Program wa Chitentam cha Pakampwil cha Dichuku Dimwing cha Muvu wa 2010
1. (a) Mitu ik ya milong ya yitentam ya pakampwil ya dijuku dimwing yengamidina pa Mifund yasadikina mu mivu yasutila ey? (b) Kudi manans mamwing ma pakampwil madiokila ku yitentam ya pakampwil ya dijuku dimwing makukwashina mu mudimu wey wa kulejan?
1 ‘Jinguninany Yom Yipandakena Kuwap,’ ‘Dandamenany mu Muchim Umwing Mudi Diyind Dimwing,’ ‘Mekeshany Uman wa Uyakin’ ni ‘Etu Tudi Kam, Yehova Udi Muumb Wetu.’ (Filip. 1:9, 10; 1:27; Yoh. 18:37; Isay 64:8) Yiney yidi kwau mitu yikemp pa mitu yivud yitwisambina ku yitentam ya pakampwil ya dichuku dimwing yasuta kal. Usadil usu wa kwez kukumangan ku chitentam cha pakampwil cha dichuku dimwing cha mu muvu wa mudimu wa 2010? Chikez kwikal ni mutu wa mulong ulondila anch: “Kwashal kal Chisu Chiswimp,” udiokila mu 1 Korint 7:29.
2. Mutapu ik ukutwisha kulangwish kusanger chitentam chinech?
2 Sambish kukudish kusanger mu muchim wey mulong wa chitentam cha pakampwil cha dichuku dimwing kusambishin kamu pa chisu chikukulejanyau mu chikumangen chen dichuku dia ngond pichikusadika. Anvaj amwing ayikwashining anau chakwel achingela chitentam kusutil ku kufund dichuku dia ngond pichikeza kusadik mu kalandriye wa dijuku diau, pamwing ni yom yikuswirikenau, ni kupwa akusambish kuchind machuku mashadilaku. Pa Urel wa Difukwil dia mu Dijuku, ukutwish wachirikinany yom yiwafundanya ku yitentam ya pakampwil yasuta kal. Ukutwish kutenchikany kand michim yen mulong wa chinship chinech chezinaku kusutil ku kushinshikin malejan madia mu buku Tirez profit de l’École du ministère théocratique, pa paj wa 13-16, chakwel makukwasha amwiney pamwing ni dichuku diey mutapu wa kubabel “mutapu ukata kuteshany”—Luka 8:18, Manswik Masu.
3. Mutapu ik tukutwisha kutaninamu nakaksh mu malejan makezau kulejan?
3 Sadilany Yom Yiwilejinany: Kupwa kwa chitentam, chisu ni chisu tuteshining mazu manam: “Winou wadi program muwamp nakash!” Mazu minam mading makin, mulong chinech chiding chimwing cha yitenchik yipitishina ya Yehova. (Jinsw. 10:22) Chakwel anch tutaninamu mu rusangu riner, ufanyidin kuritongijokin ni kurilam. (Luka 8:15) Itekina chisu piudia mwinjil pa chisu uchirikina kwolikwey kupwa kwa chitentam chakwel wisambinany piur pa program mudi dijuku ap ni antu uyila nau pamwing mu motak. Isambinany piur pa rutong ra muntu ni muntu ni piur pa manans makutwisha kukukwash mu mudimu wa kulejan. Anch wasalany mwamu kukez kukukwashany utaninanyamu mu malejan minam chisu chilemp kupwa kwa chitentam.—Yak. 1:25.
4. Mulong wak chitentam chinech chikez kwikal cha pakampwil kudi etu?
4 Tukat chisu chawonsu kwovang musangar anch atwinkish chom chitwadia tuswirikedina kamu. Ov, tukutwishap twasambel kusanger yom yitutekidinay Yehova kurutu oku ku chitentam chetu cha pakampwil cha dichuku dimwing? Tukutwish twikal nich kashinsh anch chikez kutukwash mu mitapu kushalijan. Tukutwish twachingejin anch Yehova, Tatukwetu wa mwiur, atwinkisha chom chin kamu chituswirikedina kusutil ku kutukasikesh ni kutufumb mutapu wa kusal mudimu watwinkishay kuusal.—2 Tim. 4:2; Yak. 1:17.