“Yakudia pa Chisu Chiwanyidina”

1. Ov, mutapu ik wakukwashina program wa chitentam cha pakampwil cha dichuku dimwing ni antu akwau machuku minam?

¹ Kupwa kwa kukumangan ku chitentam chetu cha pakampwil cha dichuku dimwing, twading ni kulond chisu chawonsu anch “Chadinga kamu chom tuswiridina!” Kalam wa munyingumuku umwing wakula anch kupwa kwa kutesh program wa pichuku, antu amwing a mu munyingumuku wend amekesha maswir mau ma kwiyandjik mu mudimu wa kulejan. Kalam umwing wa munyingumuku walonda anch: “Chitukwashin chakwel tutonga nawamp piur pa ndond tudia mu chisu chiya mau mudi tuchirikidin kutond kwetu mu mwom.” Mukwau walonda anch: “Uvud wa in kulejan wamekesha chitongijok chinech aulejana ku telefon chakwel twikala nich kashinsh anch asidin jinkeu jau pa chom chipandakena usey, mudimu wa kulejan.” Ov, mutapu ik wakukwasha pa chitentam cha pakampwil cha dichuku dimwing?

2. Yom ik tukeza kushinshikin mu program wa muvu wa mudimu ukwezap?

² Program wa muvu wa mudimu ukwezap ukez kwikal kand ni yom tuswiridina kamu. Mutu wa mulong udi ‘Ikungamenany kudiay Yehova,’ udiokidila mu Kuseng 118:8, 9. Kukez kwikal mitu ya milong yimwing ya kwisambin mudi: “Mutapu ik Udiay Yehova Ndond ya Kukungamen mu Yisu ya Mar,” “Yikwashany Antu Akwau Atana Ndond ya Kukungamen mu Mapur ma Yehova,” “Imburijany Yehova Ndiy Utwinkishininga Ndond ya Kukungamen,” “En Ansand, Tekany Ruchingej Ren Mudiay Yehova!” ni “Paradis Wetu wa Muspiritu—Yakudia ya Yehova Mulong wa Ndond ya Kukungamen.”

3. Ov, mutapu ik tukutwisha kutaninamu nakash kudiau in kutesh?

³ Chakwel Tutaninamu: Anch ijikish dichuku kusu, pakish kurumburil mutapu wa kwirijek kuya ku kukumangan, ni yileja in kwilej ey a Bibil eza inunga ney. Chakwel ‘tusonga mabuji nich kudandamen,’ tufanyidin kulam yom yituteshina. (Luka 8:15) Chawiy lel, chifanyidin kutesh program nawamp, ni kufund mifund ya mu wiswimp ya manans majim madia mudi yany yiukutwisha kusadil mu mwom wey ni mu mudimu wa kulejan. Kupwa kwa chitentam, itekina chisu cha kwisambin mu dijuku yom yiwilejanyakal ku program, ni shinshikin mitapu ya pakampwil yiukutwisha kusadil jinsangu jinej ni dijuku diey.

4. Mulong wak tufanyidina kuchingel nich kushimpish michim mulong wa chitentam cha pakampwil cha dichuku dimwing chidia kurutu?

⁴ Mudi yakudia yipandakena kuwap ni yikudishina mujimbu, chitentam cha pakampwil cha dichuku dimwing cha muvu winou akez kuchirijek nich rukat ruvud ni kalimish. El Yehova ayukish mausu men chakwel uyany ni utambulany “yakudia pa chisu chiwanyidina.”—Mat. 24:45.