Chitentam cha Munyingumuku Chikutukwash Tulama Mwikadil Wetu wa Muspiritu
1. Ditenchik ik dimwing disadilay Yehova mulong wa kutukwash chakwel tuwanyisha mudimu wetu wa kulejan rusangu ruwamp?
1 Yehova utwinkishin jinsangu jituswiridina, utufumbin, ni utwinkishin dikasikesh dituswiridina chakwel tusala mudimu watwinkishay wa kulejan rusangu ruwamp. (Mat. 24:14; 2 Tim. 4:17) Chitentam chetu cha munyingumuku cha pa muvu chidi chimwing cha yitenchik yiney. Program musu wa mu muvu wa mudimu wa 2010 ukez kwisambin mutu wa mulong ulondila anch: “Lamany Mwikadil Wen wa Muspiritu,” ushindamedina pa Rome 8:5 ni Yuda 17-19. Amutechikin chakwel eza asambisha pa rubing ra Kafumpul 31, 2009.
2. (a) Chitentam cha munyingumuku chikez kutukwash mu jinjil ik? (b) Ov, yitentam ya munyingumuku yasuta kal ey yakukwasha mutapu ik mu mudimu wey wa kulejan?
2 Mutapu wa Kutanyinamu: Program ukez kutubabesh pantaliken nich ubaj udiaku, mudi kuzuwol kukata kusot kushesh chisu chetu ni kudiosh manangu metu ku yom yidia chakin kamu ya usey ujim. Tukez kwilej mutapu wa kura nich spiritu wa kulikin uyimp ni tukez kwilej ngikadil ya muntu wa muspiritu. Sempoziom ukezau kusal Diarubing ukez kutulej mutapu ukutwishay muntu ni muntu ni yisak ya majuku kukwat nzau ja kusal mulong wa kukasikesh mwikadil wau wa muspiritu pa chisu chidiau mu milong yikash ni mu kupakiu kukash kwa ritiy rau. Program ukez kutukwash chakwel tulama michim yetu, ukash wetu wa muspiritu ni kulam mu manangu yiyukish yijim yiyichingedina antu alamina mwikadil wau wa muspiritu.
3. Chisu ik ukezanya kusal chitentam chen cha munyingumuku, ni wakwatin kal mupak ik?
3 Anch wijikany kamu nawamp kwi ndond ni pa chisu chikeza kusadik chitentam cha munyingumuku chezinaku, itenchika chakwel weza wikalaku ni uta matu ku yikunku yawonsu ya machuku maad. Ikal ni kashinsh anch, Yehova ukat kuyukish makas ma mwin mushiku.—Jinsw. 21:5.
4. Tukwet kashinsh ka kwez kutambul chom ik ku chitentam chetu cha munyingumuku chezinaku?
4 Chakin kamu, Yehova ndiy Mwin Kulet chipan chinech chiwamp. Program utenchikinay chisak cha kashalapol ushishamena ukez kwikal kamu win utuswiridina chakwel tusala mudi atushalapol in Kristu. Tumujikitishin Yehova mulong wa yitenchik yend yawonsu ya rukat mulong wa kutukwash tulama “kwitiyil kwa ruchingej retu rakad kushemunik.”—Heb. 10:23-25; Yak. 1:17.