ni wamuturikina mpurish ni wamuyipishina motak. Chikwau, Mario kadingap ni mudimu pakwez wadinga ni mabaz nakash. Chad wajingunina anch kakutwishap wapwish milong yend amwinend, witiyija kwilej Bibil. Pasambishay kuya kurutu mu kwilej, Mario warijeka chifu chend, walika kusadil ni kulandish diamb, ni walika chisum. Antu avud adinga amwija ashimoka nakash. Adinga ni kumwimik amwipul anch: “Mario, yey bil anch muntu mukwau?”
Ov, yom ik yayibachika antu mudi Akinori ni Mario chakwel akarumuna mwom wau ni kutan mazang ni musangar mu mwom yau? Chakin, ridi ronganyin rau ra katat piur pa Nzamb rilejau kusutil ku kwilej Bibil. Ching kusu Nzamb ukutwisha kulet malejan ma usey mituswirikedina chakwel tupandakana mu mwom wa katat ni twikal nich ruchingej ra mwom wa chikupu mu machuku ma kurutu. Mudi Tatuku, Yehova Nzamb utulejin kusutil mu Bibil anch: “Mwanam ikundj, tesh tambul mazu mam, chakwel mivu ya mwom wey yez yivula. . . . Piukwenda, kwend kwey kukulabap, ni kiukubambilap, kiukwipwakalip. Lam ba malejan, kangal wamadjibul malama, mulong mawiy madia mwom wey.” (Jinswir 4:10-13) Ov, chiyul ik chipandakenamu kudi etu kukimb umutakel wa Sakatang wetu?
[Kamushet/Chipich chidia pa paj wa 7]
Yiyul Yiwamp ya Nlel
Bibil utwinkishin yijidik yiwamp ya kusadil yikutwisha kututakel mu mwom wetu wawonsu wa katat. Tukwet yilakej yimwing panap:
• Kuta urund uwamp ni antu akwau
“Chawiy yom yawonsu yiwovilany ing antu akusadilangany en, ni yen yisadilany kand mwamu awiy.”—Mateu 7:12.
“Upandikenamu kukep pakach penen awonsu ndiy mwinau mujim.”—Luka 9:48.
“Iyakany aeny.”—Rome 12:13.
• Kupandakan yaku yiyimp
“Muntu ukata kwend ni in manangu niyend ukez kwikal mwin manangu, pakwez ukata kwend nau ayisup ukez kaman mar.”—Jinswir 13:20.
“Kangal wikal pakach pa in kuna mar.”—Jinswir 23:20.
“Kangal wakwat urund nend muntu wa ujim.”—Jinswir 22:24.
• Kwikal nich uruw uwamp
“Muntu ni muntu amukata mukajend mudi mwikatilay amwinend; ni mband ulimisha mfumwend.”—Efes 5:33.
“Djalany . . . michim ya kwovijan, ni kudimuk, kwikepish ni kwitudish, ni kushimpish michim; kangal wajimanijadinany muntu ni mukwau, likishijadinany anch kudi muntu ukweta mulong ni mukwau.”—Kolosay 3:12, 13.
• Kuyikwash an
“Mufumbila mwan mwinjil yiwapidilay kuya, mulong pa kukulay kakez kayilikip kand.”—Jinswir 22:6.
“Ni yen atatuku, kangal wayisudishany anen ku michim; pakwez yilidilany mu kuyikand ni malejan ma Mwant.”—Efes 6:4.
• Kwipuk matend
“Kwakul kwa kalimish kukat kudiosh ujim, pakwez dizu dikash dikat kuswejish ujim.”—Jinswir 15:1.
“Ulimishijanany muntu ni mukwau.”—Rome 12:10.
Ap arund, akutwish iyep ntad pa mulong wa kwisak anch afund mutapu wovijadinau kusal. Chawiy, Yeremiy, kashalapol wa Nzamb wafunda anch: “Nafunda dijin diam, ni kutek chijingidij ku mukand wa kuland nich chir. Niyau atuman afunda majin mau, chad napana nfalang.”—Yeremiy 32:10.
• Kwikal nich ngikadil yiwamp
“Yom yawonsu yidia yakin, yom yilimishilau, yom yitentamina, yom yitokila, yom yikatilau, anch kudi yom ya kashinsh ni kuwap, yom yiwanyidina ni yifanyidina kulimish, tongany pa yom yiney.”—Filipoi 4:8.
Bibil utukasikeshin chakwel tulika kwikal nich yitongijok yiyimp ni kwikal “in kwinan.” Ulondil anch: “Sangarany mu ruchingej.”—Yuda 4, 16; Rome 12:12.
Kusadil yijidik yiney yiwamp kukezap ching kusu kututwishish twikala nich chisambu ni musangar katat pakwez kukutukwash kand tuwanyisha yitinay Nzamb ni kutambul yiyukish yend. Bibil ulondil anch: “Mwin kutentam ukez kaswan ngand, ukez kashakamamu chikupu.”—Kuseng 37:29.
[Chipich chidia pa paj wa 5]
Akinori padingay uchid ngend-a-mushing (ku chikas cha kamaku) ni udi pamwing ni mukajend alejen uyakin wa Bibil ilel unou