Kutan Mapit ‘Majindjikinau Mwi Ndiy’

“Mujindjikidinau chipau cha chiyul ni ronganyin.” —KOL. 2:3.

1, 2. (a) Yom ik yavumbulau mu muvu wa 1922, ni kwisu kuyidia? (b) Dizu dia Nzamb dimukasikeshin muntu ni muntu kusal ik?

KUVUMBUL mapit majingamena kumekening kwikal jinsangu jiwamp. Chilakej, mu muvu wa 1922, kupwa kwa makum ma mivu ya kusal mudimu ukash mwi ndond yikash, Howard Carter mwin kupundol wa mu Angleterre wavumbula chom chimwing cha pa kampwil. Ndiy watana Nzay ya mwant Farao Tutankhamen, mwadinga yom piswimp ni uvud wa 5000.

² Chom chavumbulay Carter chadinga chamushena, achitwala mu chikumbu cha kulamin yom ya pasak, ap mu ka chikumbu mwandingay ni kutek yom yend. Yikutwish yikal nich usey wa yom ya pakur ap mudi yom ya kusong, pakwez yikwetap usu pa mwom wetu pichuku pichuku. Pakwez, Dizu dia Nzamb ditukasikeshin tukimba mapit makweta chakin kamu usu padi etu. Amutazukin muntu ni muntu, ni difut tukutana dipandaken kulemp dipit dia ku mujimbu.—Tang Jinswir 2:1-6.

3. Mu jinjil ik mudia mapit ma usey mayikasikeshinay Yehova in kumwifukwil end kukimb?

³ Tushinshikinany usey wa mapit makasikeshidinay Yehova anch in kumwifukwil end akimba. Mu mapit minam mudi: “Wom wa Nzamb,” ukutwisha kwikal diking dietu mu yisu yiney yikash. (Kus. 19:9) Anch twatan “ronganyin ra Nzamb” kukutwish kwatutwal kwi ntumb yijim yakad muntu ap umwing kwikal nich—urund wa piswimp ni Udia Piur Nakash. Pamwing nich dipit ditwinkishinay Nzamb, manangu, ronganyin, njingunin, tukutwish kupwish nawamp milong ni yikokujol mu mwom wetu wa pichuku pichuku. (Jinsw. 9:10, 11) Ov, mutapu ik tukutwisha kutan mapit minam ma usey?

Kutan Mapit ma Muspiritu

4. Mutapu ik tukutwisha kutan mapit ma muspiritu?

⁴ Kitudiap mudi in kupundol nau in kukimbijol akata chisu ni chisu kukimb ni kusand mapit oku ni oku, pakwez etu twij nawamp kutukutwisha kutan mapit ma muspiritu. Dizu dia Nzamb, didi mudi kart ulejena ndond yidia mapit, utulejin ndond jin kamu kutukutwisha kutan mapit matukanay Nzamb. Pisambinay piur pa Kristu, kambuy Paul wafunda anch: “Mwi ndiy mwawiy mujingamina mapit mawonsu ma manangu ni ma ronganyin.” (Kol. 2:3) Pitutangina mazu minam, tukutwish twiyipul anch: ‘Ov, mulong wak tufanyidina kumakimb mapit minam? Mutapu ik “mujingaminau” mudiay Kristu? Ni mutapu ik tukutwisha kumatan?’ Chakwel kutan yakul, el tushinshikinany nawamp mazu malonday kambuy.

5. Ov, mulong wak Paul wafunda piur pa mapit ma muspiritu?

⁵ Paul wayifundina akwau in Kristu adinga ku Kolosay mazu minam. Wayileja anch ndiy wadinga ni kurish mulong wau chakwel ‘michim yau ayongoj, ni abombakana mu rukat.’ (Tang Kolosay 2:1, 2.) Ov, mulong wak kuyibangin mwamu? Chimeken kamu patok, Paul wadinga wij anch akadivar adinga kwinikwa akutwish ikal mwishin mwa chibachikin cha antu amwing adinga ni kulejan filozofi umwing wa in Grek ap adinga ni kulejan anch chifanyidin kulam Chijil cha Moses. Chawiy wayibabesha akadivar anch: “Babalany, chamwamu kukez kwikal mwin kunishesh mu manangu mend ma mangand, ni mu kulembijek kwamwamu kwend, awiy akata kukungamen yaku ya antu ni malejan ma mangand, kakat kulondulip chilik cha Kristu.”—Kol. 2:8.

6. Ov, mulong wak tufanyidin kuta muchim pa chiyul cha Paul?

⁶ Nlel, niyetu tukat kurish nich yipwichik ya Satan ni ditenchik diend diyimp. Filozofi wa mangand, pamwing ni malejan ma kuyisadil antu yom yiwamp ni malejan ma kukarumuk, makwet usu pa yitongijok ya antu, mikadil yau, jintong jau, ni mashakamin mau. Relijon wa makasu ukwet usu ukash pa machuku majim mavud madiaku. Kwipuwej kuyil ku yaku yiyimp ya mujimbu, ni yom yivud yidia pa Internet yidi chak kudi ansand ni amakurump kumwing. Kwikalang chisu chivud piswimp ni yom yiney ni yom yikwau ya mangand kukutwish kwikal nich usu ukash pa yovil ni manangu metu pantaliken nich umutakel wa Yehova, kukutwish kwatushikij tuziya kukwat ba ku mwom wakin. (Tang 1 Timote 6:17-19.) Choviken komb, tuswiridin tutesha kurumburik kwa mazu mayilejau in Kolosay kudiay Paul ni tulama chiyul chend mu michim anch kitusotilap kuwil mu mipit ya Satan.

7. Paul walonda anch yom ik yaad yikutwisha kuyikwash in Kolosay?

⁷ Anch twachirikin ku mazu mayilejau in Kolosay kudiay Paul, tukutwish twaman anch, kupwa kwa kulejan kubangin kwend, wayileja yom yaad yikutwisha kuyikwash ongojijana ni abombakana mu rukat. Cha kusambish, ndiy wajimbula “chinzwish cha ronganyin.” Chadinga chiyifanyidin itiyija anch ronganyin rau ra Mifund ridi rakin, chakwel ritiy rau rikala rishindamedina pa mufulandal ukash. (Heb. 11:1) Kupwa, wisambina kand ‘kwijik ujindj wa Nzamb.’ Adinga aswirikedin kuya kurutu mu ronganyin ra uyakin ni atesha kurumburik kwa yom yikash ya Nzamb. (Heb. 5:13, 14) Chiyul chiwamp nakash chayinkishau in Kolosay chitukwatin niyetu nlel! Ov, mutapu ik tukutwisha ni yetu kwikal nich chinzwish chinech ni ronganyin rakin? Paul utulejin cha kusal mu mazu mend makurikina malonday piur pa Yesu Kristu anch: “Mujindjikidinau chipau cha chiyul ni ronganyin.”

Mapit ‘Majindjikidinau’ mu Kristu

8. Lejan chirumburikina mazu ‘amajindjikidin’ mu Kristu.

⁸ Kulond anch mapit mawonsu ma chiyul ni ronganyin ‘amajindjikidin’ mu Kristu kurumburikinap anch amapatidin mudiay ndiy, ni chikasiken kumatan. Pakwez, kurumburikin kwau anch pa kumatan, tufanyidin kusal usu, ni tufanyidin tutadishina yitongijok yetu padiay Yesu Kristu. Chom chinech chambaten nich yalonday Yesu piur pend amwinend anch: “Yam njil ni uyakin ni mwom; kwikil ukwiyezila kudi Tatuku ching kudi am.” (Yoh. 14:6) Mwaning, chakwel tutana ronganyin ra Nzamb, tufanyidin tuswirikena ukwash ni umutakel utwinkishinay Yesu.

9. Yesu wadinga ni midimu ik?

⁹ Kuwejin pa kwikal kwend “njil,” Yesu walonda kand anch udi “uyakin ni mwom.” Mazu minam malejen anch mudimu wend udiap ching kusu kwikal kwa kusutil kuya kudi Tatukwend. Yesu ukwet kand mudimu wa usey kukwatijan nich yilondila uyakin udia mu Bibil ni kutambul mwom wa chikupu. Chakin, mapit ma usey nakash ma muspiritu majingamen mudiay Yesu, mayichingedin in kwilej Bibil akweta mushiku amajingunina. El tushinshikinany mapit mamwing makweta usu pa dikez dietu ni pa urund wetu ni Nzamb.

10. Chom ik tukutwisha kwilej piur pa Yesu mu Kolosay 1:19 ni 2:9?

¹⁰ “Mwi ndiy kusu mwawiy mushicha yinzwich yawonsu ya Nzamb.” (Kol. 1:19; 2:9) Padingay chisu chilemp ni tatukwend mwiur, Yesu wadinga wij nawamp anch kwikil muntu ap umwing ukutwisha kwimik rusot ra Nzamb. Mu mudimu wend wawonsu wasalay pa divu, Yesu wayileja antu akwau yom yamulejau kudiay Tatukwend ni wamekesha mu yisal yend ngikadil ya Tatukwend yamulejay kwikal nich. Chawiy chalonday Yesu anch: “Wamena kal am wamumen kal Tatuku.” (Yoh. 14:9) Manang mawonsu ni ronganyin ra Nzamb ayijindjikidin, ap anch yidi, mudiay Kristu, ni kwikil njil yipandikenamu kuwap kudi etu ya kumwilej Yehova ching ku kwilej nawamp yom yawonsu yitukutwisha kwilej piur pa Yesu.

11. Kukwatijan ik kudia pakach pa Yesu ni uprofet udia mu Bibil?

¹¹ “Uman wa Kristu wawiy ukash wa aruu a Nzamb.” (Kubur. 19:10, Manswik Masu) Mazu minam malejen anch Yesu udi muntu wa kusambish mu uprofet uvud ujim udia mu Bibil. Kusambish nich uprofet wa kusambish walonday Yehova udia mu Disambishil 3:15, djat ku yishimushimu ya ntumb ya mu mukand wa Kuburik, chitwishikin kutesh nawamp uprofet wa Bibil ching anch mudimu wa Yesu waya pamwing ni Want wa Mesia. Chom chinech chilejen mulong wak uprofet uvud udia mu Mifund ya Uhebereu uyishimokishin antu akad kumwitiyij Yesu mudi Mesia washilaumu. Chirumburil kand mulong wak Yesu kadiap muntu mujim kudi antu akad kwijik usey wa Mifund ya Uhebereu, mudia uprofet uvud piur pa Mesia. Kumwijik Yesu kuyinkishin antu a Nzamb mutapu wa kutesh uprofet udia mu Bibil wakad kal kuwanyin.—2 Kor. 1:20.

12, 13. (a) Mutapu ik udiay Yesu “kutok kwa mangand”? (b) In kwilej a Kristu adi mwishin mwa mbil ik mulong wa kukolik kwau mu mididim ya relijon?

¹² “Yam kutok kwa mangand.” (Tang Yohan 8:12; 9:5.) Kurutu Yesu avadika pansh, profet Isay wabwaka anch: “Ey yey wayinkisha antu kuzangijal nakash, ni musangar ujim. Awiy akat kusanger mu yisalijok yey mudi mukat kusangerau antu yom ya kwangul, ap mudi mukat kusangarau antu pakwagan yibuu.” (Isay 9:2) Kambuy Mateu warumburila anch Yesu wawanyisha uprofet winou chisu Chasambishay kulejan ni walonda anch: “Karumukany, udiokalany ku yitil yen, mulong Want wa Nzamb udi piswimp!” (Mat. 4:16, 17, MM) Mudimu wa Yesu wayiletina antu chitokish cha muspiritu ni want ipau wa kudiokal ku malejan ma relijon wa makasu. Yesu walonda anch: “Am neza mu mangand mulong wa kulet chimunyik kudi antu, chakwel muntu mwawonsu ukwingitiyija am kakushakamap mu mididim.”—Yoh. 1:3-5; 12:46, MM.

¹³ Kupwa kwa mivu yivud, kambuy Paul wayileja akwau in Kristu anch: “pasak en wadingany mididim, pakwez katat udiany kutok mu Mwant: endany mu kutok.” (Efes 5:8) Kudiokal mu usu wa mididim ya relijon, chawiy in Kristu adi mwishin mwa mbil ya kwend mudi an adia mu kutok. Chom chinech chikwatijadin nich yom yayilejay Yesu in kwilej end mu Malejan ma pa Mukandu anch: “Munyikany kutok kwen kurutu kwa antu, chakwel amana midimu yen yiwamp, amutumbish kand Tatukwen udia mwiur.” (Mat. 5:16) Ov, ukat kusanger nakash mapit ma muspiritu utanina mudiay Yesu mu chilik cha kushiken kuyilej antu akwau, kusutil ku yisal, ku mazu ni ku mashakamin mey mawamp ma Ukristu?

14, 15. (a) Mutapu ik wadingau ni kuyisadil amikoku ni annam akwau mu difukwil diakin pa yisu yafundau Bibil? (b) Mulong wak Yesu udi dipit dipandakenamu nakash mu mudimu wend mudi “Mwan a mukoku wa Nzamb”?

¹⁴ Yesu udi “Mwan a mukoku wa Nzamb.” (Yoh. 1:29, 36) Mu Bibil mwawonsu, amikoku adinga ni kuyisadil nawamp pa mulong wa kulikishin yitil ni kumushejin Nzamb. Chilakej, pamekeshay Abraham anch udi tayad kumulambul mwanend Isak, amulikisha kumusal Isak nayimp ni amwinkisha ikwal a mukoku, chakwel amulambula pa ndond ya mwanend. (Dis. 22:12, 13) Pa chisu chayikolau in Isarel kudiokal mu Idjibit, ayisadila kand amikoku mu mudimu umwing ujim nakash, pa chisu chinech adinga mudi “kusut kwa [ Yehova, NW]” (Kub. 12:1-13) Chikwau, Chijil cha Moses chalonda piur pa milambu ya annam kushalijan, pamwing ni amikoku ni ampemb.—Kub. 29:38-42; Lev. 5:6, 7.

¹⁵ Kwikil umwing wa milambu yiney—chakin, kwikil mulambu walambulau antu—ukutwisha kuyikol chikupu kudiokal ku chitil ni rufu. (Heb. 10:1-4) Pakwez, Yesu udi “Mwan a mukoku wa Nzamb, ukata kusend yitil ya mangand.” Chom chinech chimwing kusu chimwikadishin Yesu dipit dipandakena kulemp mapit ma ku mujimbu mapitau kal antu. Chawiy lel, tukusal nawamp anch twitekin chisu cha kwilej nawamp rusang ra difut ni kwitiyij ditenchik dined diamushena. Anch twasal mwamu, twirijekidin ayinetu mutapu wa kutambul chiyukish ni difut—“chisak chikemp” chikutambul ntumb ni kalimish pamwing ni Kristu mwiur ni “amikoku akwau” mwom wa chikupu mu Paradis panap pansh.—Luka 12:32, MM; Yoh. 6:40, 47; 10:16.

16, 17. Ov, mulong wak chidi cha usey anch tutesha mwaz wa Yesu mudi “kalal ni mwin kutenchikish wa ritiy retu”?

¹⁶ Yesu udi “kalal ni mwin kutenchikish wa ritiy retu.” (Tang Hebereu 12:1, 2.) Mu Hebereu shapitre wa 11, tutaninamu rusangu ruwamp nakash rafunday Paul piur pa ritiy, mudi kand kurumburil kwovikena kwa ritiy ni dipang dia amakundj ni amband akaritiy mudi Nowa, Abraham, Sara ni Rahab. Nich rusangu riner mu manangu, Paul wayikasikesha akwau in Kristu chakwel amutala “Yesu, kalal ni mwin kutenchikish wa ritiy retu.” Mulong wak?

¹⁷ Ap anch amakundj ni amband inay akaritiy ajimbwilau mu Hebereu shapitre wa 11 adinga ni ritiy rikash mu kushilamu kwa Nzamb, awiy kadingap kwau ija tuyom twawonsu piur pa mutapu ukezay Nzamb kuwanyish kushilamu kwend kusutil kudiay Mesia ni ku Want. Pa chinech, ritiy rau radingap riwanyidina rawonsu. Chakin, ap antu asadilay Yehova chakwel afunda uprofet uvud piur pa Mesia kadingap ni kutesh kurumburik kwa yom yafundau. (1 Pita 1:10-12) Ching kusu kusutil kudi Yesu chawiy lel ritiy rikwikal riwanyidina. Chidi cha usey mudi ik kudi etu kutesh zwang ni kujingunin mudimu wa Yesu mudi “kalal ni mwin kutenchikish wa ritiy retu”!

Suribany

18, 19. (a) Jimbul mapit makwau ma muspiritu majingamena mudiay Kristu. (b) Ov, mulong wak tufanyidina kudandamen kumuchingejin Yesu pa mulong wa kutan mapit ma muspiritu?

¹⁸ Twilej kal midimu yikemp ya usey ya Yesu mu rutong ra Nzamb piur pa kuyipandish antu. Kuchidi kand mapit makwau ma muspiritu majingamena mudiay Kristu. Kumajingunin kukat kutuletin mazang ni yiyukish. Chilakej, kambuy Pita wamutazuka Yesu anch: “Mwant wa kupand” ni “katumbu mwiz kuch[a]” ulankina. (Mid. 3:15; 5:31; 2 Pita 1:19) Ni Bibil usadidin dizu “Amen” padiay Yesu. (Kubur. 3:14) Ov, wij chirumburikana mwaz winou? Mudi mwalonday Yesu, “suribany, ukutanany.”—Mat. 7:7.

¹⁹ Kwikil muntu ap umwing mu rusangu ra muntu wikala ni mwom urumburikina mwamu ni ukwatina nakash ku mwom wetu wa chikupu kumupandakanamu Yesu. Mudiay ndiy mwawiy mudia mapit ma muspiritu maswapela kutan kudi muntu mwin mwawonsu umakimbina. El wikala nich musangar ni chiyukish cha kujingunin mapit ‘majindjikinau mwi ndiy.’

Ov, Uchivurikin?

• In Kristu ayikasikeshin akimba mapit ik?

• Ov, mulong wak chiyul chayiyulau in Kolosay kudiay Paul chidi cha usey kudi etu ilel?

• Jimbul ni rumburil mapit mamwing ma muspiritu ‘majingamena’ mudiay Kristu.

[Chipich chidia pa paj wa 10]

Bibil udi mudi kart utulejina ndond yidia mapit ‘majindjikidinau’ mu Kristu