Dizu dia Nzamb Didi Ukwash Mulong wa Kulejan

1. Ov, wisu mutu wa mulong wa chitentam cha munyingumuku cha muvu wa 2014, ni kusutil ku program winou, chipul ik chikezau kwakul?

¹ ‘Mulej Wetu Mujim,’ Yehova udi mulej upandakena kuwap mu mangand mawonsu. (Isay 30:20, 21) Ov, mutapu ik utufunidishingay Yehova? Ndiy watwinkisha buku usutina mabuku makwau mawonsu—Dizu diend diapepilay, Bibil. Ov, mutapu ik tukutwisha kutaninamu mu malejan ma Nzamb kumujimbu, mu manangu , mu yovil ni muspiritu? Chakul ku chipul chinech akez kachishinshikin pa chisu cha program wa chitentam chetu cha munyingumuku cha muvu wa 2014. Mutu wa mulong wa program, “Dizu dia Nzamb Didi Ukwash Mulong wa Kulejan,” wengamidin mu 2 Timote 3:16.

2. Ov, manans majim ik akez kumashinshikin ku yakul ya yipul ik?

² Shinshikinany pa Manans Minam: Manans majin ma program akez ku makasikeshin ku yakul ya yipul yilondwila ey:

• Ov, malejan ma Nzamb makutwish kwikal nich usu ik mu mwom wetu? (Isay 48:17, 18)

• Anch tusotin kusal yitenchik mulong wa kuswimp mikadil yetu chakwel tumusadin Yehova chisu chawonsu, ov, kashinsh ik tukutwisha kwikal nich? (Mal. 3:10)

• Ov, mwikadil ik tufanyidina kumekesh chisu tutanijadina nich “malejan mavud makad kwijikany”? (Heb. 13:9, TMK)

• Ov, mutapu ik tukutwisha kumwimburij Yesu kusutil ku “malejan mend”? (Mat. 7:28, 29)

• Ov, mulong wak alej adia mu chikumangen afanyidin kwifundish ayinau? (Rom 2:21)

• Ov, mulong wak Dizu dia Nzamb didi dia usey? (2 Tim. 3:16)

• Ov, mutapu ik antu ‘wakwatikau’ kusutil ku kunyikesh michid? (Hag. 2:6, 7)

• Ov, ruchingej ik rikwetayi Yehova mudi etu? (Efes 5:1)

• Ov, mulong wak tufanyidina kusal usu wa kushal ajijamena mu malejan ma Yehova? (Luka 13:24)

3. Ov, mulong wak chidia cha usey kudi etu kukumangan ni kupwitin jinkeu pa program winou watenchikau pa chisu chiwanyidina?

³ Pasambishay Paul kufund 2 Timote shapitre 3, kurutu kwa kufund mazu mengamidina pa mutu wa mulong wa program winou, ndiy wisambina chisu chikash chimekeshina machiku mansudiel. Ndiy wafunda anch: “Antu ayimp ni in makasu akukudil mu kuyip ni mu kuyip nakash, akez kadimbijan ni kudimbijan.” (2 Tim. 3:13, TMK) Chawiy, tukezap kwikal adimbinau, chid cha usey mud ik kudi etu kutesh ni kusadil malejan ma Nzamb! Chawiy lel, tukutwish kukwat mupak wa kukumangan ni kupwitin jinkeu pa program winou watenchikau pa chisu chiwanyidina.