Program Musu wa Chikumangan cha Munyimuku

Mu ‘yisu ya mar nakash’ yiney, tuswiridin manangu ma winzamb mulong wa kwak ni kulam kwitiyik kud Yehova. (2 Tim. 3:⁠1) Program wa chikumangan cha munyimuku cha muvu wa mudimu wa 2005 ukutwinkish chiyul chiwamp ni dikasikesh pakurumburilau mutu wa mulong ulondila anch “Twikalany Atakedinau Nich ‘Manangu Madiokila Mwiur.’ ”​—⁠Jak. 3:⁠17.

Diskur dia kusambish dia yikunku yisatu dilondila anch, “Tumekeshany ‘Manangu Madiokila Mwiur’ mu Mwom Wetu,” dikutukwash kwov kurumburik pa yitadina kwikal ishitwila, in chisambu, in manangu mawamp, ni in kuziyin. Kupwa, kalam’a munyimuku ukupwitin nakash yitongijok yetu ku milad yikwau yisatu ya manangu ma mwiur. Kalam’a distrik ukupwish dichuku dia kusambish nich kulejan mutapu uyiwanyishinau atushalapol in Kristu mulong wa kulejan manangu ma Nzamb, ap anch ameken kud antu amwing mud “antu amwamu akad kwilej.”​—⁠Mid. 4:​13, MM.

Dichuku dia kaad, diskur dia yikunku yinying dikweta mutu wa mulong ulondila anch, “Tulondulany Yom Yikata Kutung” dikutukwash kujingunin ni kwiyep yom yikutwisha kutuziyish muspiritu. Dikutulej kand mutapu tukutwisha kuyikasikesh akwetu ku yikumangan ya chikumangen, mu mudimu wa chingand, ni mu dijuku. Diskur dia patok dilondila anch, “Manangu ma Nzamb Matuyukishin,” dikutandurish kubaz ni kujikitish kwetu mulong wa yiyukish tutambwila pitusadidina mbil jidiokila kud Nzamb mu mwom wetu. Diskur dia nsudiel dilondila anch, “Kusadil Manangu ma Nzamb Kukat Kutuking,” dikukasikesh mupak wetu wa kukimb manangu madiokila kud Yehova mu machuku minam ma nsudiel.

Dinans dijim dia chikumangan chin chawonsu udi ubatish wa in kwilej asu. Shikol ya Mudimu wa Uteokras ni Dilejan dia La Tour de Garde dia pa rubing akuyitek kand ku program. Yehova usotil etu awonsu tutaninamu ku manangu mapaninay. Tukwikal ampich muspiritu kusutil ku chiyul ni dikasikesh yituchingedina ku chikumangan chetu cha munyimuku.​—⁠Jinsw. 3:​13-18.