Program Musu wa Chitentam cha Munyimuku

Mangand masotil kutwitiyijish anch ditenchik dia yom dined dikez kushal chikupu. Pakwez, Dizu dia Nzamb ditulejin chom chindjing. (1 Yohan 2:​15-17) Ditukwashin kutesh anch ‘kwijindjikin yipau pa divu’ kudi kwakad usey. Chakwel kuyikasikesh antu a Nzamb, program wa chitentam cha munyimuku cha muvu wa mudimu wa 2007 ukez kurumburil mutu wa mulong “Jindjikany Yipau . . . Mwiur.”​—⁠Mat. 6:​19, 20.

Kutongin nakash yom ya mapit akuchindidin mu yom yilondilau mu Efesus 2:2 anch “mwant wa usu wa chipepil, ndiy ukata kusadil mudimu katat mu an a in kubwambul.” Mudi kamu mudia chipepil ndond yawonsu, chiswakela kupim, wawiy mutapu upalangenay ‘spiritu wa mangand’ mu ditenchik dined. (1 Kor. 2:12) Mulong usu wend upandiken nakash, chawiy chimutazukinau anch “mwant wa usu.” Program musu wa chitentam cha munyimuku ukez kutukwash kwipuk kutongin nakash yom ya mapit ni kulam mu manangu yom yidia ya usey nakash. (Mateu 6:33) Chikwau kand, program ukez kutukwash kumuchingej Yehova pitusadila mudimu wetu kwikalap nchik yakamish ni yoziu yikutwisha kutushiken.

Sal usu wa kwikalaku machuku mawonsu maad ni “kudimuk nakash.” (Heb. 2:⁠1) Fund mu wiswimp yom yiukutwisha kusadil mu mwom ni mu mudimu wey. Anch wikalaku kudiosh kamu kwinsambishil djat ni kwisudiel kwa program winou wa muspiritu ukasikeshina, ukez kwikal ni usu ni ukasikeshinau mulong wa kudandamen ‘kujindjik yipau mwiur’!