Dizu dia Nzamb Dikwet Usu

1. Ov, wisu mutu wa mulong wa chitentam cha pakampwil cha dichuku dimwing cha muvu wa mudimu wa 2014?

¹ Chinyim ni chom chawonsu chisadiningau kudi antu akad kuwanyin, Bibil ukwet usu ukash wa kutukarumun, chakwel tuswimpa yitongijok yetu ni kwikal nich mwikadil wambatena nich rusot ra Yehova. Ov, mutapu ik Dizu dia Nzamb dikweta kamu usu? Ov, mutapu ik tukukwisha kamu kudisadil mu mwom wetu? Ov, mutapu ik tukutwisha kudisal nakash chakwel tuyikwasha antu akwau? Tukwet kashinsh anch etu awonsu akez kutukasikesh muspiritu chisu chikezau kushishikin manans minam ku program wa chitentam cha pakampwil cha dijuku dimwing cha muvu wa mudimu wa 2014 chikweta mutu wa mulong ulondina anch: “Dizu dia Nzamb Dikwet Usu,” wengamidina mu Hebereu 4:12.

2. Ov, tufanyidin kutesh yakul ku yipul ik?

² Tan Yakul ku Yipul Yiney: Piukutesha program winou, sal usu wa kufund yakul ku yipul yilondwilaku ey.

• Ov, mulong wak tufanyidina kutek ruchingej retu mu Dizu dia Yehova? (Kus. 29:4)

• Ov, mutapu ik tukutwisha kuman usu wa Dizu dia Nzamb, mu mwom wetu ayinetu? (Kus. 34:8)

• Ov, mutapu ik ukutwisha kusadil usu wa Dizu dia Nzamb mu mudimu wey wa kulejan? (2 Tim. 3:16, 17)

• Ov, mutapu ik tukutwisha kwipuk kuwil mu usu wa makasu madia mu mangand ma Satan? (1 Yoh. 5:19)

• Ov, piudia nsand mutapu ik ukutwisha kuwanyish jintong ja muspiritu? (Jer. 17:7)

• Ov, mutapu ik tukutwisha kwikal nich usu chikalap nchik pa chisu tuziyina? (2 Kor. 12:10)

• Ov, chom ik chiswiridina chakwel tudandamena kuswimp mu mashakamin metu ma mwom, chikalap nchik chaku chiyimp ni mwikadil uyimp yitwadinga nich pasak? (Efes 4:23)

3. Kupwa kwa kutesh program, ov, mutapu ik tukutwisha kutaninamu kand kusutil ku chitentam cha pakampwil?

³ Mutapu ik tukeza kutaninamu kusutil ku kutesh rusangu riner ra usey! Chikwau kand, chitentam cha pakampwil cha dichuku dimwing, chitentam cha munyingumuku ni chitentam cha distrikt, yikez kutwinkish yisu ya kwazuril michim yetu ni kusanger urund wa ukadivar nau ambay akad kwikal a mu chikumangen chetu. (Kus. 133:1-3; 2 Kor. 6:11-13) Chawiy lel, itekina chisu cha kwinung ni arund akur ni sal usu wa kwijikijan ni arund asu. Anch mwin kulond ngendj mudi kalam wa distrikt ap mukadivar wa ku Betel winkishinau chisend ku chitentam chen cha pakampwil, ov, mulong wak ukwitekinap chisu chakwel umwezishaku pamwing ni mukajend? Chakin kamu, tukwet yiyingish yivud ya kuchingejin chitentam cha pakampwil chezina ech!