Tukwet Yipau ya Usey ya Kuyilej Antu Akwau

¹ Mu Dizu dia Nzamb mwizwil too yipau ya muspiritu yitukatina. (Kus. 12:6; 119:11, 14) Pa chisu chimwing cha pakampwil, Yesu wasadila yilakej yafanikeshay nich mitambu kushalijan ya Want, ni wayipula in kwilej end anch: “Ov wijikany kal yom yiney yawonsu?” Pateshay chakul chakin, ndiy wayileja kand anch: “Chawiy mwin kufund wawonsu wakarumwishidilau kal ku mwin kwilej wa want wa mwiur, udi mudi mwin chikumbu ukata kubudish yom yisu ni [yikur] mu chipau chend.”—Mat. 13:1-52.

² Uyakin udia mu Bibil utwileja pasak udi mudi yipay yikur. Kusutil ku dilejan dietu dia yom yikurikina yidia mu Dizu dia Nzamb, tukat kutan mu Bibil uyakin ukwau, udia kudi etu mudi yipau yisu. (1 Kor. 2:7) Ni kusutil kudiay “Kashalapol ushishamena ni kubabal” tukat kushiken ku kutesh kurumburik kwa yipau yisu.—Mat. 24:45.

³ Tukat kuyikwat nich usey ukash yipau yiney yikur ni yisu ya muspiritu. Yipau yiney yikat kutubachik twiyijidisha ni kutambul ronganyin chakwel twikala alej a Dizu dia Nzamb, akata kuyilej antu akwau nich musangar uyakin wa usey utwilejina.

⁴ Ilejina ku Chilakej cha Yesu: Pamekeshay mutapu wiyovay piur pa yipau yiney, Yesu wasala usu ukash mulong wa kuyilejay antu akwau. Ni pa chisu chadingay uziyin, kalikap kulejan yipau yadinga mwi “nkil” jend.—Yoh. 4:6-14.

⁵ Rukat ra Yesu mulong wa antu adia atuzwendj muspiritu rawiy ramubachika chakwel ayileja yipau ya uyakin wa Nzamb uletina mwom. (Kus. 72:13) Ndiy wayovila riy antu adinga ni nzal ya muspiritu ni ramubachika ni “wasambisha kuyilej yom yivud.”—Marko 6:34.

⁶ Mwimburija Yesu: Anch twakwat nich usey nakash yipau yitukweta tukutwish, mudi Yesu, tukukapuk kuyilejay antu kapamp kamwing mu Bibil yipau yiney ya muspiritu. (Jinsw. 2:1-5) Ap anch pa yisu yimwing tukutwish twaziy, tukez kulond piur pa uyakin udia mu Mifund nich musangar. (Mark 6:34) Kusanger kwetu nakash yipau yitukweta kukutubachik twipana nakash mu mudimu wa kulejan, tukusot chisu chawonsu ching tulejana.